Diane 10:1-32
10 Diane tsa ga Solomone.+
Morwa yo o botlhale o itumedisa rraagwe,+Mme morwa yo o seeleele o hutsafatsa mmaagwe.
2 Matlotlo a a kokoantsweng ka bosula ga a kitla a tswela mosola,Mme go dira se se siameng ke gone go tla gololang mo losong.+
3 Jehofa ga a kitla a letla gore mosiami a tshwarwe ke tlala,+Mme o tla tima badirabosula se ba se eletsang.
4 Yo o sa direng sepe o tla humanega,+Mme yo o dirang ka natla o tla huma.+
5 Morwa yo o botlhale o phutha dijalo go le selemo,Mme morwa yo o tlhabisang ditlhong, o thulametse ka nako ya thobo.+
6 Mosiami o tla amogela masego,+Mme molomo wa badirabosula o fitlha boferefere.
7 Mosiami o tla gakologelwa a bo a segofadiwa,+Mme leina la badirabosula le tla nyelela.+
8 Motho yo o botlhale o tla amogela kgakololo,+Mme yo o buang a sa akanye o tla boga.+
9 Motho yo o dirang se se siameng o tla tsamaya ka pabalesego+Mme yo o sokamisang ditsela tsa gagwe o tla lemogiwa.+
10 Motho yo o tsipang leitlho la gagwe ka boferefere o baka khutsafalo,+Mme yo o buang a sa akanye o tla boga.+
11 Molomo wa mosiami ke motswedi wa botshelo,+Mme molomo wa badirabosula o fitlha boferefere.+
12 Motho yo o tlhoileng ba bangwe o tsosa manganga,Mme motho yo o nang le lorato o iketleeleditse go itshwarela ba bangwe ka metlha.+
13 Botlhale bo fitlhelwa mo go se motho yo o nang le temogo a se buang,+Mme thupa e tshwanetse mokwatla wa motho yo o seng botlhale.+
14 Ba ba botlhale ba rata* kitso,+Mme molomo wa seeleele o baka tshenyego.+
15 Dikhumo* tsa mohumi di tshwana le motse wa gagwe o o sireletsegileng.
Mme mohumanegi o a boga ka gonne ga a na sepe.+
16 Ditiro tsa mosiami di isa kwa botshelong;Mme ditiro tsa modirabosula di felela ka boleo.+
17 Motho yo o reetsang kotlhao ke tselana e e yang kwa botshelong mo go ba bangwe,*Mme motho yo o itlhokomolosang kgalemelo o faposa ba bangwe.
18 Motho yo o fitlhang letlhoo la gagwe o bua maaka,+E bile yo o anamisang dipego tsa letlhoo* ke sematla.
19 Yo o buang thata o tla dira diphoso,+Mme ope fela yo o laolang se a se buang o dira ka botlhale.+
20 Loleme lwa mosiami le tshwana le selefera e e di gaisang tsotlhe,+Mme pelo ya modirabosula ga e botlhokwa go le kalo.
21 Mafoko a mosiami a kgothatsa* ba le bantsi,+Mme dieleele di a swa ka ntlha ya go tlhoka botlhale.+
22 Tshegofatso ya ga Jehofa ke yone e e humisang motho,+Mme ga a e oketse ka botlhoko.*
23 Go dira boitsholo jo bo tlhabisang ditlhong go tshwana le motshameko mo mothong yo o sematla,Mme motho yo o nang le temogo o na le botlhale.+
24 Se modirabosula a se boifang ke sone se se tla mo tlelang;Mme basiami ba tla newa se ba se eletsang.+
25 Fa phefo ya matsubutsubu e kgabaganya, modirabosula o tla bo a sa tlhole a le teng,+Mme mosiami o tshwana le motheo o o nnelang ruri.+
26 Fela jaaka binika mo menong le mosi mo matlhong,Motho yo o setshwakga o ntse jalo mo go yo a mo romang.*
27 Motho yo o boifang Jehofa o tla tshela lobaka lo loleele,+Mme modirabosula o tla swa ka bonako.+
28 Tsholofelo ya basiami e tlisa boitumelo,+Mme se badirabosula ba se solofetseng ga se kitla se direga.+
29 Tsela ya ga Jehofa ke kago e e thata mo go yo o se nang molato,+Mme e kaya tshenyego mo go ba ba dirang bosula.+
30 Mosiami ga a kitla a digiwa le ka motlha,+Mme badirabosula ga ba kitla ba tlhola ba nna gone mo lefatsheng.+
31 Molomo wa mosiami o ntsha* botlhale,Mme loleme lo lo sokameng lo tla kgaolwa.
32 Molomo wa mosiami o itse se se itumedisang,Mme molomo wa badirabosula o bua dilo tse di sokameng.
Dintlha Tse di Kwa Tlase
^ Kgotsa “boloka.”
^ Kgotsa “Dilo tse di tlhwatlhwakgolo.”
^ Kgotsa gongwe “o mo tselaneng e e isang botshelong.”
^ Kgotsa “magatwe.”
^ Kgotsa “kaela.”
^ Kgotsa “khutsafalo; mathata.”
^ Kgotsa “thapileng.”
^ Kgotsa “o ungwa maungo a.”
