Jeremia 48:1-47
-
Boporofeti ka se se tla diragalelang Moabe (1-47)
48 Seno ke se Jehofa wa masomosomo, Modimo wa Iseraele, a se buang ka ga Moabe:+
“Ruri go latlhega Nebo,+ ka gonne o fedisitswe!
Kiriathaime+ o tlhabisitswe ditlhong e bile o gapilwe.
Lefelo la botshabelo le le sireletsegileng* le tlhabisitswe ditlhong e bile le thubagantswe.+
2 Ga ba tlhole ba baka Moabe.
Kwa Heshebone+ ba mo logetse leano la go mo diga ba re:
‘Tlang, a re mo fediseng gore a se tlhole a nna setšhaba.’
Le wena Matemene, o tshwanetse go didimala,Gonne tšhaka e go setse morago.
3 Go na le modumo wa selelo go tswa kwa Horonaime,+Wa go senngwa le go gosomana mo gogolo.
4 Moabe o sentswe.
Bana ba gagwe ba bannye ba a lela.
5 Ba lela ba sa kgaotse fa ba ntse ba tlhatloga thotana ya Luhithe.
Mme fa ba le mo tseleng e e tswang kwa Horonaime ba utlwa selelo sa masetlapelo ka ntlha ya tshenyego e e diregileng.+
6 Tshabang, falotsang botshelo* jwa lona!
Lo tshwanetse go nna jaaka setlhare sa mofira mo nageng.
7 E re ka o ikanya ditiro tsa gago le matlotlo a gago,Le wena o tla gapiwa.
Mme Kemoshe+ o tla ya botshwarwa,Mmogo le baperesiti ba gagwe le dikgosana tsa gagwe.
8 Mosenyi o tla tsena mo motseng mongwe le mongwe,Mme ga go na motse ope o o tla falolang.+
Mokgatšha* o tla nyelela,Le naga e e lebala* e tla nyelediwa, fela jaaka Jehofa a buile.
9 Tlhomelang Moabe letshwao la tsela,Gonne o tla tshaba fa a nna marope,Le metse ya gagwe e tla nna selo se se tshosang,E tla sala e se na monni.+
10 A go hutsege yo o diragatsang thomo ya ga Jehofa ka go itsemeletsa!
A go hutsege yo o thibelang tšhaka ya gagwe go bolaya motho!
11 Bamoabe ba ntse ba sa tshwenngwe ke sepe go tloga bosheng jwa bone,Jaaka beine e e itshekileng mo dintsheng.*
Ga ba a ntshiwa mo nkgong e nngwe ba bo ba tsenngwa mo go e nngwe,E bile ga ba ise ba ko ba ye botshwarwa.
Ke gone ka moo tatso ya bone e ntseng e tshwana,Le lonko lwa bone lo sa fetoga.
12 “‘Ka jalo, metlha e etla,’ go bua Jehofa, ‘ya fa ke tla romela batho gore ba ba pitikolole. Ba tla ba pitikolola ba bo ba tsholola se se mo dijaneng tsa bone, e bile ba tla thubaganya dinkgo tsa bone tse dikgolo.
13 Mme Bamoabe ba tla tlhabisiwa ditlhong ke Kemoshe, fela jaaka Baiseraele ba tlhabisiwa ditlhong ke Bethele, e ba neng ba e tshepile.+
14 Go tla jang gore lo re: “Re batlhabani ba ba maatla, ba ba ipaakanyeditseng go ya ntweng”?’+
15 ‘Moabe o sentswe,Metse ya gagwe e tlhasetswe,+Le makawana a bone a a nonofileng a bolailwe,’+
Go bua Kgosi, e leina la yone e leng Jehofa wa masomosomo.+
16 Masetlapelo a gaufi le go tlela Bamoabe,Le go fedisiwa ga bone go atamela ka bofefo.+
17 Botlhe ba ba ba dikologileng ba tla tshwanelwa ke go ba utlwela botlhoko,Botlhe ba ba itseng leina la bone.
Ba reyeng lo re, ‘Ruri thobane e e thata e robagantswe, e leng puso e galalelang!’
