Efangele ya ga Mareko 12:1-44
12 Go tswa foo, o ne a simolola go bua le bone ka ditshwantsho a re: “Monna mongwe o ne a na le tshimo ya morara*+ a bo a aga lobota go e dikologa, mme o ne a epa khuti gore a dire segatisetso sa beine a bo a aga tora;+ go tswa foo o ne a e hirisetsa balemi a bo a tsaya loeto a ya kwa nageng e e kgakala.+
2 Ka paka e e tshwanetseng, o ne a roma motlhanka mongwe kwa baleming bao, gore a ye go tsaya maungo mangwe a tshimo ya morara mo go bone.
3 Mme ba ne ba mo tsaya, ba mo itaya ba bo ba mo tsamaisa a iphotlhere.
4 O ne a roma motlhanka yo mongwe gape kwa go bone, mme yoo ba ne ba mo itaya mo tlhogong ba bo ba mo tlhabisa ditlhong.+
5 O ne a roma yo mongwe, mme ene ba ne ba mmolaya, a roma le ba bangwe ba le bantsi, mme bangwe ba bone ba ne ba ba itaya mme ba bangwe ba ba bolaya.
6 Foo mong wa tshimo eo ya morara o ne a roma morwawe yo o rategang+ kwa go bone a ithaya a re, ‘Ba tla tlotla morwaake.’
7 Le fa go ntse jalo, balemi bao ba ne ba raana ba re, ‘Yono ke moruaboswa.+ Tlang, a re mmolayeng, mme boswa jwa gagwe e tla nna jwa rona.’
8 Ka jalo, ba ne ba mo tshwara, ba mmolaya, ba bo ba mo latlhela kwa ntle ga tshimo ya morara.+
9 Mong wa tshimo ya morara o tla dira eng? O tla tla a bo a bolaya balemi bao, mme o tla naya balemi ba bangwe tshimo ya morara.+
10 A lo ne lo ise lo ke lo bale lokwalo lono: ‘Leje le baagi ba neng ba le gana, jaanong le fetogile leje le legolo la sekhutlo.*+
11 Leje leno le tswa kwa go Jehofa,* mme le a kgatlha’?”+
12 Foo ba ne ba batla go mo tshwara, le fa go ntse jalo, ba ne ba tshaba batho, ka gonne ba ne ba lemoga gore o ne a bua setshwantsho seo a akantse ka bone. Ka jalo, ba ne ba mo tlogela mme ba tsamaya.+
13 Morago ga moo, ba ne ba roma Bafarasai bangwe le ba lekoko la balatedi ba ga Herode kwa go Jesu gore ba dire gore a bue sengwe se se phoso.+
14 Fa bano ba goroga, ba ne ba mo raya ba re: “Moruti, re a itse gore o bua boammaaruri ka metlha e bile ga o batle go tlhotlhelediwa ke dikgopolo tsa batho ba bangwe, ka gonne ga o lebe ponalo ya ka fa ntle ya batho, mme o ruta boammaaruri ka Modimo. A go siame* go duela Kaesara lekgetho* kgotsa nnyaa?
15 A re tshwanetse go duela kgotsa ga re a tshwanela go duela?” E re ka a ne a lemoga boitimokanyi jwa bone, o ne a ba raya a re: “Ke ka ntlha yang fa lo nteka? Ntlisetseng denario* gore ke e bone.”
16 Ba ne ba e tlisa, mme o ne a ba raya a re: “Setshwantsho seno le mokwalo ono ke tsa ga mang?” Ba ne ba mo raya ba re: “Ke tsa ga Kaesara.”
17 Foo Jesu o ne a ba raya a re: “Duelang Kaesara dilo tsa ga Kaesara,+ mme lo duele Modimo dilo tsa Modimo.”+ Mme ba ne ba mo gakgamalela.
18 Jaanong Basadukae, ba ba reng ga go na tsogo ya baswi,+ ba ne ba tla kwa go ene mme ba mmotsa ba re:+
19 “Moruti, Moshe o ne a re kwalela gore fa monna a swa a tlogela mosadi mme a se na ngwana, morwarraagwe o tshwanetse go nyala mosadi yono gore a tsholele morwarraagwe bana.+
