Jobe 40:1-24
40 Jehofa o ne a tswelela a araba Jobe a re:
2 “A motho yo o tshwayang diphoso a ka ganetsana le Mothatayotlhe?+
Yo o batlang go kgalema Modimo a a arabe.”+
3 Jobe o ne a araba Jehofa a re:
4 “Ga ke motho wa sepe.+
Ke tla go araba ke reng?
Ke itshwere molomo.+
5 Ke buile gangwe fela, mme ga nkitla ke araba gape;Ke buile gabedi, mme ga nkitla ke tswelela ke bua.”
6 Foo Jehofa o ne a araba Jobe go tswa mo sefefong+ a re:
7 “Tsweetswee, ipaakanye mme o dire dilo jaaka monna;Ke tla go botsa, mme wena o mpolelele.+
8 A o tla belaela* tshiamiso ya me?
A o tla mpona molato gore o tle o nne yo o siameng?+
9 A o na le lebogo le le maatla jaaka la Modimo wa boammaaruri,+Kgotsa a lentswe la gago le ka duma jaaka la gagwe?+
10 Tsweetswee, ikgabise ka kgalalelo le tlotlomalo;Ikapese seriti le bontlentle.
11 Se thibele tšhakgalo ya gago e kgolo;Leba mongwe le mongwe yo o mabela mme o mo ise kwa tlase.
12 Leba mongwe le mongwe yo o mabela, mme o mo kokobetse,O bo o gatake batho ba ba bosula mo ba emeng gone.
13 Ba fitlhe botlhe mo loroleng;Ba bofe* mo lefelong le le fitlhegileng,
14 Fa o ka dira dilo tseno, ke tla dumela*Gore o ka kgona go ipoloka o dirisa maatla a gago.
15 Jaanong, a ko o bone Behemothe* e ke e dirileng fela jaaka ke go dirile.
E ja bojang jaaka poo.
16 Bona fela maatla a a mo dinôkeng tsa yoneLe nonofo e e mo mesifeng ya mpa ya yone!
17 E gagamatsa mogatla wa yone jaaka mosedara;Mesifa ya dirope tsa yone e logagane.
18 Marapo a yone ke ditšhupu tsa kopore;Maoto a yone a tshwana le dithobane tsa tshipi e e betlilweng.
19 Ke yone e e di gogang kwa pele* mo ditirong tsa Modimo;Modiri wa yone ke ene fela a ka e atamelang ka tšhaka ya gagwe.
20 Dithaba di e tlhogisetsa dijo,Kwa diphologolo tsotlhe tsa naga di tshamekelang gone.
21 E rapama ka fa tlase ga ditlhare tsa koma,Mo lefelong le le sireletsegileng la matlhaka a a mo seretseng.
22 Ditlhare tsa koma di e direla moriti,E bile ditlhare tsa modibonoka tsa mokgatšha* di e dikologile.
23 Fa noka e kgaphasela, ga e tshoge.
Le fa metsi a Joredane+ a ntse a e gasa mo molomong, ga e boife.
24 A go na le mongwe yo o ka e tshwarang e ntse e lebile,Kgotsa yo o ka phunyang nko ya yone ka huku?*
Dintlha Tse di Kwa Tlase
^ Kgotsa “nyenyefatsa.”
^ Seheb., “Bofa difatlhego tsa bone.”
^ Kgotsa “go akgola.”
^ Gongwe ke kubu.
^ Seheb., “Ke tshimologo.”
^ Kgotsa “molapo.”
^ Seheb., “serai; selaga.”
