Lefitiko 22:1-33
22 Jehofa o ne a bua gape le Moshe a re:
2 “Bolelela Arone le bomorwawe gore ba nne kelotlhoko fa ba tshwara* dilo tse di boitshepo tse Baiseraele ba di dirang boitshepo gore e nne tsa me+ e bile ba se ka ba leswafatsa leina la me le le boitshepo.+ Ke nna Jehofa.
3 Ba reye o re, ‘Mo dikokomaneng tsotlhe tsa lona, motho ope fela mo baneng ba lona yo o atamelang dilo tse di boitshepo tse Baiseraele ba di dirang boitshepo gore e nne tsa ga Jehofa, mme a sa ntse a itshekologile, motho yoo o tla bolawa a tlosiwa fa pele ga me.+ Ke nna Jehofa.
4 Go se nne le monna ope mo baneng ba ga Arone yo o nang le lepero+ kgotsa yo o tswang boladu+ mo serweng sa gagwe sa tsalo yo o jang dilo tse di boitshepo go fitlha a itsheka,+ le fa e le monna yo o kgomang mongwe yo o itshekolotsweng ke motho yo o suleng,*+ le fa e le monna yo o tswang peo,+
5 le fa e le motho yo o amang ditshedi tse di tsamayang di le setlhopha tse di itshekologileng+ kgotsa yo o kgomang motho yo o itshekologileng ka ntlha ya mabaka ape fela, yo a ka dirang gore a itshekologe.+
6 Motho* yo o kgomang sepe sa dilo tseno o tla itshekologa go fitlha maitseboa e bile a se ka a ja sepe sa dilo tse di boitshepo, mme a tlhape ka metsi.+
7 Fa letsatsi le sena go phirima, o tla itsheka mme morago ga moo a ka nna a ja dingwe tsa dilo tse di boitshepo ka gonne ke dijo tsa gagwe.+
8 Gape a se ka a ja phologolo epe e e fitlhetsweng e sule kgotsa sepe se se gagogantsweng ke dibatana se bo se mo itshekolola.+ Ke nna Jehofa.
9 “‘Ba tshwanetse go ikobela taelo ya me, gore ba se ka ba leofa ka ntlha ya yone mme ba tshwanelwa ke go swa ka gonne ba ne ba leswafatsa dilo tse di boitshepo. Ke nna Jehofa, yo o ba dirang boitshepo.
10 “‘Motho ope yo o sa tshwanelegeng* a se ka a ja sepe se se boitshepo.+ Motswakwa ope yo o etetseng moperesiti kgotsa modiri yo o thapilweng a se ka a ja sepe se se boitshepo.
11 Mme fa moperesiti a reka mongwe ka madi a gagwe, motho yoo a ka nna a se ja le ene. Batlhanka ba ba tsaletsweng mo ntlong ya gagwe le bone ba ka nna ba ja le ene dijo tsa gagwe.+
12 Fa morwadia moperesiti a nyalwa ke mongwe yo e seng moperesiti,* a se ka a ja moneelo wa dilo tse di boitshepo.
13 Mme gone, fa morwadia moperesiti a nna motlholagadi kgotsa a tlhalwa mme a se na bana a bo a boela kwa ntlong ya ga rraagwe jaaka fa a ne a sa ntse a le mosha, a ka nna a ja dingwe tsa dijo tsa ga rraagwe;+ mme motho ope yo o sa tshwanelegeng* a se ka a di ja.
14 “‘Jaanong fa motho a ja selo se se boitshepo ka phoso, o tshwanetse go se oketsa ka karolwana* ya tlhwatlhwa ya sone mme a neye moperesiti se se boitshepo.+
15 Ka jalo, a baperesiti ba se ka ba leswafatsa dilo tse di boitshepo tse Baiseraele ba di ntshetsang Jehofa+
16 mme ba ba tlisetsa kotlhao ka ntlha ya molato wa bone ka gonne ba jele dilo tsa bone tse di boitshepo; ka gonne ke nna Jehofa, yo o ba dirang boitshepo.’”
