Lefitiko 2:1-16
-
Setlhabelo sa dijo tsa ditlhaka (1-16)
2 “‘Jaanong fa mongwe a isetsa Jehofa setlhabelo sa dijo tsa ditlhaka,+ setlhabelo sa gagwe e tshwanetse go nna bupi jo bo boleta, mme a tshele leokwane mo go sone a bo a baya borekhu jo bo nkgang monate* mo go sone.+
2 Go tswa foo, o tla se tlisa mo go bomorwa Arone, e leng baperesiti, mme moperesiti o tla tsaya bupi jo bo boleta bo tletse seatla le leokwane le borekhu jo bo nkgang monate jotlhe jwa sone, mme o tla di fisa mo sebesong gore di kuise mosi e le karolo e e emelang setlhabelo sotlhe,*+ e leng setlhabelo se se dirwang ka molelo sa lonko lo lo itumedisang* lo lo yang kwa go Jehofa.
3 Sepe fela se se salang mo setlhabelong sa dijo tsa ditlhaka ke sa ga Arone le bomorwawe,+ ke sengwe se se boitshepotshepo+ se se tswang mo ditlhabelong tsa ga Jehofa tse di dirwang ka molelo.
4 “‘Fa o isa mpho ya setlhabelo sa dijo tsa ditlhaka se se apeilweng mo ontong,* e nne sa bupi jo bo boleta, dinkgwe tse di bopegileng jaaka maseka tse di se nang sebediso di tlhakantswe le leokwane kgotsa e nne sa diphaphatha tse di se nang sebediso di tshasitswe leokwane.+
5 “‘Fa mpho e o e ntshang e le setlhabelo sa dijo tsa ditlhaka se se apeilweng mo paneng,+ e nne sa bupi jo bo boleta jo bo se nang sebediso bo tlhakantswe le leokwane.
6 Se ngathoganngwe gore se nne dikarolwana, mme o tshele leokwane mo go sone.+ Ke setlhabelo sa dijo tsa ditlhaka.
7 “‘Fa mpho e o e ntshang e le setlhabelo sa dijo tsa ditlhaka se se apeilweng mo paneng e e boteng, se dirwe ka bupi jo bo boleta le leokwane.
8 O tlise setlhabelo sa dijo tsa ditlhaka se se neng se dirilwe ka dilo tseo kwa go Jehofa, mme se tla isiwa kwa moperesiting, ene o tla se atametsa fa sebesong.
9 Mme moperesiti o tla tsaya bontlhanngwe jwa setlhabelo sa dijo tsa ditlhaka e le karolo e e emelang setlhabelo sotlhe*+ a bo a e fisa gore e kuise mosi mo sebesong e le setlhabelo se se dirwang ka molelo sa lonko lo lo itumedisang* lo lo yang kwa go Jehofa.+
10 Se se salang mo setlhabelong sa dijo tsa ditlhaka ke sa ga Arone le bomorwawe, ke sengwe se se boitshepotshepo sa ditlhabelo tsa ga Jehofa tse di dirwang ka molelo.+
11 “‘Lo se ka lwa isetsa Jehofa setlhabelo sepe sa dijo tsa ditlhaka se se nang le sebediso,+ ka gonne ga lo a tshwanela go fisa tlhama epe e e nang le sebediso kgotsa tswina ya dinotshe mo sebesong gore di kuise mosi e le setlhabelo se se dirwang ka molelo se se yang kwa go Jehofa.
12 “‘Lo ka nna lwa di ntshetsa Jehofa e le mpho ya mabutswapele,+ mme ga di a tshwanela go tlisiwa mo sebesong e le lonko lo lo itumedisang.*
13 “‘Setlhabelo sengwe le sengwe sa dijo tsa ditlhaka se o se ntshang se lokiwe ka letswai; mme ga o a tshwanela go letla gore setlhabelo sa gago sa dijo tsa ditlhaka se tlhoke letswai la kgolagano ya Modimo wa gago. Fa o ntsha setlhabelo sengwe le sengwe sa gago, o se ise mmogo le letswai.+
14 “‘Fa o isetsa Jehofa setlhabelo sa dijo tsa ditlhaka ka maungo a mabutswapele, o ise dijo tsa ditlhaka tse disha tse di besitsweng mo molelong, dipeo tse disha tse di thugilweng, e le setlhabelo sa dijo tsa ditlhaka sa maungo a gago a mabutswapele.+
15 O se tshele leokwane o bo o baya borekhu jo bo nkgang monate mo go sone. Ke setlhabelo sa dijo tsa ditlhaka.
16 Moperesiti o tla di fisa gore di kuise mosi e le karolo e e emelang setlhabelo sotlhe,*+ go tewa dingwe tsa ditlhaka tse di thugilweng le leokwane mmogo le borekhu jotlhe jwa sone, e le setlhabelo se se dirwang ka molelo se se yang kwa go Jehofa.
Dintlha Tse di Kwa Tlase
^ Seheb., “lebano.” Bona Ditlhaloso Tsa Mafoko.
^ Kgotsa “e le karolo ya segopotso sa yone.”
^ Kgotsa “monate; ritibatsang.” Seheb., “lapolosang.”
^ Kgotsa “mo obeneng.”
^ Kgotsa “e le karolo ya segopotso sa yone.”
^ Kgotsa “monate; ritibatsang.” Seheb., “lapolosang.”
^ Kgotsa “monate; ritibatsang.” Seheb., “lapolosang.”
^ Kgotsa “e le karolo ya segopotso sa yone.”
