Jeremia 16:1-21
16 Jehofa o ne a bua le nna gape a re:
2 “O se ka wa nyala, e bile o se ka wa nna le bana ba basimane le ba basetsana mo lefelong leno.
3 Gonne seno ke se Jehofa a se buang ka ga bana ba basimane le ba basetsana ba ba tsholelwang fano, le ka ga bommaabone ba ba ba belegang le ka ga borraabone ba ba dirang gore ba tsholwe mo lefatsheng leno:
4 ‘Ba tla bolawa ke malwetse a a kotsi,+ mme ga go kitla go nna le ope yo o ba hutsafalelang kgotsa yo o ba fitlhang; ba tla nna jaaka motshotelo mo godimo ga mmu.+ Ba tla bolawa ka tšhaka e bile ba tla bolawa ke leuba,+ mme ditopo tsa bone di tla jewa ke dinonyane tsa magodimo le dibatana tsa lefatshe.’
5 Gonne seno ke se Jehofa a se buang,‘O se ka wa tsena mo ntlong ya batho ba ba hutsafetseng,E bile o se ka wa ya go lela le bone kgotsa wa ba utlwela botlhoko.’+
‘Gonne ke tlositse kagiso ya me mo bathong bano,’ go bua Jehofa,‘Mmogo le lorato lwa me lo lo sa kgaotseng le kutlwelobotlhoko ya me,+
6 Ba bagolo mmogo le ba babotlana ba tla swela mo lefatsheng leno.
Ga ba kitla ba fitlhwa,Ga go na ope yo o tla ba hutsafalelang,E bile ga go na ope yo o tla itshegakang kgotsa yo o tla itirang lefatla ka ntlha ya bone.*
7 Mme ga go na ope yo o tla abelang ba ba hutsafetseng dijo,Gore a ba gomotse ka gonne ba swetswe;E bile ga go na ope yo o tla ba nayang kopi e e nang le beine e e ka ba gomotsangGore ba nwe ka gonne ba swetswe ke rre kgotsa mmê.
8 Mme o se ka wa tsena mo ntlong ya moketeWa nna fa fatshe le bone gore o je o bo o nwe.’
9 “Gonne seno ke se Jehofa wa masomosomo, Modimo wa Iseraele, a se buang: ‘Jaanong ke tla fedisa modumo wa boitumelo le wa go ipela, lentswe la monyadi le lentswe la monyadiwa mo lefelong leno, mo motlheng wa lona le fa pele ga matlho a lona.’+
10 “Fa o bolelela batho bano mafoko ano otlhe ba tla go botsa ba re, ‘Ke ka ntlha yang fa Jehofa a buile gore o tla re tlisetsa masetlapelo ano a magolo? Re diretse Jehofa, Modimo wa rona molato ofe le boleo bofe?’+
11 O ba arabe o re, ‘Jehofa a re, “Ke ka gonne borraalonamogolo ba ne ba ntlogela,+ mme ba tswelela ba sala medimo e mengwe morago e bile ba e direla le go e ikobela.+ Mme ba ne ba ntlogela, e bile ga ba a ka ba ikobela molao wa me.+
12 Mme lona lo dirile bosula jo bogolo thata go feta borraalonamogolo,+ e bile mongwe le mongwe wa lona o sala pelo ya gagwe e e bosula morago ka botlhogoethata go na le go inkobela.+
13 Ka jalo, ke tla lo ntsha mo lefatsheng leno ke lo latlhela kwa lefatsheng le lona kgotsa borraalonamogolo lo iseng lo ke lo le itse,+ mme fa lo le koo, lo tla tshwanelwa ke go direla medimo e mengwe bosigo le motshegare,+ ka gonne ga nkitla ke lo utlwela botlhoko.”’
14 “Jehofa a re, ‘Le fa go ntse jalo, metlha e etla, e ba se kitlang ba tlhola ba re: “Re ikana ka Jehofa Modimo yo o tshelang, yo o neng a ntsha batho ba Iseraele kwa lefatsheng la Egepeto!”+
15 mme ba tla re: “Re ikana ka Jehofa Modimo yo o tshelang, yo o neng a ntsha batho ba Iseraele kwa lefatsheng la bokone le kwa mafatsheng otlhe a a neng a ba phatlalaleditse kwa go one!” mme ke tla ba busetsa mo lefatsheng la bone, le ke neng ka le naya borraabonemogolo.’+
16 ‘Jaanong ke romela batshwaraditlhapi ba le bantsi,’ go bua Jehofa,‘Mme ruri ba tla ba tshwara jaaka fa ba tshwara ditlhapi.
Morago ga moo ke tla romela batsomi ba le bantsi,Mme ba tla ba tsoma mo thabeng nngwe le nngwe le mo thoteng nngwe le nngweLe mo diphatlheng tsa mafika.
17 Gonne matlho a me a bona sengwe le sengwe se ba se dirang.*
Se ntse se sa mphitlhegela,E bile matlho a me a ntse a bona molato wa bone.
18 Sa ntlha, ke tla ba duela tuelo e e tletseng go ya ka molato wa bone le boleo jwa bone,+Gonne ba dirile gore lefatshe la me le se ka la nna boitshepo ka ditshwantsho tse di sa tsheleng* tsa medingwana ya bone e e ferosang sebeteE bile ba tladitse boswa jwa me ka dilo tsa bone tse di makgapha.’”+
19 Jehofa, o nonofo ya me le kago ya me e e thata,Lefelo le ke tshabelang kwa go lone ka nako ya matshwenyego,+Ditšhaba di tla tla kwa go wena di tswa kwa dikhutlong tsa lefatshe,Mme di tla re: “Borraaronamogolo ba ne ba ruile medimo ya maaka,*Lefela le dilo tse di se nang mosola tse di sa thuseng ka sepe.”+
20 A motho a ka itirela medimoMme tota e se medimo?+
21 “Ka jalo, ke tla dira gore ba itse,Ka nako eo, ke tla dira gore ba lemoge maatla a me le nonofo ya me,Mme ba tla tshwanelwa ke go itse gore leina la me ke Jehofa.”
Dintlha Tse di Kwa Tlase
^ Mekgwa ya boheitane ya go hutsafala e gongwe e neng e dirwa ke Baiseraele ba ba tlhanogileng.
^ Seheb., “a mo ditseleng tsotlhe tsa bone.”
^ Seheb., “ka ditopo.”
^ Seheb., “ba ne ba ruile maaka.”
