Efangele ya ga Luke 10:1-42
10 Morago ga dilo tseno, Morena o ne a tlhopha barutwa ba bangwe ba le 70 mme a ba roma ka bobedi le bobedi+ kwa pele ga gagwe kwa motseng mongwe le mongwe le kwa lefelong lengwe le lengwe le a neng a tlile go ya kwa go lone.
2 Go tswa foo, o ne a ba raya a re: “Eleruri, thobo e kgolo, mme badiri ba mmalwa. Ka jalo, kopang Mong wa thobo gore a romele badiri mo thobong ya gagwe.+
3 Tsamayang, mme lo nne kelotlhoko. Ke lo roma jaaka dikwanyana mo gare ga diphiri.+
4 Lo se ka lwa tsaya kgetsana ya madi, kgotsa kgetsana ya dijo, kgotsa ditlhako,*+ e bile lo se ka lwa dumedisa ope* mo tseleng.
5 Fa lo tsena mo ntlong epe fela, lo bue pele lo re: ‘A ntlo eno e nne le kagiso.’+
6 Mme fa motho yo o ratang kagiso* a le gone, kagiso ya lona e tla nna mo go ene. Mme fa a seyo, kagiso ya lona e tla boela mo go lona.
7 Ka jalo, lo nne mo ntlong eo,+ lo je e bile lo nwe dilo tse ba di lo nayang,+ ka gonne modiri o tshwanelwa ke tuelo ya gagwe.+ Lo se ka lwa nnela go tswa mo ntlong e nngwe lo ya kwa go e nngwe.
8 “Gape, fa lo tsena mo motseng ope fela ba bo ba lo amogela, lo je sepe fela se ba se lo nayang
9 lo bo lo fodisa batho ba ba lwalang mo go one mme lo re: ‘Bogosi Jwa Modimo bo atametse.’+
10 Mme fa lo tsena mo motseng ope fela ba bo ba sa lo amogele, lo ye kwa ditseleng tsa one tse dikgolo lo bo lo re:
11 ‘Tota e bile re tlhotlhora lorole lo lo ngaparetseng dinao tsa rona lo lo tswang mo motseng wa lona.+ Mme gone, itseng gore Bogosi Jwa Modimo bo atametse.’
12 Ke a lo bolelela, mo letsatsing leo motse wa Sodoma o tla kgona go itshokela letsatsi la katlholo go gaisa motse oo.+
13 “Ruri o tlhomola pelo wena, Korasina! Ruri o tlhomola pelo wena, Bethesaida! ka gonne fa dikgakgamatso tseno tse di diragetseng mo go lona di ka bo di diragetse kwa Ture le Sidona, batho ba teng ba ka bo ba sa bolo go ikwatlhaya, ba ntse mo letseleng la kgetsi le mo meloreng.+
14 Ka jalo, Ture le Sidona di tla kgona go itshokela katlholo go gaisa lona.
15 Mme wena Kaperenama, a o ithaya o re o tla tsholelediwa kwa legodimong? O tla fologela mo Lebitleng!*
16 “Ope fela yo o lo reetsang o reetsa le nna.+ Mme ope fela yo o lo itlhokomolosang o itlhokomolosa le nna. Mo godimo ga moo, ope fela yo o intlhokomolosang o itlhokomolosa le Ene yo o nthomileng.”+
17 Jaanong barutwa ba ba 70 ba ne ba boa ba itumetse* mme ba re: “Morena, tota le madimona re kgona go a leleka re dirisa leina la gago.”+
18 Foo o ne a ba raya a re: “Ke bona Satane a setse a ole+ jaaka legadima a tswa kwa legodimong.
19 Bonang, ke lo neile taolo ya gore lo gatake dinoga le diphepheng, e bile ke lo neile nonofo ya gore lo fenye mmaba le maatla otlhe a gagwe,+ mme ga go na sepe se se tla lo utlwisang botlhoko gotlhelele.
20 Le fa go ntse jalo, lo se ka lwa itumelela gore lo kgona go leleka madimona,* go na le moo, itumeleleng gore maina a lona a kwadilwe kwa magodimong.”+
21 Ka yone nako eo, moya o o boitshepo o ne wa dira gore Jesu a itumele thata a bo a re: “Rara, wena Morena wa legodimo le lefatshe, ke go baka phatlalatsa ka gonne o fitlhetse batho ba ba botlhale le ba ba rutegileng+ dilo tseno ka kelotlhoko mme o di senoletse bana ba bannye. Rara, o dirile jalo ka gonne seno ke thato ya gago.+
22 Dilo tsotlhe ke di neilwe ke Rre, mme ga go na ope yo o nkitseng* ntle le Rara, e bile ga go na ope yo o itseng Rara ntle le nna+ le ope fela yo ke mo rutang ka Rara.”+
23 Foo o ne a retologela kwa barutweng ba gagwe a bo a bua le bone kwa thoko a re: “Go itumela batho ba ba bonang dilo tse lo di bonang.+
24 Gonne ke a lo bolelela, baporofeti ba le bantsi le dikgosi ba ne ba eletsa go bona dilo tse lo di bonang,+ le fa go ntse jalo ga ba a ka ba di bona, e bile ba ne ba eletsa go utlwa dilo tse lo di utlwang, le fa go ntse jalo ga ba a ka ba di utlwa.”
