Diane 3:1-35
3 Morwaaka, o se ka wa lebala molao* wa me,Mme e kete pelo ya gago e ka ikobela ditaelo tsa me,
2 Gonne di tla go okeletsa malatsi a mantsiLe dingwaga tsa botshelo le kagiso.+
3 O se ka wa letla gore lorato lo lo sa kgaotseng le boikanyegi di go tlogele.+
Di bofelele mo molaleng wa gago;Di kwale mo pelong ya gago;+
4 Foo o tla nna le temogo e bile o tla amogelesegaMo matlhong a Modimo le a batho.+
5 Ikanye Jehofa+ ka pelo yotlhe,Mme o se ka wa ikanya* tlhaloganyo ya gago.+
6 Mo tseye tsia mo ditseleng tsotlhe tsa gago,+Mme ene o tla tlhamalatsa ditselana tsa gago.+
7 O se ka wa itsaya o le botlhale.+
Boifa Jehofa mme o fapoge bosula.
8 Seo e tla nna phodiso mo mmeleng* wa gagoE bile se tla lapolosa marapo a gago.
9 Tlotla Jehofa ka dilo tsa gago tse di tlhwatlhwakgolo,+Ka mabutswapele* a thobo* yotlhe ya gago;+
10 Foo mabolokelo a gago a tla tlala thata,+Le ditshekega* tsa gago di tla penologa ka beine e ntšha.
11 Morwaaka, o se ka wa gana kotlhao ya ga Jehofa,+E bile o se ka wa ila kgalemelo ya gagwe,+
12 Gonne Jehofa o kgalemela ba a ba ratang,+Fela jaaka rre a kgalemela morwawe yo a mo ratang.+
13 Go itumela motho yo o bonang botlhale+Le motho yo o nnang le temogo;
14 Go nna le jone go botoka go gaisa go nna le selefera,E bile go nna le jone* go botoka go gaisa go nna le gauta.+
15 Bo tlhwatlhwakgolo go feta dikorale;*Ga go na sepe se o se eletsang se se ka bapisiwang le jone.
16 Botshelo jo boleele bo mo seatleng sa jone sa moja;Dikhumo le kgalalelo di mo seatleng sa jone sa molema.
17 Ditsela tsa jone di a itumedisa,Le ditselana tsotlhe tsa jone ke tsa kagiso.+
18 Ke setlhare sa botshelo mo go ba ba bo tshwarang,Mme ba ba bo ngangatlelang thata ba tla itumela.+
19 Jehofa o thaile lefatshe ka botlhale.+
O tlhomile magodimo mo lefelong la one ka temogo.+
20 O ne a kgaoganya letšha le le boteng la metsi a dirisa kitso ya gagweLe loapi lo lo nang le maru lo ne lwa rothisa monyo.+
21 Morwaaka, o se ka wa lebala dilo tseno.*
Sireletsa botlhale jo bo mosola le bokgoni jwa go akanya;
22 Di tla go naya botsheloE bile di tla nna jaaka sebaga se sentle mo molaleng wa gago;
23 Foo o tla tsamaya mo tseleng ya gago o babalesegile,E bile lonao lwa gago ga lo kitla lo kgopiwa.*+
24 Fa o robala, ga o kitla o boifa;+O tla rapama o bo o robala monate.+
25 Ga o kitla o boifa sepe se se boifisang se se tlang ka tshoganyetso+Kgotsa phefo ya matsubutsubu e e tlelang batho ba ba bosula.+
26 Gonne Jehofa o tla dira gore o ikutlwe o sireletsegile;+O tla dira gore lonao lwa gago lo se ka lwa tshwarwa ke serai.+
27 O se ka wa gana go direla batho dilo tse di molemo fa ba di tlhoka*+Fa e le gore o ka kgona go ba thusa.*+
28 O se ka wa raya moagelani wa gago o re: “Tsamaya; mme o boe kamoso! Ke tla go se naya,”
Fa e le gore o ka kgona go mo naya gone jaanong.
29 O se ka wa logela moagelani wa gago leano le le bosula+Fa a nna le wena mme a ikutlwa a babalesegile.
30 O se ka wa omana le motho kwantle ga lebaka+Fa a sa go dira sepe se se bosula.+
31 O se ka wa tswela motho yo o ratang thubakanyo pelo+Kgotsa wa dira dilo tse a di dirang,
32 Gonne Jehofa o tlhoile motho yo o tsietsang,+Mme ke tsala e kgolo ya batho ba ba siameng.+
33 Jehofa o hutsa ntlo ya modirabosula,+Mme o segofatsa legae la basiami.+
34 Gonne o sotla ba ba sotlang,+Mme ba ba pelonolo o ba utlwela botlhoko.+
35 Boswa jwa batho ba ba botlhale e tla nna tlotlo,Mme ba ba dimatla ba tlotlomatsa se se sa tshwanelang go tlotliwa.+
Dintlha Tse di Kwa Tlase
^ Seheb., “thuto.”
^ Seheb., “ikaega ka.”
^ Seheb., “mo khubung.”
^ Kgotsa “tse di di gaisang tsotlhe.”
^ Kgotsa “lotseno.”
^ Kgotsa “digatisetso tsa beine.”
^ Kgotsa “go nna le jone e le poelo.”
^ Bona Ditlhaloso Tsa Mafoko.
^ Go lebega go tewa dinonofo tsa Modimo tse di umakilweng mo ditemaneng tse di tlang pele ga eno.
^ Kgotsa “lo kgopa sepe.”
^ Kgotsa “Fa go le mo maatleng a seatla sa gago.”
^ Kgotsa “fa go ba tshwanela.”