18 Fologa mo kgalalelong ya gago,Mme o nne fa fatshe o tshwerwe ke lenyora,* wena morwadi yo o nnang mo Dibone,+Gonne mosenyi wa Moabe o a go tlhasela,E bile o tla senya mafelo a gago a a sireletsegileng.+
19 Ema gaufi le tsela, wena yo o nnang mo Aroere.+
Botsa monna yo o tshabang le mosadi yo o falolang o re, ‘Go diragetse eng?’
20 Moabe o tlhabisitswe ditlhong e bile o wetswe ke poifo.
Bokolelang lo bo lo goe.
Itsiseng mo Arenone+ gore Moabe o fedisitswe.
21 “Katlholo e tlile mo nageng e e lebala,*+ e tletse Holone, Jahase+ le Mefaathe;+
22 e tletse Dibone,+ Nebo+ le Bethe-dibelathaime;
23 e tletse Kiriathaime,+ Bethe-gamule le Bethe-meone;+
24 e tletse Keriothe+ le Bosera; e bile e tletse le metse yotlhe ya lefatshe la Moabe, e e kgakgala le e e gaufi.
25 ‘Nonofo ya Moabe e fedisitswe;*Lebogo la gagwe le robagantswe,’ go bua Jehofa.
26 ‘Mo tagiseng,+ ka gonne o ikgodisetsa Jehofa.+
Moabe o bidikama mo matlhatseng a gagwe,Mme o fetogile sengwe se batho ba se sotlang.
27 A o ne o sa sotle Iseraele?+
A o ne a fitlhelwa a na le magodu,Mo o ka tshikinyang tlhogo ya gago o bo o mo latofatsa?
28 Tswang mo metseng mme lo ye go nna mo lefikeng, lona banni ba Moabe,Mme lo nne jaaka leeba le le agileng mo matlhakoreng a khuti e e mo gare ga dithaba.’”
29 “Re utlwile ka mabela a ga Moabe gore o ikgogomosa thata,Re utlwile ka boikgodiso jwa gagwe, mabela a gagwe, boikgogomoso jwa gagwe le go itlotlomatsa ga pelo ya gagwe.”+
30 “‘Ke itse tšhakgalo ya gagwe,’ go bua Jehofa,‘Mme puo ya gagwe e e se nang mosola e tla nna lefela.
Ga ba kitla ba dira sepe.
31 Ke gone ka moo ke tla bokolelang ka ntlha ya Moabe,Gonne batho botlhe ba Moabe ba tla lela.
E bile ba tla hutsafalela banna ba Kire-herese.+
32 Ke tla go lelela thata go feta Jasere,+Wena morara* wa Sibema.+
Matlhogela a gago a a golang sentle a kgabagantse lewatle.
A fitlhile kwa lewatleng, kwa Jasere.
Mosenyi o fologetse+Mo maungong a gago a selemo* le mo morareng wa gago o o o kgetlileng.
33 Boitumelo le boipelo di tlositswe mo tshingwaneng ya maungoLe mo lefatsheng la Moabe.+
Ke dirile gore beine e kgaotse go elela mo segatisetsong sa beine.
Ga go na ope yo o tla gatang morara a ntse a goa ka boitumelo.
Go tla utlwala go goa ga mofuta o mongwe.’”+
34 “‘Go utlwala modumo wa go goa go tswa kwa Heshebone+ go ya go fitlha kwa Eleale.+
Ba goa ka lentswe le le kwa godimo le le utlwiwang kwa Jahase,+Go tswa kwa Soare go ya kwa Horonaime+ go ya go fitlha kwa Egelatha-shelishiya.
Tota le metsi a Nimerime a tla kgala.+
35 Ke tla dira gore mo Moabe,Go se tlhole go nna le motho yo o fisang maswalo mo lefelong le le kwa godimo le le boitshepo,Le yo o ntshetsang modimo wa gagwe ditlhabelo’ go bua Jehofa.
