Lekwalo la ga Jakobe 4:1-17
4 Ke eng se se bakang dikganetsano le dintwa fa gare ga lona? A ga di bakwe ke dikeletso tsa lona tsa bopelotshetlha tse di lo laolang?*+
2 Lo a eletsa, le fa go ntse jalo ga lo nne le sepe. Lo nna lo bolaya batho e bile lo pelotshetlha, le fa go ntse jalo ga lo kgone go bona sepe. Lo tswelela lo tlhabana e bile lo a lwa.+ Ga lo na sepe ka gonne ga lo kope.
3 Fa lo kopa ga lo amogele, ka gonne lo kopa ka boikaelelo jo bo sa siamang, gore lo kgotsofatse dikeletso tsa lona tsa bopelotshetlha.
4 Lona batho ba ba sa ikanyegeng,* a ga lo itse gore go itsalanya le lefatshe go dira gore lo nne baba ba Modimo? Ka jalo, ope fela yo o batlang go nna tsala ya lefatshe o itira mmaba wa Modimo.+
5 Kgotsa a lo akanya gore lokwalo lo bua jaana kwantle ga lebaka: “E re ka re na le go nna le lefufa, re na le mokgwa wa go eletsa dilo tse di farologaneng ka metlha.”+
6 Le fa go ntse jalo, bopelonomi jo bogolo* jo a bo abang bo bogolo thata. Ka jalo, lokwalo lwa re: “Modimo ga a itumelele batho ba ba mabela,+ mme o naya ba ba ikokobeditseng bopelonomi jo bogolo.”+
7 Ka jalo ikobeleng Modimo;+ ganetsang Diabolo,+ mme o tla lo tshaba.+
8 Atamelang Modimo, mme o tla lo atamela.+ Tlhapang diatla tsa lona, lona baleofi,+ e bile lo itshekise dipelo tsa lona,+ lona ba lo sa kgoneng go dira ditshwetso.
9 Utlwang botlhoko, hutsafalang lo bo lo lele.+ A setshego sa lona se fetoge khutsafalo, le boitumelo jwa lona bo fetoge kutlobotlhoko.
10 Ikokobetseng fa pele ga ga Jehofa,*+ mme o tla lo godisa.+
11 Bakaulengwe, tlogelang go kgalana.+ Ope fela yo o kgalang mokaulengwe kgotsa yo o atlholang mokaulengwe wa gagwe o kgala molao e bile o atlhola molao. Jaanong fa o atlhola molao, o moatlhodi mme ga o tlhole o diragatsa molao.
12 Go na le motho a le mongwe yo e leng Moneimolao e bile e le Moatlhodi,+ ene yo o kgonang go boloka le go senya.+ Mme wena, o mang go bo o atlhola moagelani wa gago?+
13 Jaanong, reetsang lona ba lo reng: “Gompieno kgotsa kamoso re tla ya kwa motseng ono, re tla nna ngwaga gone, mme re tla dira kgwebo re bo re dira madi,”+
14 mme lo sa itse gore botshelo jwa lona bo tla nna jang kamoso.+ Gonne lo mouwane o o bonalang ka nakwana mme go tswa foo o bo o nyelela.+
15 Go na le moo, lo tshwanetse go re: “Fa Jehofa* a rata,+ re tla tshela re bo re dira seno kgotsa sele.”
16 Mme jaanong lo a ikgogomosa fa lo ntse lo ikgantsha thata. Go ikgantsha jalo ga go a siama.
17 Ka jalo, fa mongwe a itse se se siameng mme a sa se dire, o dira boleo.+
Dintlha Tse di Kwa Tlase
^ Seger., “ditokololo tsa lona.”
^ Seger., “Basadi ba baakafadi.”
^ Bona Ditlhaloso Tsa Mafoko.
^ Bona Dintlha A5.
^ Bona Dintlha A5.
