Lefitiko 17:1-16
17 Jehofa o ne a tswelela a raya Moshe a re:
2 “Bua le Arone le bomorwawe le Baiseraele botlhe mme o ba reye o re, ‘Seno ke se Jehofa a se laetseng:
3 “‘“Fa Moiseraele a tlhabela poo kgotsa phelefu e potlana kgotsa podi mo kampeng kgotsa a e tlhabela kwa ntle ga kampa,
4 go na le gore a e tlise kwa kgorong ya tente ya bokopanelo gore a e isetse Jehofa e le setlhabelo fa pele ga motlaagana wa ga Jehofa, motho yoo o tla nna le molato wa madi. O tsholotse madi, mme motho yoo o tshwanetse go bolawa.
5 Seno se tla dirwa e le gore Baiseraele ba ise ditlhabelo kwa go Jehofa kwa kgorong ya tente ya bokopanelo kwa moperesiting, ditlhabelo tse gone jaanong ba di ntshetsang kwa nageng. Ba di ntshetse Jehofa e le ditlhabelo tsa go abelana.+
6 Mme moperesiti o tla kgatšha madi mo sebesong sa ga Jehofa se se kwa kgorong ya tente ya bokopanelo a bo a fisa mafura gore a kuise mosi e le lonko lo lo itumedisang* lo lo yang kwa go Jehofa.+
7 Gore ba se ka ba tlhola ba ntshetsa madimona a a tshwanang le dipodi* ditlhabelo,+ a ba akafalang le one.+ Ono e tla nna molao o o tla nnelang ruri mo go lona mo dikokomaneng tsotlhe tsa lona.”’
8 “O ba reye o re, ‘Moiseraele kgotsa motswakwa ope yo o agileng le lona yo o isang setlhabelo se se fisiwang kgotsa setlhabelo se sengwe,
9 mme a sa se tlise kwa kgorong ya tente ya bokopanelo gore a se isetse Jehofa, o tshwanetse go bolawa.+
10 “‘Fa Moiseraele kgotsa motswakwa yo o agileng le lona a ja madi* a mofuta ope fela,+ ruri ke tla galefela motho yoo yo o jang madi, mme ke tla mmolaya.
11 Gonne botshelo* jwa nama bo mo mading,+ mme nna ke lo a neile gore lo a ntshe mo sebesong+ gore maleo a lona a itshwarelwe ka gonne madi ke one a dirang gore lo itshwarelwe maleo+ ka ntlha ya botshelo* jo bo mo go one.
12 Ke gone ka moo ke reileng Baiseraele ka re: “Go se nne le ope wa lona yo o jang madi e bile go se nne le motswakwa ope yo o agileng le lona+ yo o jang madi.”+
13 “‘Fa mongwe wa Baiseraele kgotsa motswakwa ope yo o agileng le lona a tsoma a bo a tshwara phologolo ya naga kgotsa nonyane e e ka jewang, o tshwanetse go tsholola madi a yone+ a bo a a katela ka lorole.
14 Gonne botshelo* jwa nama ya mofuta mongwe le mongwe ke madi a yone ka gonne botshelo* bo mo go one. Ka jalo, ke ne ka raya Baiseraele ka re: “Ga lo a tshwanela go ja madi a nama ya mofuta ope fela, ka gonne botshelo* jwa nama ya mofuta mongwe le mongwe ke madi a yone. Ope fela yo o a a jang o tla bolawa.”+
15 Fa motho ope fela, e ka tswa e le motho wa mo lefelong la lona kgotsa motswakwa, a ja nama ya phologolo e e fitlhetsweng e sule kgotsa e e gagogantsweng ke sebatana,+ foo o tshwanetse go tlhatswa diaparo tsa gagwe a bo a tlhapa ka metsi mme o tla itshekologa go fitlha maitseboa;+ go tswa foo o tla itsheka.
16 Mme fa a sa di tlhatswe e bile a sa tlhape mmele wa gagwe,* o tla otlhaelwa phoso ya gagwe.’”+
Dintlha Tse di Kwa Tlase
^ Kgotsa “monate; ritibatsang.” Seheb., “lapolosang.”
^ Seheb., “ntshetsa dipodi.”
^ Go tewa madi a setshedi sepe fela.
^ Seheb., “ne′phesh.” Bona Ditlhaloso Tsa Mafoko.
^ Seheb., “ne′phesh.” Bona Ditlhaloso Tsa Mafoko.
^ Seheb., “ne′phesh.” Bona Ditlhaloso Tsa Mafoko.
^ Seheb., “ne′phesh.” Bona Ditlhaloso Tsa Mafoko.
^ Seheb., “ne′phesh.” Bona Ditlhaloso Tsa Mafoko.
^ Seheb., “nama ya gagwe.”