Joshua 17:1-18
17 Go tswa foo, bola+ bo ne jwa wela lotso lwa ga Manase+ ka gonne e ne e le leitibolo la ga Josefa.+ E re ka Makire,+ leitibolo la ga Manase yo gape e leng rraagwe Gileade, e ne e le monna wa ntwa, o ne a abelwa Gileade le Bashana.+
2 Mme bola bo ne jwa wela ditlogolwana tsa ga Manase tse di setseng go ya ka malapa a tsone, tsa bomorwa Abiesere,+ bomorwa Heleke, bomorwa Aseriele, bomorwa Shekema, bomorwa Hefere le bomorwa Shemida. Bano e ne e le ditlogolwana tsa ga Manase morwa Josefa, e le banna go ya ka malapa a bone.+
3 Le fa go ntse jalo, Selofehade+ morwa Hefere, morwa Gileade, morwa Makire, morwa Manase, o ne a se na bana ba basimane, mme o ne a na le bana ba basetsana fela, mme ano e ne e le maina a bomorwadie: Mahela, Noa, Hogola, Mileka le Tiresa.
4 Ka jalo, ba ne ba tla fa pele ga ga moperesiti Eliasare,+ Joshua morwa Nune le dikgosana, ba re: “Jehofa ke ene a neng a laela Moshe gore a re neye boswa mo go bomorwarraarona.”+ Ka jalo, o ne a ba naya boswa mo go bomorwarraagwe rraabone go ya ka taelo ya ga Jehofa.+
5 Gape go ne go na le dikabelo di le lesome tse di neng tsa wela Manase ntle le lefatshe la Gileade le la Bashana, a a neng a le ka kwa ntlheng e nngwe* ya Joredane,+
6 ka gonne bomorwadia Manase ba ne ba abelwa boswa mmogo le bomorwawe, mme lefatshe la Gileade le ne la nna thuo ya ditlogolwana tsa ga Manase tse di setseng.
7 Mme molelwane wa ga Manase o ne o simologa kwa Ashera go ya kwa Mikemethathe,+ e e lebaganeng le Shekema,+ mme molelwane oo o ne o ya kwa ntlheng ya borwa* kwa lefatsheng la banni ba Ene-Tapua.
8 Naga ya Tapua+ e ne ya nna ya ga Manase, mme motse wa Tapua o o mo molelwaneng wa ga Manase o ne wa nna wa ditlogolwana tsa ga Eferaime.
9 Mme molelwane oo o ne o fologela kwa Molapong wa Kana, kwa borwa jwa molapo. Go ne go na le metse ya ga Eferaime mo gare ga metse ya ga Manase,+ mme molelwane wa ga Manase o ne o le kwa bokone jwa molapo, mme o ne o felela kwa lewatleng.+
10 Kwa borwa e ne e le wa ga Eferaime mme kwa bokone e le wa ga Manase, mme lewatle e ne ya nna molelwane wa gagwe,+ mme kwa bokone e* ne e fitlha kwa Ashera mme kwa botlhaba e ne e fitlha kwa Isakare.
11 Mo dikarolong tsa naga tsa ga Isakare le Ashera, Manase o ne a newa Bethe-sheane le metse e e e dikologileng, Ibeleame+ le metse e e e dikologileng, banni ba Dora+ le metse e e e dikologileng, banni ba Ene-dore+ le metse e e e dikologileng, banni ba Taanake+ le metse e e e dikologileng, banni ba Megido le metse e e e dikologileng, mafelo a mararo a a goletsegileng.
12 Le fa go ntse jalo, ditlogolwana tsa ga Manase di ne tsa se ka tsa kgona go gapa metse eno; Bakanana ba ne ba ganelela mo lefatsheng leno mme ba nna mo go lone.+
13 Fa Baiseraele ba sena go nonofa, ba ne ba pateletsa Bakanana go dira tiro e e boima,+ mme ba ne ba se ka ba ba leleka* gotlhelele.+
14 Ditlogolwana tsa ga Josefa di ne tsa raya Joshua tsa re: “Ke ka ntlha yang fa o re neile* karolo e le nngwe fela e e abilweng ka bola+ le kabelo e le nngwe fela gore e nne boswa jwa rona? Re batho ba bantsi thata ka gonne Jehofa o re segofaditse go tla go fitlha jaanong.”+
15 Joshua o ne a ba araba a re: “Fa e le gore lo batho ba bantsi thata, yang kwa sekgweng lo se reme, lo itirele lefelo teng mo lefatsheng la Baperise+ le la Barefaime,+ ka gonne kgaolo e e dithaba ya Eferaime+ e setse e le nnye thata mo go lona.”
16 Foo ditlogolwana tsa ga Josefa di ne tsa re: “Kgaolo e e dithaba ga e a re lekana e bile Bakanana botlhe ba ba nnang mo lefatsheng leo la mokgatšha* ba na le dikara tsa ntwa+ tse di nang le disekele tsa tshipi,* ba ba kwa Bethe-sheane+ le metse e e e dikologileng mmogo le ba ba kwa Mokgatšheng* wa Jesereele.”+
17 Ka jalo, Joshua o ne a raya ditlogolwana tsa ga Josefa, e leng ba lotso lwa ga Eferaime le lwa ga Manase, a re: “Lo batho ba bantsi thata e bile lo na le maatla a magolo. Ga lo kitla lo amogela karolo e le nngwe fela e e abilweng ka bola,+
18 mme kgaolo e e dithaba le yone e tla nna ya lona.+ Le fa gone e le sekgwa, lo se reme mme karolo ya lona ya naga e tla felela gone koo. Gonne lo tla leleka Bakanana le fa gone ba nonofile e bile ba na le dikara tsa ntwa tse di nang le disekele tsa tshipi.”*+
Dintlha Tse di Kwa Tlase
^ Go tewa letlhakore le le ka fa botlhaba.
^ Seheb., “kwa mojeng.”
^ Go tewa batho ba lotso lwa ga Manase kgotsa naga ya ga Manase.
^ Kgotsa “ba gapa lefatshe la bone.”
^ Seheb., “o nneile.”
^ Kgotsa “lebala le le kwa tlase.”
^ Seheb., “dikara tsa tshipi.”
^ Kgotsa “kwa Lebaleng le le Kwa Tlase.”
^ Seheb., “dikara tsa tshipi.”
