Joshua 23:1-16
23 Malatsi a le mantsi morago ga gore Jehofa a neye Baiseraele boikhutso,+ go se na baba bape ba ba ba dikologileng ba ba ba tshwenyang, mme Joshua a tsofetse e bile a na le dingwaga di le dintsi,+
2 Joshua o ne a bitsa Baiseraele botlhe,+ bagolwane ba bone, ditlhogo tsa bone, baatlhodi ba bone le balaodi ba bone,+ mme o ne a ba raya a re: “Ke tsofetse; ke na le dingwaga di le dintsi.
3 Mme lo iponetse sotlhe se Jehofa, Modimo wa lona a se dirileng ditšhaba tseno tsotlhe gore a lo thuse ka gonne Jehofa, Modimo wa lona ke ene yo o neng a lo tlhabanela.+
4 Bonang, ke lo kgaoganyeditse*+ lefatshe la ditšhaba tseno tse di setseng gore e nne boswa jwa ditso tsa lona,+ mmogo le lefatshe la ditšhaba tsotlhe tse ke di fedisitseng,+ go simologa kwa Joredane go ya kwa Lewatleng le Legolo* kwa bophirima.
5 Mme Jehofa, Modimo wa lona ke ene yo o neng a nna a ba kgorometsa a ba ntsha fa pele ga lona,+ mme o ne a ba leleka* ka ntlha ya lona, mme lo ne lwa rua lefatshe la bone, fela jaaka Jehofa, Modimo wa lona a ne a lo solofeditse.+
6 “Jaanong lo tshwanetse go nna pelokgale thata go boloka le go diragatsa sotlhe se se kwadilweng mo bukeng ya Molao+ wa ga Moshe ka go tlhomamisa gore ga lo tseye tsela e e phoso,+
7 ka go tlhomamisa gore ga lo ikamanye le ditšhaba tseno+ tse di setseng le lona. Tota e bile, ga lo a tshwanela go umaka maina a medimo ya tsone+ kgotsa lwa ikana ka yone e bile ga lo a tshwanela go e direla kgotsa go e ikobela le ka motlha.+
8 Mme lo tshwanetse go ngaparela Jehofa, Modimo wa lona,+ fela jaaka lo dirile go tla go fitlha mo letsatsing leno.
9 Jehofa o tla leleka ditšhaba tse dikgolo le tse di maatla fa pele ga lona,+ ke gone ka moo go se nang motho ope yo o kgonneng go ema fa pele ga lona go fitlha mo letsatsing leno.+
10 Monna a le mongwe wa lona o tla lelekisa ba le sekete+ ka gonne Jehofa, Modimo wa lona ke ene yo o lo tlhabanelang,+ fela jaaka a lo solofeditse.+
11 Ka jalo, ka metlha lo nne lo disitse,*+ lo dira seo ka go rata Jehofa, Modimo wa lona.+
12 “Mme fa go ka direga gore lo boele morago lo bo lo ngaparela batho ba ba setseng ba ditšhaba tseno tse di setseng+ le lona mme lo dira kgolagano ya lenyalo*+ le bone e bile lo itsalanya le bone, mme le bone ba itsalanya le lona,
13 lo itse gore ruri Jehofa, Modimo wa lona ga a kitla a tswelela a leleka ditšhaba tseno ka ntlha ya lona.+ Di tla nna serai mo go lona le seme mo matlhakoreng a lona+ le mmitlwa mo matlhong a lona go fitlha lo nyelela mo lefatsheng leno le le molemo le Jehofa, Modimo wa lona a le lo neileng.
14 “Jaanong ke tloga ke swa,* mme lo itse sentle ka pelo yotlhe ya lona le ka moya otlhe wa lona gore ga go na lefoko le le lengwe le le sa diragalang mo ditsholofetsong tsotlhe tse di molemo tse Jehofa, Modimo wa lona a di buileng le lona. Di lo diragaletse tsotlhe fela. Ga go na lefoko lepe la tsone le le sa diragalang.+
15 Mme fela jaaka ditsholofetso tsotlhe tse di molemo tse Jehofa, Modimo wa lona a di buileng le lona di lo diragaletse,+ ka tsela e e tshwanang Jehofa o tla lo tlisetsa masetlapelo otlhe a a neng a a solofetsa* mme o tla lo nyeletsa mo lefatsheng leno le le molemo le Jehofa, Modimo wa lona a le lo neileng.+
16 Fa lo tlola kgolagano ya ga Jehofa, Modimo wa lona e a lo laetseng gore lo e boloke lo bo lo tsamaya lo ya go direla medimo e mengwe le go e ikobela, foo bogale jwa ga Jehofa bo tla lo tukela,+ mme lo tla nyelela ka bonako mo lefatsheng le le molemo le a le lo neileng.”+
Dintlha Tse di Kwa Tlase
^ Seheb., “ke lo abetse ka bola.”
^ Go tewa Lewatle la Mediterranean.
^ Kgotsa “o ne a gapa lefatshe la bone.”
^ Kgotsa “Ka jalo, itiseng ka kelotlhoko.”
^ Kgotsa “lo nyalelana.”
^ Seheb., “Gompieno ke tsamaya ka tsela ya lefatshe lotlhe.”
^ Kgotsa “o tla lo tlisetsa lefoko lotlhe le le bosula.”
