Esekiele 33:1-33
33 Mme Jehofa o ne a nthaya a re:
2 “Morwa motho, bua le bomorwa batho ba gaeno,+ mme o ba reye o re,“‘A re re ke letla gore lefatshe lengwe le tlhaselwe,+ mme batho botlhe ba lefatshe leo ba bo ba tsaya monna mongwe ba mo tlhoma gore e nne molebeledi wa bone,
3 a bo a bona mmaba a tla mo lefatsheng leo a bo a letsa lonaka a tlhagisa batho.+
4 Fa mongwe a utlwa modumo wa lonaka mme a sa tseye tlhagiso tsia,+ mme mmaba a bo a tla a bo a mmolaya, e tla bo e le molato wa gagwe go bo a sule.*+
5 O utlwile modumo wa lonaka, mme ga a ka a tsaya tlhagiso eo tsia. E tla bo e le molato wa gagwe go bo a sule. Fa a ka bo a ile a reetsa tlhagiso, a ka bo a sa bolawa.
6 “‘Le fa go ntse jalo, fa molebeledi a bona mmaba a tla a bo a sa letse lonaka,+ batho ba bo ba sa utlwe tlhagiso epe mme mmaba a bo a tla a bo a bolaya mongwe wa bone, motho yoo o tla swa ka ntlha ya molato wa gagwe, le fa go ntse jalo, ke tla batla madi a gagwe mo molebeleding yoo.’*+
7 “Mme wena morwa motho, ke go tlhomile gore o nne molebeledi wa batho ba Iseraele; mme fa o utlwa lefoko le le tswang mo molomong wa me o tshwanetse go ba tlhagisa.+
8 Fa ke raya motho yo o bosula ke re, ‘Wena motho yo o bosula, ruri o tla swa!’+ mme o sa bue sepe go tlhagisa motho yo o bosula yoo gore a tlogele go dira dilo tse di bosula, o tla swa e le motho yo o bosula ka ntlha ya molato wa gagwe,+ mme ke tla batla madi a gagwe mo go wena.
9 Le fa go ntse jalo, fa o tlhagisa mongwe yo o bosula gore a tlogele go dira dilo tse di bosula mme a bo a gana go fetola tsela ya gagwe, o tla swa ka ntlha ya molato wa gagwe,+ mme wena o tla boloka botshelo* jwa gago.+
10 “Morwa motho, raya batho ba Iseraele o re, ‘Lo rile: “Botlhanogi jwa rona le maleo a rona di a re imela, di dira gore re nyelele;+ ka jalo re ka tswelela jang re tshela?”’+
11 Ba reye o re, ‘“Ke ikana ka nna,” go bua Morena Molaodimogolo Jehofa, “ga ke itumedisiwe ke loso lwa modirabosula,+ go na le moo ke itumedisiwa ke go bona modirabosula a tlogela tsela ya gagwe+ a bo a tswelela a tshela.+ Boang, tlogelang ditsela tsa lona tse di bosula,+ goreng lo tshwanetse go swa, lona batho ba Iseraele?”’+
12 “Morwa motho, raya bomorwa batho ba gaeno o re, ‘Ditiro tse di siameng tsa mosiami ga di kitla di mmoloka fa a simolola go tlhanoga;+ e bile ditiro tse di bosula tsa modirabosula ga di kitla di dira gore a nyelele fa a tlogela go dira bosula;+ e bile mo letsatsing la fa motho yo o siameng a leofa ga a kitla a tswelela a tshela ka ntlha ya ditiro tse di siameng tse a neng a di dira.+
13 Fa ke raya mosiami ke re: “Ruri o tla tswelela o tshela,” mme a bo a ikanya dilo tse di siameng tse a di dirileng a bo a dira se se sa siamang,*+ ga go na ditiro dipe tsa gagwe tse di siameng tse di tla gakologelwang, mme o tla swa ka ntlha ya bosula jo a bo dirileng.+
14 “‘Mme fa ke raya modirabosula ke re: “Ruri o tla swa,” a bo a tlogela boleo jwa gagwe mme a diragatsa tshiamiso e bile a dira se se siameng,+
15 mme motho yoo yo o bosula a busa selo se a neng a se neilwe e le peeletso+ e bile a duela dilo tse a di tsereng ka dikgoka,+ a bo a tsamaya mo melaong ya botshelo ka go tila go dira se se sa siamang, ruri o tla tswelela a tshela.+ Ga a kitla a swa.
16 Ga go na maleo ape a a a dirileng a a tla a atlholelwang.*+ O tla tswelela a tshela ka gonne a diragatsa tshiamiso e bile a dira se se siameng.’+
17 “Le fa go ntse jalo, bomorwa batho ba gaeno ba rile, ‘Tsela ya ga Jehofa ga e a tlhomama,’ mme gone tsela ya bone e le yone e e sa tlhomamang.
