Jobe 28:1-28
28 “Go na le lefelo le selefera e epiwang mo go loneLe lefelo le ba itshekisang gauta kwa go lone;+
2 Tshipi e ntshiwa mo mmung,Mme kopore e gakolosiwa* go tswa mo majeng.+
3 Motho o tla ka lesedi mo lefelong le le lefifi;E bile o tsenelela mo lefelong le le lefifi thata,A batlana le maje a a tlhwatlhwakgolo.
4 O epa khuti kgakala le kwa batho ba nnang gone,Kwa mafelong a a lebetsweng, a a kgakala le kwa batho ba tsamayang gone;Batho bangwe ba fologetse kwa tlase e bile ba a akgega.
5 Mo lefatsheng go tlhoga dijo;Mme kwa tlase ga lone le a fuduega jaaka e kete le fuduiwa ke molelo.*
6 Kwa tlase go na le maje a safire,Mme mo loroleng go na le gauta.
7 Ga go na nonyane e e jang nama e e itseng tselana e e yang teng;Leitlho la phakalane e ntsho ga le a e bona.
8 Dibatana tse dikgolo ga di a gata mo go yone;Tau ga e a tsamaya gone.
9 Motho o itaya leje le le thata;O pitikolola dithaba kwa metheong ya tsone.
10 O gaba mesele ya metsi+ mo lefikeng;O bona sengwe le sengwe se se tlhwatlhwakgolo.
11 O thibela metswedi ya dinokaMme se se neng se fitlhegile o se ntshetsa mo leseding.
12 Mme botlhale bo ka bonwa kae,+Le gone, motswedi wa temogo o kae?+
13 Ga go na motho ope yo o lemogang boleng jwa jone,+Mme bo ka se bonwe gope mo lefatsheng.
14 Metsi a a boteng a re, ‘Ga bo mo go nna!’
Le lewatle la re, ‘Ga ke na jone!’+
15 Ga bo ka ke jwa rekwa ka gauta e e sa tswakanngwang;E bile ga go na selefera ya bokete bope e e ka lekanngwang le jone.+
16 Ga bo ka ke jwa rekwa ka gauta ya Ofire+Kgotsa ka maje a a bonwang sewelo a onikise le safire.
17 Gauta le galase ga di ka ke tsa bapisiwa le jone;E bile ga bo ka ke jwa emisediwa ka sejana sa gauta e e sa tswakanngwang.*+
18 Re sa bue sepe ka korale le legweka,+Gonne kgetsi e e tletseng botlhale e tlhwatlhwakgolo go feta kgetsi e e tletseng diperela.
19 Topase+ ya kwa Kushe ga e ka ke ya bapisiwa le jone;Tota e bile ga bo ka ke jwa rekwa le ka gauta e e sa tswakanngwang.
20 Mme gone, botlhale bo tswa kae,E bile motswedi wa temogo o kae?+
21 Bo fitlhetswe matlho a setshedi sengwe le sengwe,+E bile bo subetswe dinonyane tsa magodimo.
22 Tshenyego le loso tsa re,‘Ditsebe tsa rona di utlwile pego ya jone fela.’
23 Modimo o tlhaloganya tsela e e yang kwa go jone;Ke ene fela a itseng kwa bo nnang gone,+
24 Gonne o bona go fitlha kwa bofelelong jwa lefatshe,E bile o bona sengwe le sengwe se se mo lefatsheng.+
25 Fa a ne a tlhoma maatla* a phefo+A bo a lekanya metsi,+
26 Fa a ne a beela pula molao+E bile a direla leru la dikgadima la matsubutsubu tselana,+
27 Ka nako eo o ne a bona botlhale a bo a bo tlhalosa;O ne a bo tiisa a bo a bo tlhatlhoba.
28 Mme o ne a raya motho a re:
‘Go boifa Jehofa ke jone botlhale,+Mme go fapoga bosula ke tlhaloganyo.’”+
Dintlha Tse di Kwa Tlase
^ Seheb., “tshololwa.”
^ Go lebega go tewa ditiro tsa mo moepong.
^ Kgotsa “e e itshekisitsweng.”
^ Seheb., “bokete.”
