Jeremia 24:1-10
-
Difeige tse di siameng le tse di sa siamang (1-10)
24 Go tswa foo, Jehofa o ne a mpontsha dimmanki tse pedi tsa difeige di beilwe fa pele ga tempele ya ga Jehofa, fa Kgosi Nebukadenesare* wa Babelona a sena go tsaya Jekonia*+ morwa Jehoiakime,+ kgosi ya Juda, mmogo le dikgosana tsa Juda, badiri ba ba ditswerere le badirakatshipi* a bo a ba isa botshwarwa; o ne a ba tsaya mo Jerusalema mme a ba isa kwa Babelona.+
2 Mmanki o mongwe o ne o na le difeige tse di siameng, tse di tshwanang le difeige tsa mabutswapele, mme mmanki o mongwe o ne o na le difeige tse di sa siamang gotlhelele, di sa siama mo di neng di ka se ka tsa jewa.
3 Foo Jehofa o ne a mpotsa jaana: “Jeremia, o bona eng?” Ka jalo, ke ne ka re: “Difeige; difeige tse di siameng di siame thata, mme tse di sa siamang tsone, ga di a siama gotlhelele mo e leng gore di ka se jewe.”+
4 Go tswa foo, Jehofa o ne a nthaya a re:
5 “Jehofa, Modimo wa Iseraele a re, ‘Fela jaaka difeige tseno tse di siameng, ke tla leba batshwarwa ba Juda ba ke ba ntshitseng mo lefelong leno ke ba isa kwa lefatsheng la Bakaladia, ba le molemo.
6 Ke tla nna ke ba tlhomile matlho ka gonne ba siame, mme ke tla ba busetsa mo lefatsheng leno.+ Ke tla ba aga, mme ga ke nkitla ke ba rutlolola; ke tla ba jala, mme ga nkitla ke ba kumola.+
7 Ke tla dira gore ba eletse go nkitse sentle, ba itse gore ke nna Jehofa.+ Ba tla nna batho ba me, mme nna ke tla nna Modimo wa bone,+ ka gonne ba tla boela mo go nna ka pelo yotlhe.+
8 “‘Mme seno ke se Jehofa a se buang ka difeige tse di sa siamang mo di ka se kang tsa jewa:+ “Eo ke tsela e ke tla lebang Kgosi Sedekia+ wa Juda, dikgosana tsa gagwe, masalela a Jerusalema a a setseng mo lefatsheng leno le ba ba nnang mo lefatsheng la Egepeto ka yone.+
9 Ke tla dira gore magosi otlhe a lefatshe a tshoge fa a bona masetlapelo a ke ba tlisetsang one.+ Batho ba tla ba kgoba; ba tla bua ka bone e le sekao sa batho ba ba wetsweng ke masetlapelo; batho ba tla ba sotla e bile ba tla hutsiwa+ gongwe le gongwe kwa ke ba phatlalaletsang gone.+
10 Mme ke tla letla gore ba bolawe ke tšhaka,+ ke leuba le bolwetse jwa leroborobo+ go fitlha ba nyelela mo lefatsheng le ke le neileng bone le borraabonemogolo.”’”
Dintlha Tse di Kwa Tlase
^ Seheb., “Nebukaderesare,” tsela e nngwe ya go le kwala.
^ Gape o bidiwa Jehoiakine le Konia.
^ Kgotsa gongwe “baagi ba dithako tsa phemelo.”