17 Jehofa o ne a tswelela a bua le Moshe a re:
18 “Bua le Arone le bomorwawe le Baiseraele botlhe mme o ba reye o re, ‘Fa Moiseraele kgotsa motswakwa yo o agileng mo Iseraele a isetsa Jehofa setlhabelo se se fisiwang+ e le go diragatsa maikano a gagwe kgotsa a isa setlhabelo se se ntshiwang ka go rata,+
19 a a ntshe e tonanyana e e itekanetseng sentle+ go tswa mo motlhapeng, mo diphelefung tse di potlana kgotsa mo dipoding, e le gore a amogelwe.
20 Ga lo a tshwanela go ntsha sepe se se nang le bogole+ ka gonne ga se kitla se dira gore lo amogelwe.
21 “‘Fa motho a isetsa Jehofa setlhabelo sa go abelana+ e le go diragatsa maikano kgotsa e le setlhabelo se se ntshiwang ka go rata, e nne phologolo e e itekanetseng sentle go tswa mo motlhapeng kgotsa mo letsomaneng gore a amogelwe. E se ka ya nna le bogole bope.
22 Go se ka ga ntshiwa setlhabelo ka phologolo e e foufetseng, e e robegileng, e e segegileng, e e nang le kakana,* e e nang le magogo kgotsa e e nang le bolwetse bongwe jwa letlalo; ga lo a tshwanela go isetsa Jehofa sepe sa dilo tseno kgotsa lwa ntshetsa Jehofa setlhabelo se se ntseng jalo mo sebesong.
23 Lo ka nna lwa ntsha poo kgotsa nku e e nang le leoto le leleele thata kgotsa le lekhutshwane thata e le setlhabelo se se ntshiwang ka go rata, mme gone, fa lo e ntsha e le setlhabelo sa maikano ga e kitla e amogelwa.
24 Ga lo a tshwanela go isetsa Jehofa phologolo e dikgeleswa tsa yone tsa bonna di senyegileng kgotsa di thubilweng kgotsa di somotsweng kgotsa di kgaotsweng e bile lo se ka lwa ntsha setlhabelo ka diphologolo tse di ntseng jalo mo lefatsheng la lona.
25 Mme ga lo a tshwanela go ntsha epe ya tsone e tswa mo seatleng sa motswakwa e le senkgwe sa Modimo wa lona ka gonne ga di a siama e bile di na le bogole. Ga di kitla di amogelwa mo go lona.’”
26 Jehofa o ne a bua gape le Moshe a re:
27 “Fa poo kgotsa phelefu e potlana kgotsa podi e tsalwa, e tla tswelela e na le mmaayone malatsi a le supa,+ mme go simolola mo letsatsing la borobedi go ya pele e tla amogelwa fa e ntshiwa setlhabelo se se dirwang ka molelo se se yang kwa go Jehofa.
28 Ga lo a tshwanela go tlhaba poo kgotsa nku mmogo le ngwana wa yone mo letsatsing le le lengwe.+
29 “Fa lo ntshetsa Jehofa setlhabelo sa go leboga,+ lo se ntshetse gore lo amogelwe.
30 Se jewe mo letsatsing leo. Ga lo a tshwanela go tlogela sepe sa sone go fitlha mo mosong.+ Ke nna Jehofa.
31 “Lo tshwanetse go boloka ditaelo tsa me lo bo lo di diragatse.+ Ke nna Jehofa.
32 Ga lo a tshwanela go leswafatsa leina la me le le boitshepo,+ gore Baiseraele ba itse gore ke boitshepo.+ Ke nna Jehofa, yo o lo dirang boitshepo,+
33 yo ke lo ntshitseng kwa lefatsheng la Egepeto gore ke itshupe ke le Modimo mo go lona.+ Ke nna Jehofa.”
Dintlha Tse di Kwa Tlase
^ Seheb., “gore ba itomolole mo.”
^ Seheb., “ne′phesh.” Bona Ditlhaloso Tsa Mafoko.
^ Seheb., “ne′phesh.” Bona Ditlhaloso Tsa Mafoko.
^ Seheb., “Motho ope o sele,” go tewa motho yo e seng wa losika lwa ga Arone.
^ Kgotsa “a nyalwa ke motho o sele.”
^ Seheb., “motho o sele,” go tewa motho yo e seng wa losika lwa ga Arone.
^ Seheb., “nngwetlhanong (1/5).”
^ Kgotsa “kgôtô.”
