Esekiele 28:1-26
28 Jehofa o ne a bua le nna gape a re:
2 “Morwa motho, raya moeteledipele wa Ture o re, ‘Seno ke se Morena Molaodimogolo Jehofa a se buang:
“E re ka pelo ya gago e le mabela,+ o nna o re, ‘Nna ke modimo.
Ke nna mo setulong sa bogosi sa modimo mo gare ga lewatle.’+
Le fa go ntse jalo, o motho fela, ga o modimo,Le fa gone mo pelong ya gago o ipolelela gore o modimo.
3 O botlhale go feta Daniele.+
Ga go na diphiri dipe tse o sa kgoneng go di bona.
4 O ikhumisitse ka botlhale jwa gago le ka temogo ya gago,E bile o nna o ipolokela gauta le selefera mo mabolokelamatlotlong a gago.+
5 Bokgoni jwa gago jwa go dira kgwebo bo dirile gore o hume thata,+Mme pelo ya gago e ne ya nna mabela ka ntlha ya dikhumo tsa gago.”’
6 “‘Ka jalo, seno ke se Morena Molaodimogolo Jehofa a se buang:
“E re ka mo pelong ya gago o ipolelela gore o modimo,
7 Ke go tlisetsa batswakwa gore ba go tlhasele, e leng setšhaba se se setlhogo go gaisa ditšhaba tse dingwe,+Mme ba tla somola ditšhaka tsa bone ba bo ba kgemetha sengwe le sengwe se sentle se o se dirileng ka botlhale jwa gagoE bile ba tla dira gore kgalalelo ya gago e kgolo e se ka ya tlhola e nna boitshepo.+
8 Ba tla go folosetsa mo lebitleng,Mme o tla swa loso lo lo botlhoko mo lewatleng.+
9 A o sa ntse o tla raya yo o go bolayang o re, ‘Nna ke modimo’?
O tla bo o le motho fela mo seatleng sa ba ba go leswafatsang, o se modimo.”’
10 ‘Batswakwa ba tla go bolaya gore o swe jaaka batho ba ba sa rupang,Gonne nna ke buile,’ go bua Morena Molaodimogolo Jehofa.”
11 Mme Jehofa o ne a bua le nna gape a re:
12 “Morwa motho, opelela kgosi ya Ture pina ya khutsafalo, mme o mo reye o re, ‘Seno ke se Morena Molaodimogolo Jehofa a se buang:
“O ne o le sekao se se itekanetseng,O le botlhale thata+ e bile o le montle thata.+
13 O ne o le kwa Edene, kwa tshingwaneng ya Modimo.
O ne o kgabisitswe ka maje otlhe a a tlhwatlhwakgolo:
Rubi, topase le jasepere; kerusolete, onikise le jeide; safire, thekoise+ le emeraleda;Lengwe le lengwe la maje ano le ne le kgomareditswe ka gauta.
A ne a baakanngwa mo letsatsing le o neng wa bopiwa ka lone.
14 Ke ne ka go tlhoma gore o nne tšheruba e e tloditsweng e e sireletsang.
O ne o le mo thabeng ya Modimo e e boitshepo,+ e bile o ne o tsamayatsamaya mo gare ga maje a a tukang.
15 Go tloga mo letsatsing le o neng wa bopiwa ka lone, o ne o se na molato mo ditseleng tsa gagoGo fitlha o simolola go dira dilo tse di sa siamang.+
16 O ne wa tlala thubakanyo, e bile o ne wa simolola go leofa+Ka ntlha ya kgwebo ya gago e ntsi.+
Ka jalo, ke tla go ntsha mo thabeng ya Modimo ke go latlhela kwa ntle jaaka yo o itshekologileng ke bo ke go senya,+Wena tšheruba e e sireletsang, ke go latlhela kgakala le maje a a tukang.
17 Pelo ya gago e ne ya nna mabela ka gonne o le montle.+
O ne wa senya botlhale jwa gago ka ntlha ya kgalalelo ya gago e kgolo.+
Ke tla go latlhela mo lefatsheng.+
Ke tla dira gore dikgosi di go bogele.
18 O dirile gore mafelo a gago a a boitshepo a se ka a tlhola a nna boitshepo ka ntlha ya molato wa gago o mogolo le ka ntlha ya kgwebo e o e dirileng o sa ikanyege.
Ke tla dira gore go tswe molelo mo go wena, mme o tla go laila.+
Ke tla dira gore o nne melora fela mo lefatsheng fa pele ga botlhe ba ba go lebileng.
19 Botlhe ba ba neng ba go itse mo ditšhabeng ba tla go rotolela matlho ba gakgametse.+
Bokhutlo jwa gago bo tla tla ka tshoganyetso e bile bo le maswe thata,Mme ga o kitla o tlhola o nna teng ka bosakhutleng.”’”+
20 Mme Jehofa o ne a bua le nna gape a re:
21 “Morwa motho, lebisa sefatlhego sa gago kwa Sidona,+ mme o mmolelele molaetsa wa katlholo.
22 O mo reye o re, ‘Seno ke se Morena Molaodimogolo Jehofa a se buang:
“Jaanong ke fetogile mmaba wa gago, wena Sidona, mme ke tla galalediwa ka ntlha ya se se tla go diragalelang;Fa ke tla bo ke go otlhaya e bile ke go dirisa go bontsha gore ke Modimo yo o boitshepo, batho ba tla tshwanelwa ke go itse gore ke nna Jehofa.
23 Ke tla romela bolwetse jwa leroborobo mo go ene e bile madi a tla elela mo mebileng ya gagwe.
Batho ba tla wela mo go ene ba bolailwe setlhogo fa tšhaka e mo tlhasela go tswa mo matlhakoreng otlhe;Mme ba tla tshwanelwa ke go itse gore ke nna Jehofa.+
24 “‘“Foo Baiseraele ga ba kitla ba tlhola ba dikologiwa ke mmitlwa le mengana e e tlhabang botlhoko,+ e leng batho ba ba ba sotlang; mme batho ba tla tshwanelwa ke go itse gore ke nna Morena Molaodimogolo Jehofa.”’
25 “‘Seno ke se Morena Molaodimogolo Jehofa a se buang: “Fa ke phutha batho ba Iseraele gape ke ba ntsha mo ditšhabeng tse ba neng ba gasametse kwa go tsone,+ ke tla dira gore ditšhaba di bone gore ke Modimo yo o boitshepo.+ Mme Baiseraele ba tla nna mo lefatsheng la bone+ le ke neng ka le naya motlhanka wa me Jakobe.+
26 Ba tla nna mo go lone ba babalesegile+ mme ba tla aga matlo ba bo ba jala masimo a morara,*+ e bile ba tla nna ba babalesegile fa ke atlhola botlhe ba ba ba sotlang, ba ba ba dikologileng;+ mme ba tla tshwanelwa ke go itse gore ke nna Jehofa, Modimo wa bone.”’”
Dintlha Tse di Kwa Tlase
^ Kgotsa “diterebe; moretlwa.”
