Isaia 44:1-28
44 “Jaanong reetsa, wena Jakobe motlhanka wa me,Le wena Iseraele, yo ke go tlhophileng.+
2 Seno ke se Jehofa a se buang,Modiri wa gago, Ene yo o go bopileng,+Yo o neng a go thusa fa e sa le o tswa mo popelong:*
‘O se ka wa boifa, wena motlhanka wa me Jakobe,+Le wena Jeshurune,*+ yo ke go tlhophileng.
3 Gonne ke tla tshelela motho yo o nyorilweng* metsi,+E bile ke tla dira gore melatswana e elele mo nageng e e omeletseng.
Ke tla tshololela moya wa me mo losikeng lwa gago+Le ditshegofatso tsa me mo ditlogolwaneng tsa gago.
4 Mme ba tla tlhoga jaaka e kete ba tlhoga mo bojannyeng jo botala,+Jaaka ditlhare tsa modibonoka tse di fa melatswaneng ya metsi.
5 Mongwe o tla re: “Nna ke wa ga Jehofa.”+
Yo mongwe o tla ipitsa ka leina la ga Jakobe,Mme yo mongwe ene o tla kwala jaana mo seatleng sa gagwe: “Wa ga Jehofa.”
Mme o tla ipitsa ka leina la Iseraele.’
6 Seno ke se Jehofa a se buang,Kgosi ya Iseraele+ le Morekolodi+ wa gagwe, e bong Jehofa wa masomosomo:
‘Ke nna wa ntlha e bile ke nna wa bofelo.+
Ga go na Modimo ope ntle le nna.+
7 Ke mang yo o tshwanang le nna?+
A a tlhaeletse mme a bolele a bo a mpontshe bosupi jwa seo.+
Go tloga ka nako ya fa ke ne ke tlhoma batho ba bogologolo,A ba bolele dilo tse di tla tlangLe tse di sa ntseng di tla direga.
8 Lo se ka lwa boifa,E bile lo se ka lwa aparelwa ke letshogo.+
A ga ke a ka ka bolelela mongwe le mongwe wa lona ka bo ka lo itsise?
Lo basupi ba me.+
A go na le Modimo yo mongwe ntle le nna?
Nnyaa, ga go na Lefika+ le lengwe; ga ke itse lepe.’”
9 Botlhe ba ba dirang ditshwantsho tse di betlilweng ga ba na mosola,E bile ditshwantsho tsa bone tse ba di ratang thata ga di kitla di ba tswela mosola.+
Fela jaaka basupi ba tsone, ga di bone sepe e bile ga di itse sepe,+Ka jalo, ba ba di dirileng ba tla tlhabiwa ke ditlhong.+
10 Ke mang yo o ka dirang bomatla ka go bopa modimo kgotsa ka go dira setshwantsho* se se bopilwengSe se se nang mosola ope?+
11 Botlhe ba ba itsalanyang le ene ba tla tlhabiwa ke ditlhong.+
Babetli ba teng ke bathonyana fela.
A botlhe ba phuthege mme ba eme mo maemong a bone.
Ba tla tshoga e bile botlhe ba tla tlhabiwa ke ditlhong.
12 Mothudi wa tshipi o tsenya tshipi mo magaleng a dirisa sedirisiwa sa gagwe.
O e betsabetsa ka dihamore* a e bopa,A dirisa lebogo la gagwe le le maatla.+
Go tswa foo o tshwarwa ke tlala a bo a felelwa ke nonofo;Ga a nwe metsi e bile o a lapa.
13 Mmetli wa logong o otlolola thapo e e lekanyang, o thalela setshwantsho se a tlileng go se dira ka tšhoko e khibidu.
O se gotlha ka sefadi se se gotlhang logong a bo a se thalela ka khampase.
O se dira gore se bopege jaaka motho,+Se nne sentle jaaka motho,Gore se nne mo ntlong.*+
14 Go na le motho yo tiro ya gagwe e leng go rema masedara.
O tlhopha setlhare sa mofuta mongwe, e leng setlhare sa moakere,*Mme o se tlogela gore se gole thata mo gare ga ditlhare tsa sekgwa.+
O jala setlhare sa motalafadi, mme pula e a se godisa.
15 Go tswa foo, motho o gotsa molelo ka sone.
O tsaya dikgong dingwe tsa setlhare seo gore a ithuthafatse;O gotsa molelo a bo a besa senkgwe.
Mme gape o dira modimo ka sone a bo a o obamela.
O dira setshwantsho se se betlilweng ka sone a bo a ikoba fa pele ga sone.+
16 O fisa halofo ya dikgong tseo mo molelong;Ka yone halofo eo, o besa nama, o a e ja a bo a kgora.
Gape o a ithuthafatsa a bo a re:
“Aha! Molelo ke ono o tla nthutafatsa.”
