Habakuke 3:1-19
3 Thapelo ya ga moporofeti Habakuke e le dipina tsa khutsafalo:
2 Ao tlhe Jehofa, ke begetswe ka wena.
Jehofa tiro ya gago e njesa kgakge.
E tsosolose fa dingwaga di ntse di tsamaya!*
E itsise fa dingwaga* di ntse di tsamayaO re gakologelwe e bile o re utlwele botlhoko ka nako ya dikhuduego.+
3 Modimo o ne a tswa kwa Temane,Modimo yo o Boitshepo o ne a tswa kwa Thabeng ya Parana.+ (Selah)*
Bogolo jwa gagwe bo ne jwa khurumetsa magodimo;+Lefatshe le ne la tlala pako ya gagwe.
4 O ne a phatsima jaaka lesedi.+
Marang a mabedi a ne a tsabakela a tswa mo seatleng sa gagwe,Kwa nonofo ya gagwe e neng e fitlhegile gone.
5 Bolwetse jwa leroborobo bo ne bo tsamaya kwa pele ga gagwe,+Mme letshoroma le le fisang le ne le mo setse morago.
6 O ne a ema fela a sa tshikinyege mme a tshikinya lefatshe.+
O ne a dira gore ditšhaba di tshoge ka go di leba fela.+
Dithaba tse di sa bolong go nna teng di ne tsa thubaganngwa,Le dithota tsa kgale di ne tsa obega.+
Tseno ke ditsela tsa gagwe go tloga bogologolong.
7 Ke ne ka bona matshwenyego mo ditenteng tsa Kushane.
Matsela a ditente a lefatshe la Midiana a ne a roroma.+
8 Ao tlhe Jehofa, a o galefetse dinoka,A bogale jwa gago bo tukela dinoka,Kgotsa a o shakgaletse lewatle?+
Gonne o ne wa palama dipitse tsa gago;+Dikara tsa gago di ne tsa fenya.*+
9 O ntshitse bora jwa gago e bile o ipaakanyeditse go hula ka jone.
Dithobane* di abilwe ka maikano.* (Selah)
O ne wa kgaoganya lefatshe ka dinoka.
10 Dithaba di ne tsa kgaratlha di le mo ditlhabing fa di go bona.+
Pula e kgolo e ne ya gogola.
Metsi a a boteng a ne a kurutla ka lentswe le le kwa godimo.+
A ne a tsholeletsa diatla tsa one kwa godimo.
11 Letsatsi le ngwedi di ne tsa ema fela di sa tshikinyege mo mafelong a tsone.+
Metswi ya gago e ne ya tswa jaaka lesedi.+
Lerumo la gago le ne la phatsima jaaka legadima.
12 O ne wa gwanta go ralala lefatshe o galefile.
O ne wa gataka* ditšhaba o shakgetse.
13 O ne wa tswa o ya go boloka batho ba gago, o ya go boloka motlodiwa wa gago.
O ne wa thubaganya yo o eteletseng pele* mo ntlong ya badirabosula.
Ntlo e ne ya senngwa go simologa kwa motheong go ya go fitlha kwa godimo.* (Selah)
14 O ne wa tlhaba tlhogo ya batlhabani ba gagwe ka dibetsa* tsa gagweFa ba ne ba betsega gore ba nkgasamise.
Ba ne ba itumeletse go kometsa motho yo o bogisiwang mo sephiring.
15 O ne wa ralala lewatle ka dipitse tsa gago,O ne wa ralala metsi a mantsintsi a a bilogang.
16 Ke ne ka utlwa seno mme ka roroma mo teng;*
Molomo wa me o ne wa roroma fa ke utlwa modumo.
Marapo a me a ne a simolola go bola;+Maoto a me a ne a roroma.
Mme ke ne ka letela letsatsi la matshwenyego ka tidimalo,+Ka gonne le tlela batho ba ba re tlhaselang.
17 Le fa setlhare sa mofeige se ka nna sa se ka sa ntsha malômô,*E bile go ka nna ga se ka ga nna le maungo mo ditlhareng tsa morara;*Le fa setlhare sa motlhware se ka nna sa tlhoka maungo,Le masimo a ka nna a se ka a ntsha dijo;Le fa letsomane le ka nna la nyelela mo lesakeng,E bile go ka nna ga se ka ga nna le dikgomo mo masakeng;
18 Nna ke tla itumela ka ntlha ya ga Jehofa;Ke tla itumela ka ntlha ya Modimo yo o re bolokang.+
19 Morena Molaodimogolo Jehofa ke nonofo ya me;+O tla dira gore dinao tsa me di tshwane le tsa kgamaE bile o tla dira gore ke gate mo mafelong a a kwa godimo.+
Dintlha Tse di Kwa Tlase
^ Kgotsa gongwe “E itsise mo motlheng wa rona.”
^ Kgotsa gongwe “E itsise mo motlheng wa rona.”
^ Bona Ditlhaloso Tsa Mafoko.
^ Kgotsa “e ne e le poloko.”
^ Kgotsa gongwe “Metswi.”
^ Kgotsa gongwe “Maikano a ditso a builwe.”
^ Seheb., “photha.”
^ Seheb., “tlhogo.”
^ Seheb., “kwa molaleng.”
^ Seheb., “dithobane.”
^ Seheb., “mme mpa ya me ya roroma.”
^ Kgotsa “dithunya.”
^ Kgotsa “diterebe; moretlwa.”
