Jobe 29:1-25
29 Jobe o ne a tswelela ka puo* ya gagwe a re:
2 “E kete nkabo ke le mo dikgweding tse di fetileng,Mo metlheng ya fa Modimo a ne a ntshireleditse,
3 Fa a ne a phatsimisa lobone lwa gagwe mo tlhogong ya me,Fa ke ne ke tsamaya mo lefifing ka lesedi la gagwe,+
4 Fa ke ne ke sa ntse ke le* matlhagatlhaga,Mo malatsing a fa nna le Modimo re ne re le ditsala tse ditona.+
5 Fa Mothatayotlhe a ne a sa ntse a na le nna,Fa bongwanake* ba ne ba ntikologile gotlhe fela,
6 Fa dinao tsa me e ne e kete di mo botorong,Le fa mafika a ne a ntshelela melatswana ya leokwane.+
7 Fa ke ne ke tle ke ye kwa kgorong ya motse+Ke bo ke nna mo patlelong,+
8 Makawana a ne a tle a mpone a bo a fapoga,*Tota le bannabagolo ba ne ba tle ba eme ka dinao ba bo ba tswelela ba eme.+
9 Dikgosana di ne di kgaotsa go bua;Di ne di tle di beye seatla mo molomong.
10 Mantswe a banna ba ba tlotlegang a ne a didimadiwa;Maleme a bone a ne a ngaparetse magalapa a bone.
11 Ope fela yo o neng a nkutlwa o ne a tle a mpue bontle,Le ba ba neng ba mpona ba ne ba tle ba neye bosupi ka ga me.
12 Gonne ke ne ke tle ke namole mohumanegi yo o neng a kopa thuso,+Mmogo le khutsana* le ope fela yo o neng a se na mothusi.+
13 Yo o neng a tloga a nyelela o ne a tle a ntshegofatse,+Mme ke ne ke itumedisa pelo ya motlholagadi.+
14 Ke ne ke apara tshiamo jaaka diaparo tsa me;Tshiamiso ya me e ne e tshwana le seaparo se setelele* le tuku e e kgethegileng.
15 Ke ne ka nna matlho mo go yo o foufetsengE bile ke ne ke le dinao mo go yo o golafetseng.
16 Ke ne ke le rre mo bahumaneging;+Ke ne ke tle ke sekaseke kgetsi ya ba ke neng ke sa ba itse.+
17 Ke ne ke tle ke robaganye ditlhaa tsa modiraphoso+Ke bo ke tsubula se a se tsomileng mo menong a gagwe.
18 Ke ne ke tle ke re, ‘Ke tla swela mo legaeng la me,*+Mme malatsi a me a tla nna mantsi jaaka motlhaba.*
19 Medi ya me e tla namela mo metsing,Mme monyo o tla nna mo dikaleng tsa me bosigo jotlhe.
20 Kgalalelo ya me e nna e ntšhafadiwa,Mme bora jo bo mo seatleng sa me bo tla nna bo hula.’
21 Batho ba ne ba tle ba ntheetse,Ba letetse kgakololo ya me ka tidimalo.+
22 E ne e re fa ke sena go bua, ba ne ba tlhoka se ba ka se buang;Ba ne ba itumelela go utlwa mafoko a me.
23 Ba ne ba nkemela jaaka e kete ba emetse pula;Ba ne ba eletsa go utlwa se ke tla se buang jaaka e kete ba emetse pula ya dikgakologo.+
24 Ba ne ba sa dumele gore nka tshega le bone;Go phatsima ga sefatlhego sa me go ne go ba naya tsholofelo.*
25 Ke ne ke ba kaela ke le moeteledipele wa bone,E bile ke ne ke tshela jaaka kgosi e le mo mephatong ya yone ya masole,+Gape ke gomotsa ba ba hutsafetseng.+
Dintlha Tse di Kwa Tlase
^ Seheb., “seane.”
^ Seheb., “ke le mo metlheng ya.”
^ Kgotsa “batlhokomedi ba me.”
^ Seheb., “iphitlha.”
^ Seheb., “ngwana yo o se nang rre.”
^ Kgotsa “seaparo se se se nang mabogo.”
^ Seheb., “mo sentlhageng sa me.”
^ Kgotsa “moshawa.”
^ Kgotsa gongwe “Ba ne ba se ka ba fifatsa lesedi la sefatlhego sa me.”
