Jobe 15:1-35
15 Elifase+ wa Motemane o ne a araba a re:
2 “A motho yo o botlhale o tla araba ka mabaka a a sa utlwaleng,*Kgotsa a o tla tlatsa mpa ya gagwe ka phefo ya botlhaba?
3 Go kgalemela fela ka mafoko ga go na mosola,Mme puo e le nosi ga e na molemo ope.
4 Gonne wena o dira gore batho ba se ka ba tlhola ba boifa Modimo,E bile o dira gore batho ba se ka ba tlhola ba akanya ka Modimo.
5 Gonne molato wa gago o dira gore o bue jaana,*Mme o tlhopha mafoko a a botlhajana.
6 Mafoko a gago a supa gore o molato, e seng nna;Se o se buang se naya bosupi ka ga gago.+
7 A e ne e le wena motho wa ntlha go tsholwa,Kgotsa a o ne wa tsholwa pele ga dithota?
8 A o reetsa puo ya sephiri ya Modimo,Kgotsa a o tsaya gore ke wena fela o leng botlhale?
9 Ke eng se o se itseng se re sa se itseng?+
Ke eng se o se tlhaloganyang se rona re sa se tlhaloganyeng?
10 Ba ba tlhogoputswa le ba ba tsofetseng ba na le rona,+Banna ba bagolo go feta rrago.
11 A dikgomotso tsa Modimo ga di a go lekana,Kgotsa mafoko a a builweng le wena ka bonolo?
12 Goreng o letla maikutlo a gago a go laola,E bile goreng matlho a gago a phatsima ka bogale?
13 Gonne o galefela Modimo,E bile o letla gore mafoko a a ntseng jalo a tswe mo molomong wa gago.
14 Motho a ka nna yo o itshekileng jang?
Kgotsa motho yo o tsetsweng ke mosadi a ka siama jang?+
15 Modimo ga a ikanye baengele ba gagwe,Tota le magodimo ga a phepa mo matlhong a gagwe.+
16 Mme go tweng fa motho a le makgapha e bile a le bosula,+Motho yo o nwang tshiamololo fela jaaka metsi!
17 Ke tla go bolelela; ntheetse!
Ke tla go tlotlela se ke se boneng,
18 Se batho ba ba botlhale ba se boletseng se tswa kwa go borraabone,+Dilo tse ba neng ba se ka ba di fitlha.
19 Ba ne ba newa lefatshe ba le nosi fela,Mme ga go na motswakwa yo o neng a feta mo lefelong leo.
20 Motho yo o bosula o nna a boga malatsi otlhe a gagwe,O kopana le mathata botshelo jotlhe jwa gagwe.
21 Medumo e e boifisang e mo ditsebeng tsa gagwe;+Ka nako ya kagiso, o tlhaselwa ke dirukutlhi.
22 Ga a dumele gore o tla falola mo lefifing;+O atlholetswe go swa ka tšhaka.
23 O kgarakgatshega a batlana le dijo,* di kae?
O itse sentle gore letsatsi la lefifi le gaufi.
24 Matshwenyego le mathata a magolo di nna di mo tshosa;Di mo fekeetsa jaaka kgosi e e ipaakanyeditseng go tlhasela.
25 Gonne o tsholeletsa Modimo seatlaE bile o leka go lwantsha* Mothatayotlhe;
26 O itlhaganelela kwa go Ene a le tlhogoethata,A tshotse thebe ya gagwe e kima e e nonofileng;
27 Sefatlhego sa gagwe se khurumeditswe ke mafura,Le dinôka tsa gagwe di budulogile ka mafura;
28 O nna mo metseng e e tlileng go nyelediwa,Mo matlong a batho ba se kitlang ba nna mo go one,A a tla fetogang mekoa ya maje.
29 A ka se hume e bile dilo tse a nang le tsone di ka se oketsege,Le dithoto tsa gagwe di ka se anamele mo lefatsheng.
30 A ka se falole mo lefifing;Kgabo ya molelo e tla omeletsa kalana ya gagwe,*Mme o tla nyelela fa Modimo a budula ka molomo wa gagwe.+
31 Ga a tshwanela go fapoga mme a ikanya se se se nang mosola,Gonne o tla boelwa ke se se se nang mosola;
32 Se tla diragala pele ga letsatsi la gagwe,Mme dikala tsa gagwe ga di kitla di tlhola di gola sentle.+
33 O tla nna jaaka setlhare sa morara* se se tlhotlhorang morara wa sone o o sa butswang,Le jaaka setlhare sa motlhware se se tlhotlhorang malômô* a sone.
34 Gonne phuthego ya batho ba ba sa dumeleng mo Modimong* ga e na botshelo,+Mme molelo o tla laila ditente tsa pipamolomo.
35 Ba ima mathata ba bo ba tshola se se bosula,Le popelo ya bone e tlhagisa tsietso.”
Dintlha Tse di Kwa Tlase
^ Kgotsa “ka kitso e e lolea.”
^ Kgotsa “molato wa gago o katisa molomo wa gago.”
^ Seheb., “senkgwe.”
^ Kgotsa “fenya.”
^ Go tewa tsholofelo epe fela ya gore o tla boa a nna le se se mo latlhegetseng.
^ Kgotsa “diterebe; moretlwa.”
^ Kgotsa “dithunya.”
^ Kgotsa “ya batlhanogi.”