17 Mme o dira modimo ka dikgong tse di setseng, o dira setshwantsho se se betlilweng ka tsone.
O ikoba fa pele ga sone a bo a se obamela.
O a se rapela a bo a re:
“Mpoloke, ka gonne o modimo wa me.”+
18 Ga ba itse sepe, ga ba tlhaloganye sepe,+Ka gonne matlho a bone a tswalegile e bile ga ba kgone go bona,Le dipelo tsa bone ga di na temogo.
19 Ga go na ope yo o akanyang mo pelong ya gagweKgotsa yo o nang le kitso kgotsa tlhaloganyo ya gore a ipotse a re:
“Ke fisitse halofo ya dikgong mo molelong,E bile ke ne ka besa senkgwe le nama mo magaleng a tsone gore ke je.
A jaanong ke tshwanetse go dirisa dikgong tse di setseng go dira selo se se makgapha?+
A ke tshwanetse go obamela logong* lwa setlhare?”
20 O ja melora fela.
Pelo ya gagwe e e tsietsegileng e mo timeditse.
Ga a ka ke a ikgolola, e bile ga a re:
“Ke na le selo se se se nang mosola mo seatleng sa moja.”
21 “Gakologelwa dilo tseno, wena Jakobe, le wena Iseraele,Gonne o motlhanka wa me.
Ke go bopile e bile o motlhanka wa me.+
Wena Iseraele, ga nkitla ke go lebala.+
22 Ke tla tlosa melato ya gago jaaka e kete ke e khurumetsa ka leru,+E bile ke tla tlosa maleo a gago jaaka e kete ke a khurumetsa ka leru le le kwenneng.
Boela kwa go nna, ka gonne ke tla go rekolola.+
23 “Goang ka boitumelo, lona magodimo,Gonne Jehofa o tseregantse!
Goang ka ntlha ya phenyo, lona dikarolo tse di kwa tengteng tsa lefatshe!
Goang ka boitumelo lona dithaba,+Wena sekgwa, le ditlhare tsotlhe tsa gago!
Gonne Jehofa o rekolotse Jakobe,E bile o bontsha bontle jwa gagwe mo Iseraele.”+
24 Seno ke se Jehofa a se buang, Morekolodi+ wa gago,Yo o neng a go bopa fa o ne o le mo popelong:
“Ke nna Jehofa, yo o dirileng sengwe le sengwe.
Ke ne ka tsharolola magodimo ke le nosi,+E bile ke ne ka phutholola lefatshe.+
Ke mang yo o neng a na le nna?
25 Ke kgoreletsa ditshupo tsa ba ba buang dilo tse di se nang mosola,*E bile ke Nna yo o dirang gore ba ba dirang tiro ya boitseanape ba itshware jaaka dieleele;+Ene yo o tlhakanyang banna ba ba botlhale tlhogoLe yo o fetolang kitso ya bone gore e nne boeleele;+
26 Ene yo o dirang gore lefoko la motlhanka wa gagwe le diragaleLe yo o diragatsang ka botlalo dipolelelopele tsa barongwa ba gagwe;+Ene yo o buang ka Jerusalema a re, ‘O tla nniwa,’+Le yo o buang ka metse ya Juda a re, ‘E tla agiwa sesha,+E bile ke tla tsosolosa matlotla a gagwe’;+
27 Ene yo o rayang metsi a a boteng a re, ‘Kgala,E bile ke tla kgadisa dinoka tsa gago tsotlhe’;+
28 Ene yo o buang ka Kurose+ a re, ‘Ke modisa wa me,E bile o tla diragatsa ka botlalo sotlhe se ke se ikaeletseng’;+Ene yo o buang ka Jerusalema a re, ‘O tla agiwa sesha,’
Le yo o buang ka tempele a re, ‘Motheo wa gago o tla thaiwa.’”+
Dintlha Tse di Kwa Tlase
^ Kgotsa “fa e sa le o tsholwa.”
^ Mo go kayang “Yo o Siameng,” sereto sa tlotlo se Iseraele a bidiwang ka sone.
^ Kgotsa “naga e e omeletseng.”
^ Kgotsa “sefikantswe.”
^ Kgotsa “dihamole.”
^ Kgotsa “mo lefelong la kobamelo.”
^ Mofuta mongwe wa ditlhare tse dikgolo. Ka Seesemane se bidiwa oak.
^ Kgotsa “logong lo lo omeletseng.”
^ Kgotsa “tsa baporofeti ba maaka.”