18 “Fa motho yo o siameng a tlogela go dira se se siameng a bo a dira se se sa siamang, o tla swa ka ntlha ya sone.+
19 Le fa go ntse jalo, fa motho yo o bosula a tlogela go dira bosula a bo a diragatsa tshiamiso e bile a dira se se siameng, o tla tswelela a tshela ka ntlha ya go dira jalo.+
20 “Mme lo rile, ‘Tsela ya ga Jehofa ga e a tlhomama.’+ Ke tla atlhola mongwe le mongwe wa lona go ya ka tsela e a itshwarang ka yone, lona batho ba Iseraele.”
21 La bofelo mo ngwageng wa bo12, mo kgweding ya bolesome, mo letsatsing la botlhano la kgwedi eo re le kwa botshwarwa, monna mongwe yo o neng a falotse kwa Jerusalema o ne a tla kwa go nna+ a bo a nthaya a re: “Motse o sentswe!”+
22 Jaanong maitseboa a pele ga fa monna yoo yo o falotseng a tla, seatla sa ga Jehofa se ne se ile sa tla mo go nna, mme o ne a ile a bula molomo wa me pele ga monna yoo a tla mo go nna mo mosong. Ka jalo, molomo wa me o ne wa bulega, mme ke ne ke sa tlhole ke le semumu.+
23 Foo Jehofa o ne a nthaya a re:
24 “Morwa motho, batho ba ba nnang mo maropeng ano+ ba bua ka lefatshe la Iseraele ba re, ‘Aborahame e ne e le motho a le mongwe fela, le fa go ntse jalo o ne a rua lefatshe.+ Mme rona re bantsi; ruri re neilwe lefatshe leno gore e nne la rona.’
25 “Ka jalo ba reye o re, ‘Seno ke se Morena Molaodimogolo Jehofa a se buang: “Lo ja dijo tse di nang le madi,+ e bile lo rapela medingwana ya lona e e ferosang sebete,* mme lo tswelela lo bolaya batho.+ Jaanong goreng lo tshwanetse go rua lefatshe leno?
26 Lo ikantse tšhaka ya lona,+ lo dira ditiro tse di makgapha, e bile mongwe le mongwe wa lona o dira boaka le* mosadi wa moagelani wa gagwe.+ Ka jalo, goreng lo tshwanetse go rua lefatshe leno?”’+
27 “O ba reye o re, ‘Seno ke se Morena Molaodimogolo Jehofa a se buang: “Ke ikana ka nna gore ba ba nnang mo maropeng ba tla bolawa ka tšhaka; ba ba mo nageng ke tla ba naya dibatana gore di ba je; mme ba ba mo dikagong tse di thata le mo dikgageng ba tla swa ka ntlha ya bolwetse.+
28 Ke tla dira gore lefatshe leno le kgakgabale,+ mme boikgantsho jwa lone bo tla fedisiwa, e bile dithaba tsa Iseraele di tla kgakgabala,+ go se na ope yo o di ralalang.
29 Mme ba tla tshwanelwa ke go itse gore ke nna Jehofa fa ke dira gore lefatshe leno le kgakgabale+ ka ntlha ya dilo tsotlhe tse di makgapha tse ba di dirileng.”’+
30 “Morwa motho, batho ba gaeno ba bua ka wena fa thoko ga dipota le mo dikgorong tsa matlo.+ Mongwe le mongwe o bua le morwarraagwe, ba raana ba re, ‘Tlaa, mme re utlwe lefoko le le tswang kwa go Jehofa.’
31 Ba tla phuthega gore ba nne fa pele ga gago jaaka batho ba me ba ne ba ka dira; mme ba tla utlwa mafoko a gago, le fa go ntse jalo ga ba kitla ba a diragatsa.+ Gonne ba go tsietsa ka se ba se buang,* mme dipelo tsa bone di gagamalela go huma ka boferefere.
32 Mo go bone o tshwana le pina ya lorato, e e opelwang ka lentswe le le monate e bile go lediwa seletswa sa megala ka botswerere. Ba tla utlwa mafoko a gago, le fa go ntse jalo, ga go na ope yo o tla a diragatsang.
33 Mme fa mafoko ao a diragala, ka gonne a tla diragala, ba tla tshwanelwa ke go itse gore moporofeti o ne a na le bone.”+
Dintlha Tse di Kwa Tlase
^ Seheb., “madi a gagwe a tla nna mo tlhogong ya gagwe.”
^ Kgotsa “ke tla dira gore molebeledi yoo a ikarabelele ka ntlha ya madi a gagwe.”
^ Seheb., “ne′phesh.” Bona Ditlhaloso Tsa Mafoko.
^ Kgotsa “a dira tshiamololo.”
^ Seheb., “a a tla gakolologelwang.”
^ Polelwana eno ka Sehebera e ka tswa e amana le lefoko le le kayang “boloko” mme e dirisitswe e le go bontsha letlhoo.
^ Seheb., “o leswafatsa.”
^ Kgotsa “ba bua dikeletso tse di fekeetsang.”
