Jobe 5:1-27
5 “Tsweetswee, bitsa! A go na le mongwe yo o go arabang?
O tla retologela kwa moengeleng ofe?
2 Gonne seeleele se tla bolawa ke go galefa,Mme yo o tsietsegang motlhofo o tla bolawa ke lefufa.
3 Ke bone seeleele se mela medi,Mme ka tshoganyetso lefelo le se nnang mo go lone le a hutsiwa.
4 Bomorwawe ba kgakala le polokesego,Mme ba a gatakwa kwa kgorong ya motse,+ go se na ope yo o ba gololang.
5 Yo o tshwerweng ke tlala o ja se motho yoo a se robileng;E bile o se ntsha le mo gare ga mmitlwa,Mme dithoto tsa bone di a tsewa.
6 Gonne dilo tse di utlwisang botlhoko ga di tlhoge mo loroleng,Le matshwenyego ga a mele mo mmung.
7 Gonne motho o tsaletswe matshwenyego,Fela jaaka ditlhase di fofela kwa godimo.
8 Le fa go ntse jalo, ke tla ikuela kwa Modimong,E bile ke tla isa kgetsi ya me kwa Modimong,
9 Kwa go Ene yo o dirang dilo tse dikgolo le tse go se nang ope yo o ka di tlhaloganyang,Dilo tse di gakgamatsang tse di se nang palo.
10 O nesa pula mo lefatshengE bile o romela metsi mo masimong.
11 O tsholeletsa ba maemo a a kwa tlase kwa godimo,E bile o boloka yo o hutsafetseng.
12 O kgoreletsa maano a ba ba botlhajana,Gore tiro ya diatla tsa bone e se ka ya atlega.
13 Modimo o dira gore batho ba ba botlhale ba wele mo seraing sa bone,+Gore boikaelelo jwa ba ba botlhale bo kgoreletsege.
14 Ba kopana le lefifi go le motshegare,E bile ba apaapa go le sethoboloko jaaka e kete go ne go le bosigo.
15 O golola mo tšhakeng e e tswang mo molomong wa bone,A golola ba ba humanegileng mo seatleng sa ba ba nonofileng,
16 Gore motho wa maemo a a kwa tlase a nne le tsholofelo,Mme molomo o o buang se se sa siamang o tswetswe.
17 Go itumela motho yo Modimo a mo kgalemelang;Ka jalo, o se ka wa gana kotlhao ya Mothatayotlhe!
18 Gonne o baka kutlobotlhoko, mme gone o hapa ntho;O gagoganya ka bogare, mme gone o fodisa ka diatla tsa gagwe.
19 O tla go golola mo matshwenyegong a le marataro,Tota le matshwenyego a bosupa ga a na go go utlwisa botlhoko.
20 Ka nako ya leuba, o tla go golola mo losong,Le mo maatleng a tšhaka ka nako ya ntwa.
21 O tla sirelediwa gore o se ka wa utlwa molomo o o buang dilo tse di bosula,+Mme ga o kitla o boifa masetlapelo fa a tla.
22 Ka nako ya tshenyego le tlala o tla tshega,E bile ga o kitla o boifa dibatana tsa lefatshe.
23 Gonne maje a naga ga a kitla a go utlwisa botlhoko,*Le dibatana di tla tshela le wena ka kagiso.
24 O tla itse gore tente ya gago e sireletsegile,*Mme ga go na sepe se se tla bong se tlhaela fa o sekaseka mafulo a gago.
25 O tla itumelela go nna le bana ba bantsiE bile ditlogolwana tsa gago di tla nna dintsi jaaka dimela tsa lefatshe.
26 O tla bo o sa ntse o nonofile fa o ya kwa lebitleng,O tshwana le dingata tsa dijo tsa ditlhaka tse di phuthilweng ka paka ya tsone.
27 Re dirile dipatlisiso ka seno, mme se ntse jalo.
Reetsa mme o se amogele.”
Dintlha Tse di Kwa Tlase
^ Kgotsa “a tla nna mo kgolaganong (tumalanong) le wena.”
^ Seheb., “e mo kagisong.”