Jeremia 3:1-25
3 Batho ba botsa jaana: “Fa monna a ka koba mosadi wa gagwe mme mosadi yoo a bo a tsamaya a mo tlogela a nyalwa ke monna yo mongwe, a monna yoo o tshwanetse go boela kwa go ene gape?”
A lefatshe leo ga le a kgotlelwa?+
“O dirile boaka le balekane ba le bantsi,+A jaanong o tshwanetse go boela mo go nna?” go bua Jehofa.
2 “Tsholeletsa matlho a gago kwa dithoteng tse di sa tlhogang sepe mme o bone.
Ke fa kae fa o sa betelelwang teng?
O ne wa ba emela fa thoko ga ditsela,Jaaka mokgarakgatshegi* mo nageng.
O nna o kgotlela lefatsheKa ditiro tsa gago tsa boaka le ka bosula jwa gago.+
3 Ka jalo, dipula tsa medupe di thibetswe,+E bile pula ya dikgakologo ga e a na.
O itshwara jaaka* mosadi yo o dirang boaka;O ganne go ipona molato.+
4 Mme jaanong o goela kwa go nna o re,‘Rre, o tsala ya me go tswa bosheng jwa me!+
5 A motho o tshwanetse go nna a kgopisegile ka bosakhutleng,Kgotsa a nnele go tshwara sekgopi?’
O bua jalo,Mme o tswelela o dira bosula jotlhe jo o kgonang go bo dira.”+
6 Mo motlheng wa ga kgosi Josia,+ Jehofa o ne a nthaya a re: “‘A o bone se Iseraele yo o sa ikanyegeng a se dirileng? O ile kwa godimo ga thaba nngwe le nngwe e e kwa godimo, le ka fa tlase ga setlhare sengwe le sengwe se segolo gore a dire boaka.+
7 Tota le morago ga gore a dire dilo tseno tsotlhe, ke ne ke nna ke mo raya ke re a boele kwa go nna,+ le fa go ntse jalo ga a ka a boa; mme Juda o ne a nna a lebile mogolowe wa leferefere.+
8 E rile ke bona seo, ka neela Iseraele yo o sa ikanyegeng lekwalo la tlhalo+ mme ka mo tsamaisa ka ntlha ya boaka jwa gagwe.+ Mme monnawe wa leferefere e bong Juda ga a ka a boifa; le ene o ne a tsamaya a ya go dira boaka.+
9 O ne a tsaya boaka jwa gagwe e le selo se se sa reng sepe, e bile o ne a nna a kgotlela lefatshe a bo a dira boaka le maje le ditlhare.+
10 Le fa gone monnawe wa leferefere e bong Juda a sena go bona dilo tseno tsotlhe, ga a ka a boela mo go nna ka pelo yotlhe, fa e se ka boitimokanyi fela,’ go bua Jehofa.”
11 Go tswa foo, Jehofa o ne a nthaya a re: “Iseraele yo o sa ikanyegeng o itshupile a siame go feta Juda wa leferefere.+
12 Tsamaya, mme o bolele mafoko ano kwa bokone:+
“‘“Boa wena Iseraele wa motlhanogi,” go bua Jehofa.’+ ‘“Ga nkitla ke lo galefela,*+ ka gonne ke a ikanyega,” go bua Jehofa.’ ‘“Ga nkitla ke nna ke kgopisegile ka bosakhutleng.
13 Lemogang molato wa lona, ka gonne lo tlhanogetse Jehofa, Modimo wa lona. Lo tswelela lo tlhakanela dikobo le batswakwa* ka fa tlase ga setlhare sengwe le sengwe se segolo, mme ga lo reetse lentswe la me,” go bua Jehofa.’”