20 Go ne go na le banna ba le supa e le bana ba motho. Wa ntlha o ne a nyala, mme o ne a swa a se na bana.
21 Mme wa bobedi o ne a nyala mosadi yoo mme a swa a se na bana, go ne ga direga jalo le ka wa boraro.
22 Botlhe ka bosupa ba ne ba swa ba se na bana. Morago ga moo, mosadi yoo le ene o ne a swa.
23 Fa baswi ba tsosiwa, o tla nna mosadi wa ga mang? Ka gonne botlhe ba le supa ba ne ba mo nyetse.”
24 Jesu o ne a ba raya a re: “Ga lo itse Dikwalo e bile ga lo itse maatla a Modimo.+ Ke lone lebaka la go bo lo fositse.
25 Ka gonne fa batho ba tsosiwa mo baswing, banna ga ba kitla ba nyala e bile basadi ga ba kitla ba nyalwa, mme ba tla bo ba tshwana le baengele kwa legodimong.+
26 A lo ne lwa se ka lwa bala se se kwadilweng mo bukeng ya ga Moshe ka tsogo ya baswi mo pegong e e buang ka setlhatshana se se mmitlwa, fa Modimo a ne a mo raya a re: ‘Ke nna Modimo wa ga Aborahame le Modimo wa ga Isake le Modimo wa ga Jakobe’?+
27 Ga se Modimo wa baswi, mme ke wa batshedi. Ka jalo, ruri lo fositse.”+
28 Mokwadi mongwe yo o neng a le teng foo mme a ba utlwile ba ganetsana, e bile a itse gore o ne a ba arabile ka tsela e e molemo, o ne a mmotsa a re: “Taelo ya ntlha* mo go tsone tsotlhe ke efe?”+
29 Jesu o ne a mo raya a re: “Ya ntlha ke e e reng, ‘Utlwa, wena Iseraele, Jehofa* Modimo wa rona ke Jehofa* a le mongwe fela,
30 mme o tshwanetse go rata Jehofa,* Modimo wa gago, ka pelo yotlhe ya gago le ka moya otlhe wa gago le ka mogopolo otlhe wa gago le ka nonofo yotlhe ya gago.’+
31 Ya bobedi ke e e reng, ‘O tshwanetse go rata moagelani wa gago jaaka o ithata.’+ Ga go na taelo epe e nngwe e kgolo go feta tseno.”
32 Mokwadi yoo o ne a mo raya a re: “Moruti, o buile sentle go dumalana le boammaaruri, ‘Ene o Mongwe fela, e bile ga go na ope yo mongwe kwantle ga gagwe’;+
33 mme go mo rata ka pelo yotlhe, le ka tlhaloganyo yotlhe, le ka nonofo yotlhe, le go rata moagelani jaaka motho a ithata go botlhokwa thata go feta go ntsha ditlhabelo tse di fisiwang di feletse le ditlhabelo tse dingwe.”+
34 E re ka Jesu a ne a lemoga gore o arabile ka botlhale, o ne a mo raya a re: “Ga o kgakala thata le Bogosi Jwa Modimo.” Mme ga go na ope yo o ileng a nna le sebete sa go tlhola a mmotsa dipotso.+
35 Le fa go ntse jalo, fa Jesu a ntse a ruta mo tempeleng, o ne a re: “Go tla jang gore bakwadi ba bo ba re Keresete ke morwa Dafide?+
36 Dafide o ne a bua jaana a tlhotlhelediwa ke moya o o boitshepo,+ ‘Jehofa* o ne a raya Morena wa me a re: “Nna ka fa seatleng sa me sa moja go fitlha ke dira gore baba ba gago ba nne ka fa tlase ga dinao tsa gago.”’+
37 Dafide ka boene o mmitsa Morena, ka jalo, go tla jang gore e bo e le morwawe?”+
Mme batho ba bantsintsi ba ne ba mo reeditse ka boitumelo.
38 Mme fa a ntse a ruta o ne a tswelela a re: “Elang tlhoko bakwadi ba ba ratang go tsamayatsamaya ba apere diaparo tse ditelele e bile ba rata go dumedisiwa fa ba le kwa marekisetsong+
39 gape ba rata ditulo tse di kwa pele mo disinagogeng le manno a a kgethegileng fa ba le kwa dijong tsa maitseboa.+
40 Ba tsaya matlo* a batlholagadi, e bile ba dira dithapelo tse ditelele gore ba bonwe ke batho.* Batho bano ba tla atlholwa botlhoko tota.”
41 Mme o ne a nna fa fatshe go lebagana le matlole a matlotlo+ a bo a leba ka kelotlhoko fa boidiidi jwa batho ba ntse ba tsenya madi mo matloleng a matlotlo, mme batho ba le bantsi ba ba humileng ba ne ba tsenya madi a tshipi a le mantsi.+
42 Jaanong motlholagadi mongwe wa mohumanegi o ne a tla a bo a tsenya madinyana a le mabedi a tshipi a boleng jo bo kwa tlase thata.*+
43 Ka jalo, o ne a biletsa barutwa ba gagwe kwa go ene mme a ba raya a re: “Ammaaruri ke a lo bolelela, motlholagadi yono wa mohumanegi o tsentse madi a a fetang a botlhe ba a tsentseng mo matloleng a matlotlo.+
44 Ka gonne botlhe ba tsentse se se tswang mo dikhumong tsa bone, mme ene le fa a sotlega,* o tsentse madi otlhe a a nang le one, e leng sotlhe se a itshedisang ka sone.”+
Dintlha Tse di Kwa Tlase
^ Kgotsa “diterebe; moretlwa.”
^ Seger., “tlhogo ya sekhutlo.”
^ Bona Dintlha A5.
^ Seger., “ka fa molaong.”
^ Kgotsa “lekgetho la tlhogo,” go tewa lekgetho le le ntshiwang ke mongwe le mongwe.
^ Bona Dintlha B14.
^ Kgotsa “ya botlhokwa thata.”
^ Bona Dintlha A5.
^ Bona Dintlha A5.
^ Bona Dintlha A5.
^ Bona Dintlha A5.
^ Kgotsa “dithoto.”
^ Kgotsa “e le seipato.”
^ Seger., “dilepetone tse pedi, e leng kwaderane.” Bona Dintlha B14.
^ Kgotsa “a humanegile.”