25 Jaanong monna mongwe yo o itseng Molao thata o ne a ema gore a mo leke, mme o ne a re: “Moruti, ke eng se ke tshwanetseng go se dira gore ke bone botshelo jo bo sa khutleng?”+
26 Jesu o ne a mo raya a re: “Go kwadilwe eng mo Molaong wa ga Moshe? O o tlhaloganya jang?”
27 Monna yoo o ne a mo araba a re: “‘O tshwanetse go rata Jehofa,* Modimo wa gago, ka pelo yotlhe ya gago le ka moya otlhe wa gago le ka nonofo yotlhe ya gago le ka mogopolo otlhe wa gago,’+ gape o tshwanetse ‘go rata moagelani wa gago jaaka o ithata.’”+
28 O ne a mo raya a re: “O arabile sentle; tswelela o dira dilo tseno mme o tla bona botshelo.”+
29 Mme e re ka monna yono a ne a batla go itshupa gore o siame,+ o ne a raya Jesu a re: “Tota moagelani wa me ke mang?”
30 Jesu o ne a mo araba a re: “Monna mongwe o ne a tswa kwa Jerusalema a ya kwa Jeriko mme a tlhaselwa ke dinokwane, tse di neng tsa mo apola, tsa mo itaya di bo di tsamaya di mo tlogela a le gaufi le go swa.
31 Jaanong ka yone nako eo go ne ga direga gore moperesiti mongwe a fete ka tsela eo, mme fa a mmona, o ne a feta fela kwa thoko.
32 Ka tsela e e tshwanang, Molefi le ene o ne a tla mo lefelong leo a bo a mmona, mme o ne a feta fela kwa thoko.
33 Le fa go ntse jalo, Mosamarea mongwe+ yo o neng a tsamaya mo tseleng eo o ne a fitlha mo lefelong leo, mme fa a mmona o ne a mo tlhomogela pelo.
34 Ka jalo, o ne a mo atamela mme a hapa dintho tsa gagwe, a di tshela leokwane le beine. Go tswa foo, o ne a mo pega mo tonking ya gagwe mme a mo isa kwa ntlong ya baeng a bo a mo tlhokomela.
35 Letsatsi le le latelang o ne a ntsha didenario* di le pedi, a di naya mong wa ntlo ya baeng a bo a re: ‘Mo tlhokomele, mme sepe fela se o tla se dirisang kwantle ga seno, ke tla se go duela fa ke boa.’
36 O akanya gore ke mang mo bathong bano ba bararo yo o bonalang a itirile moagelani+ wa monna yo o neng a tlhaselwa ke dinokwane?”
37 O ne a re: “Ke yo o neng a mo utlwela botlhoko.”+ Foo Jesu o ne a mo raya a re: “Tsamaya mme o dire se se tshwanang.”+
38 Jaanong fa ba ntse ba le mo tseleng, o ne a tsena mo motsaneng mongwe. Fa a fitlha koo, mosadi mongwe yo o bidiwang Maratha+ o ne a mo amogela mo ntlong ya gagwe.
39 Gape Maratha o ne a na le monnawe yo o bidiwang Marea, mme ene o ne a nna fa dinaong tsa Morena gore a reetse se a neng a se bua.*
40 Ka fa letlhakoreng le lengwe, Maratha o ne a itewa tsebe ke go dira ditiro tse dintsi. Ka jalo, o ne a ya kwa go Jesu a bo a re: “Morena, a ga o re sepe fa nnake a ntlogetse ke dira dilo ke le nosi? Mmolelele gore a tle go nthusa.”
41 Morena o ne a mo araba a re: “Maratha, Maratha, o a tlhobaela e bile o tshwenyegile ka dilo tse dintsi.
42 Mme gone, go tlhokega dilo di sekae fela, kgotsa se le sengwe fela. Marea ene o tlhophile selo sa botlhokwa,*+ mme ga se kitla se tsewa mo go ene.”
Dintlha Tse di Kwa Tlase
^ Seger., “bompaatšhane.”
^ Kgotsa “lo se ka lwa tlamparela ope fa lo dumedisa.”
^ Seger., “tsala ya kagiso.”
^ Kgotsa “Hadese.” Bona Ditlhaloso Tsa Mafoko.
^ Kgotsa “ba boa ka boipelo.”
^ Seger., “meya.”
^ Seger., “yo o itseng Morwa.”
^ Bona Dintlha A5.
^ Bona Dintlha B14.
^ Seger., “lefoko la gagwe.”
^ Seger., “karolo e e molemo.”