36 ‘Ke gone ka moo pelo ya me e tla hutsafalelang* Moabe jaaka modumo wa fulutu,*+Le pelo ya me e tla hutsafalelang* batho ba kwa Kire-herese jaaka modumo wa fulutu.*
Gonne dikhumo tse a di kokoantseng di tla nyelela.
37 Gonne tlhogo nngwe le nngwe e lefatla,+Le ditedu tsotlhe di kgaotswe.
Seatla sengwe le sengwe se segakilwe,+E bile ba apare letsela la kgetsi mo dinôkeng!’”+
38 “‘Mo marulelong otlhe a MoabeLe mo dipatlelong tsotlhe tsa gagweGo utlwala go bokolela fela.
Gonne ke thubagantse MoabeFela jaaka nkgo e e se nang mosola,’ go bua Jehofa.
39 ‘Ruri o tshogile! Bokolelang!
Ruri Moabe o ne a tshaba a tlhabilwe ke ditlhong!
Moabe o fetogile selo sa go sotliwa,Sengwe se se tshosang mo go botlhe ba ba mo dikologileng.’”
40 “Gonne seno ke se Jehofa a se buang:
‘Mmaba o tla tsharololela diphuka tsa gagwe mo godimo ga Moabe+Fela jaaka ntsu e e fologelang kwa tlase gore e phamole sengwe.+
41 Metse ya gagwe e tla gapiwa,Le dikago tsa gagwe tse di thata di tla fenngwa.
Mo letsatsing leo, batlhabani ba Moabe ba tla tshogaFela jaaka mosadi yo o belegang.’”
42 “‘Mme Moabe o tla fedisiwa gore a se tlhole a nna setšhaba,+Ka gonne o ikgodiseditse Jehofa.+
43 Fa pele ga gago go na le letshogo le khuti le serai,Wena monni wa Moabe,’ go bua Jehofa.
44 ‘Mongwe le mongwe yo o tshabang ka ntlha ya letshogo o tla wela mo khuting,E bile mongwe le mongwe yo o tswang mo khuting o tla tshwarwa ke serai.’
‘Gonne ke tla tlisetsa Moabe ngwaga o ke tla ba otlhayang ka one,’ go bua Jehofa.
45 ‘Ba ba tshabang ba eme fela mo moriting wa Heshebone ba se na maatla.
Gonne molelo o tla tswa mo HesheboneLe kgabo ya molelo e tla tswa mo motseng wa ga Sihone.+
E tla laila phatla ya MoabeLe logata lwa batlhabani ba ba ratang ntwa.’+
46 ‘Ruri go latlhega wena, Moabe!
Batho ba Kemoshe+ ba nyeletse.
Gonne bomorwao ba isitswe botshwarwaLe bomorwadio ba ile botshwarwa.+
47 Le fa go ntse jalo, go ela kwa bokhutlong jwa metlha ke tla phutha batho ba Moabe ba ba isitsweng botshwarwa,’ go bua Jehofa.
‘Molaetsa wa katlholo e e tlelang Moabe+ o felela fano.’”
Dintlha Tse di Kwa Tlase
^ Kgotsa “kago e e sireletsegileng.”
^ Seheb., “ne′phesh.” Bona Ditlhaloso Tsa Mafoko.
^ Kgotsa “Lebala le le kwa tlase.”
^ Kgotsa “naga e e kwa godimo e e sephaphathi.”
^ Kgotsa “maritseng.”
^ Kgotsa gongwe “mo mmung o o omeletseng.”
^ Kgotsa “mo nageng e e kwa godimo e e sephaphathi.”
^ Seheb., “Lonaka lwa Moabe lo robilwe.”
^ Kgotsa “diterebe; moretlwa.”
^ Segolobogolo difeige, gongwe le maungo a mokolane.
^ Kgotsa “fuduegelang.”
^ Go tewa fulutu e e lediwang ka khutsafalo kwa phitlhong.
^ Kgotsa “fuduegelang.”
^ Go tewa fulutu e e lediwang ka khutsafalo kwa phitlhong.
