Jeremia 8:1-22
8 Jehofa a re, “Ka nako eo, marapo a dikgosi tsa Juda, marapo a dikgosana tsa yone, marapo a baperesiti, marapo a baporofeti le marapo a banni ba Jerusalema a tla ntshiwa mo mabitleng a bone.
2 A tla alwa fa pele ga letsatsi le ngwedi le masomosomo otlhe a legodimo a ba neng ba a rata, a ba neng ba a direla, a ba neng ba a latela, a ba neng ba a senka ba bo ba a ikobela.+ Ga a kitla a phuthiwa, e bile ga a kitla a fitlhwa. A tla nna jaaka motshotelo mo mmung.”+
3 Jehofa wa masomosomo a re, “Mme masalela a a falotseng a lelapa leno le le bosula a tla tlhopha loso go na le botshelo kwa mafelong a ke ba phatlalaletsang kwa go one.
4 Mme o ba reye o re, ‘Seno ke se Jehofa a se buang:
“A ba tla wa ba bo ba sa tsoge gape?
Fa a le mongwe a ka boela morago, a yo mongwe le ene ga a kitla a boela morago?
5 Ke ka ntlha yang fa batho bano, ba Jerusalema, ba nna ba sa ikanyege mo go nna?
Ba nna ba tsietsa;Ba gana go fetoga.+
6 Ke ne ka tlhwaya tsebe mme ka tswelela ke reeditse, le fa go ntse jalo, tsela e ba neng ba bua ka yone e ne e sa siama.
Go ne go se na motho ope yo o ikwatlhaelang bosula jwa gagwe kgotsa yo o ipotsang a re, ‘Ke dirile eng?’+
Mongwe le mongwe o nna a boela mo ditseleng tse bontsi bo tsamayang mo go tsone, jaaka pitse e tabogela kwa tlhabanong.
7 Tota le mogolori o o fofang kwa loaping o itse dipaka* tsa one;Leeba le peolwane le moritinkole di itse nako e di tshwanetseng go fuduga ka yone.
Mme batho ba me bone ga ba tlhaloganye nako e nna Jehofa ke tla ba atlholang ka yone.”’+
8 ‘Go tla jang gore lo re: “Re botlhale, e bile re na le molao* wa ga Jehofa”?
Gonne boammaaruri ke gore pene e e gabang e e buang maaka+ ya bakwadi* e diriseditswe maaka fela.
9 Ba ba botlhale ba tlhabisitswe ditlhong.+
Ba tshogile mme ba tla tshwarwa.
Ba ganne lefoko la ga Jehofa,Mme ba na le botlhale bofe?
10 Ka jalo, basadi ba bone ke tla ba naya banna ba bangwe,Masimo a bone ke tla a naya batho ba sele;+Gonne go simolola ka yo monnye go fitlha ka yo mogolo, mongwe le mongwe wa bone o huma ka boferefere;+Go simolola ka moporofeti go fitlha ka moperesiti, mongwe le mongwe wa bone o dira boferefere.+
11 E bile ba leka go fodisa batho ba me ka go ba raya ba re,“Go na le kagiso! Go na le kagiso!”
Mme gone go se na kagiso.+
12 A dilo tse di makgapha tse ba di dirileng di ba tlhabisa ditlhong?
Ga ba tlhabiwe ke ditlhong gotlhelele!
Tota e bile ga ba itse gore go tlontlololwa go ntse jang!+
Ka jalo, ba tla wela mo gare ga ba ba oleng.
Ba tla kgopiwa fa ke ba atlhola,’+ go bua Jehofa.
13 ‘Fa ke ba phutha, ke tla ba fedisa,’ go bua Jehofa.
‘Go tla bo go se na morara* o o setseng mo setlhareng sa morara, le difeige mo setlhareng sa mofeige, e bile matlhare a tsone a tla swaba.
Mme se ke neng ke ba file sone se tla ba latlhegela.’”
14 “Ke ka ntlha yang fa re ntse fano?
A re phuthegeng mme re tsene mo metseng e e sireletsegileng+ mme re swele kwa go yone.
Gonne Jehofa, Modimo wa rona o tla re nyeletsa,E bile o re naya metsi a a nang le botlhole gore re a nwe,+Ka gonne re leofetse Jehofa.
15 Re ne re solofetse kagiso, mme ga go a tla sepe se se molemo,Re ne re solofetse nako ya phodiso, mme go na le letshogo!+
16 Go utlwala modumo wa dipitse tsa gagwe o o tswang ka dinko go tswa kwa Dana.
Lefatshe lotlhe le a reketlaKa ntlha ya modumo wa dipitse tsa gagwe tse ditonanyana tse di batlang go gwela.
Di a tla di bo di kometsa lefatshe le sengwe le sengwe se se mo go lone,Motse le banni ba one.”
17 Jehofa a re, “Gonne jaanong ke lo romelela dinoga,Dinoga tse di botlhole, tse di ka se kang tsa tshereanngwa,Mme ruri di tla lo loma.”
18 Khutsafalo ya me ga e alafesege;Pelo ya me e a lwala.
19 Go utlwala modumo wa go kopa thuso go tswa kwa lefatsheng le le kgakalaO o tswang kwa go morwadia batho ba me, a re:
“A Jehofa ga a mo Siona?
Kgotsa a kgosi ya gagwe ga e yo mo go ene?”
“Ke ka ntlha yang fa ba nkgopisitse ka ditshwantsho tsa bone tse di betlilweng,Ka medimo ya bone e e se nang mosola?”
20 “Thobo e fetile, selemo se fedile,Mme rona ga re a bolokwa!”
21 Ke utlwisitswe botlhoko ke go robega ga morwadia batho ba gaetsho;+Ke ngomogile pelo.
Ke wetswe ke letshogo le legolo.
22 A ga go na balema* mo Gileade?+
Kgotsa a ga go na mofodisi* teng?+
Ke ka ntlha yang fa morwadia batho ba gaetsho a ise a fodisiwe?+
Dintlha Tse di Kwa Tlase
^ Kgotsa “dinako tse di tlhomilweng.”
^ Kgotsa “taelo.”
^ Kgotsa “bakwaledi.”
^ Kgotsa “diterebe; moretlwa.”
^ Kgotsa “balema e e sidilang.”
^ Kgotsa “ngaka.”
