Ditiro Tsa Baaposetoloi 18:1-28
18 Morago ga moo, Paulo o ne a tswa mo Athena mme a ya kwa Korintha.
2 Mme o ne a fitlhela Mojuda mongwe yo o neng a bidiwa Akhwila,+ motho wa kwa Ponto yo o neng a sa tswa go goroga a tswa kwa Itali, mme o ne a na le mosadi wa gagwe e bong Perisila, ka gonne Kalaudio o ne a laetse gore Bajuda botlhe ba tswe kwa Roma. Ka jalo, o ne a ya kwa go bone,
3 mme e re ka a ne a dira tiro ya diatla e e tshwanang le ya bone, o ne a nna kwa legaeng la bone a bo a bereka le bone+ ka gonne tiro ya bone ya diatla e ne e le ya go dira ditente.
4 O ne a tlhola a neela puo* mo sinagogeng+ ka sabata mongwe le mongwe+ e bile o ne a tlhotlheletsa Bajuda le Bagerika gore ba dumele.
5 Jaanong fa Silase+ le Timotheo+ ba ne ba goroga ba tswa kwa Makedonia, Paulo o ne a simolola go tlhoma mogopolo thata mo tirong ya go rera, a bontsha Bajuda gore ruri Jesu ke Keresete.+
6 Le fa go ntse jalo, ba ne ba nna ba ganetsa Paulo e bile ba mo kgoba, mme o ne a tlhotlhora diaparo tsa gagwe+ a bo a ba raya a re: “Sepe fela se se lo diragalelang, e tla bo e le molato wa lona.*+ Nna ke phepa.+ Go tloga jaanong ke tla ya kwa bathong ba ditšhaba tse dingwe.”+
7 Ka jalo, o ne a tswa koo* mme a ya kwa ntlong ya monna mongwe yo o neng a bidiwa Titio Juseto, yo o neng a obamela Modimo, yo ntlo ya gagwe e neng e bapile le sinagoge.
8 Le fa go ntse jalo, modiredi yo o okametseng sinagoge e bong Kiresepo,+ o ne a dumela mo Moreneng, mmogo le botlhe ba ba nnang mo ntlong ya gagwe. Mme Bakorintha ba le bantsi ba ba neng ba utlwa dikgang tse di molemo ba ne ba simolola go dumela ba bo ba kolobediwa.
9 Mo godimo ga moo, Morena o ne a bua le Paulo mo ponatshegelong bosigo a re: “O se ka wa tshoga, mme tswelela o bue, o se ka wa didimala,
10 gonne ke na le wena+ e bile ga go na motho ope yo o tla go tlhaselang gore a go utlwise botlhoko; ka gonne ke na le batho ba le bantsi mo motseng ono.”
11 Ka jalo, o ne a nna koo ngwaga le dikgwedi di le thataro, a ba ruta lefoko la Modimo.
12 Ka nako ya fa Galio e ne e le molaodi wa porofense* ya Akaia, Bajuda ba ne ba dumalana gore ba tlhasele Paulo ba bo ba mo isa kwa setulong sa katlholo,
13 ba re: “Monna yono o tlhotlheletsa batho gore ba obamele Modimo ka tsela e e sa dumalaneng le molao.”
14 Mme e rile Paulo a tloga a bua, Galio o ne a raya Bajuda a re: “Lona Bajuda, fa e le gore monna yono o ne a dirile phoso nngwe kgotsa tiro nngwe e e bosula, go ne go tla bo go utlwala gore ke lo reetse ka bopelotelele.
15 Jaanong fa e le gore lo ganetsana ka mafoko le maina le molao wa lona,+ lona ka bolona bonang gore lo tswa jang ka seo. Ga ke batle go nna moatlhodi wa dilo tseno.”
16 Foo o ne a ba leleka fa setulong sa katlholo.
17 Ka jalo, ba ne ba tshwara modiredi yo o okametseng sinagoge e bong Sosethenese+ ba bo ba mo itaya fa pele ga setulo sa katlholo. Mme Galio ga a ka a nna le seabe gotlhelele mo dilong tseno.
18 Le fa go ntse jalo, fa Paulo a sena go nna malatsi a le mantsi kwa Korintha, o ne a sadisa bakaulengwe sentle a bo a ya kwa Siria ka mokoro a na le Perisila le Akhwila. O ne a fokoditse moriri wa gagwe kwa Kenkerea,+ ka gonne o ne a dirile maikano.
19 Ka jalo, ba ne ba goroga kwa Efeso, mme o ne a ba tlogela koo; o ne a ya kwa sinagogeng mme a ruta Bajuda ka go ba thusa go tlhaloganya Dikwalo.+
20 Le fa gone ba ile ba nna ba mo kopa gore a nne nako e telelenyana, ga a ka a dumela
21 mme o ne a ba sadisa sentle a bo a ba raya a re: “Ke tla boela mo go lona gape, fa Jehofa* a ratile.” Mme o ne a tswa mo Efeso ka mokoro
22 a ya kwa Kaesarea. Mme o ne a ya kwa Jerusalema a bo a dumedisa phuthego, go tswa foo o ne a ya kwa Antioka.+
23 Fa a sena go nna nakonyana teng, o ne a tswa koo mme a tsamaya mo mafelong ka go latelana mo nageng yotlhe ya Galatia le Feregia,+ a nonotsha barutwa botlhe.+
24 Jaanong Mojuda mongwe yo o neng a bidiwa Apolose,+ yo o tswang kwa Alekesanderia, o ne a goroga kwa Efeso; e ne e le monna yo o setswerere mo puong e bile a itse Dikwalo sentle.
25 Monna yono o ne a rutilwe* tsela ya ga Jehofa,* e bile o ne a tuka mo moyeng, a bua e bile a ruta sentle dilo tse di ka ga Jesu, le fa go ntse jalo, o ne a tlwaelane fela le kolobetso ya ga Johane.
26 O ne a simolola go bua a le pelokgale mo sinagogeng, mme e rile Perisila le Akhwila+ ba mo utlwa, ba ne ba tsamaya le ene mme ba mo tlhalosetsa tsela ya Modimo sentle ka botlalo.
27 Mo godimo ga moo, e re ka a ne a batla go kgabaganya lewatle a ya kwa Akaia, bakaulengwe ba ne ba kwalela barutwa ba ba koo, ba ba kgothaletsa gore ba mo amogele ka lorato. Ka jalo, e rile a goroga koo, o ne a thusa thata batho ba jaanong e neng e le badumedi ka ntlha ya bopelonomi jo bogolo jwa Modimo;*
28 gonne o ne a bontsha Bajuda phatlalatsa gore dithuto tsa bone di ne di le phoso mme a dira jalo ka tlhagafalo, a ba bontsha go tswa mo Dikwalong gore Jesu ke Keresete.+
Dintlha Tse di Kwa Tlase
^ Kgotsa “a bontshana mabaka le bone.”
^ Seger., “A madi a lona a nne mo ditlhogong tsa lona.”
^ Go tewa mo sinagogeng.
^ Molaodi wa porofense ya kwa Roma. Bona Ditlhaloso Tsa Mafoko.
^ Bona Dintlha A5.
^ Kgotsa “a rutilwe ka molomo.”
^ Bona Dintlha A5.
^ Bona Ditlhaloso Tsa Mafoko.