14 “Boang, lona barwa ba ba tlhanogileng,” go bua Jehofa. “Gonne ke mong wa lona* wa mmatota; mme ke tla lo tsaya, a le mongwe go tswa mo motseng le ba babedi go tswa mo lelapeng, ke bo ke lo tlisa mo Siona.+
15 Ke tla lo naya badisa ba ba dirang go dumalana le thato ya me,*+ mme ba tla lo fepa ka kitso le temogo.
16 Lo tla nna bantsi e bile lo tla ata mo lefatsheng mo metlheng eo,” go bua Jehofa.+ “Ga lo kitla lo tlhola lo re, ‘Letlole la kgolagano ya ga Jehofa!’ Ga le kitla le tla mo pelong, e bile ga lo kitla lo le gakologelwa kgotsa lo le tlhologelelwa, e bile letlole leo ga le kitla le tlhola le dirwa gape.
17 Ka nako eo, lo tla bitsa Jerusalema setulo sa bogosi sa ga Jehofa;+ mme ditšhaba tsotlhe di tla phuthelwa kwa leineng la ga Jehofa kwa Jerusalema,+ mme ga lo kitla lo tlhola lo latelela pelo ya lona e e bosula ka botlhogoethata.”
18 “Mo metlheng eo, batho ba Juda le batho ba Iseraele ba tla tsamaya mmogo ba bapile,+ mme ba tla tswa mmogo mo lefatsheng la bokone ba bo ba tsena mo lefatsheng le ke le neileng borraalonamogolo e le boswa.+
19 Mme ke ne ka ithaya ka re, ‘Ruri ke lo tsentse mo go bomorwaake ka bo ka lo naya lefatshe le le eletsegang, boswa jo bontle thata mo ditšhabeng!’*+ Gape ke ne ka ithaya ka re lo tla goela kwa go nna lo re, ‘Rre!’ e bile ke ne ka ithaya ka re ga lo kitla lo fapoga lo tlogela go ntshala morago.
20 ‘Fela jaaka mosadi a tlogela monna* wa gagwe ka boferefere, le lona Baiseraele lo ntiretse ka boferefere,’+ go bua Jehofa.”
21 Go utlwala modumo mo dithoteng tse di sa tlhogang sepe,Selelo le boikuelo jwa batho ba Iseraele,Gonne ba sokamisitse tsela ya bone;Ba lebetse Jehofa, Modimo wa bone.+
22 “Boang, lona barwa ba ba tlhanogileng.
Ke tla lo fodisa mme ga lo kitla lo ntlhanogela.”+
Ruri re tla re: “Re fano! Re tlile kwa go wena,Gonne wena Jehofa, o Modimo wa rona.+
23 Re ne re itsietsa fa re ne re tsosa modumo mo dithoteng le mo dithabeng.+
Ruri poloko ya Iseraele e mo go Jehofa, Modimo wa rona.+
24 Mme selo se se tlhabisang ditlhong* se tsere sengwe le sengwe se borraaronamogolo ba se bereketseng ka natla go tswa bosheng jwa rona,+Se tsere matsomane a bone le metlhape ya bone,Bomorwaabone le bomorwadiabone.
25 A re rapameng, re tlhabilwe ke ditlhong,E bile a go tlontlologa ga rona go re khurumetse,Gonne re leofetse Jehofa, Modimo wa rona,+Rona le borraarona go tloga bosheng jwa rona go tla go fitlha mo letsatsing leno,+Mme ga re a reetsa lentswe la ga Jehofa, Modimo wa rona.”
Dintlha Tse di Kwa Tlase
^ Seheb., “Moarabia.”
^ Seheb., “Phatla ya gago e tshwana le ya.”
^ Seheb., “Ga nkitla ke dira gore sefatlhego sa me se lo wele.”
^ Kgotsa “medimo e sele.”
^ Kgotsa gongwe “monna wa lona.”
^ Seheb., “le pelo ya me.”
^ Seheb., “boswa jwa masole a ditšhaba.”
^ Seheb., “molekane.”
^ Kgotsa “modimo yo o tlhabisang ditlhong.”
