Efangele ya ga Mathaio 28:1-20
28 Mo mosong wa letsatsi la ntlha la beke morago ga Sabata, Marea Magadalena le Marea yo mongwe ba ne ba tla go bona lebitla.+
2 Go ne go nnile le thoromo e kgolo ya lefatshe ka gonne moengele wa ga Jehofa* o ne a fologile kwa legodimong mme a ya kwa lebitleng a bo a pitikolola leje le legolo. Mme moengele yono o ne a nna mo godimo ga lone.+
3 Tsela e a lebegang ka yone e ne e tshwana le legadima, le diaparo tsa gagwe di ne di le ditshweu jaaka kapoko.+
4 E re ka balebeledi ba ne ba mo tshaba, ba ne ba roroma thata ba bo ba nna jaaka batho ba ba suleng.
5 Moengele o ne a raya basadi bao a re: “Lo se ka lwa tshoga, ka gonne ke a itse gore lo batla Jesu yo o neng a bolaelwa mo koteng.+
6 Ga a yo fano, ka gonne o tsositswe, fela jaaka a ile a bua.+ Tlang, bonang lefelo le mmele wa gagwe o neng o laditswe mo go lone.
7 Ka jalo, itlhaganeleng lo ye go bolelela barutwa ba gagwe gore o tsositswe mo baswing, mme o setse a le mo tseleng o ya kwa Galalea.+ Lo tla mmona teng. Lo gopoleng se ke se lo boleletseng.”+
8 Ka jalo, ba ne ba tswa ka bonako mo lebitleng la kgakologelo ba tshogile e bile ba itumetse thata mme ba taboga ba ya go bolelela barutwa ba gagwe.+
9 Ka yone nako eo, Jesu o ne a ba kgatlhantsha a bo a re: “Dumelang!” Ba ne ba mo atamela, ba mo tshwara dinao ba bo ba obama* fa pele ga gagwe.
10 Go tswa foo Jesu o ne a ba raya a re: “Lo se ka lwa tshoga! Tsamayang lo ye go bolelela bomorwarre gore ba ye kwa Galalea, mme ba tla mpona gone.”
11 Fa ba ntse ba le mo tseleng, bangwe ba badisa+ ba ne ba tsena mo motseng mme ba bolelela baperesiti ba bagolo dilo tsotlhe tse di neng di diragetse.
12 E rile baperesiti ba bagolo ba sena go buisana le baeteledipele ba ne ba dumalana, ba bo ba naya masole ano dishekele tsa selefera di le dintsi
13 ba bo ba ba raya ba re: “ Lo bue lo re, ‘Barutwa ba gagwe ba ne ba tla bosigo mme ba mo utswa re sa ntse re robetse.’+
14 Mme fa molaodi a ka utlwa seno, re tla mo tlhalosetsa kgang eno* mme ga lo kitla lo tlhoka go tshwenyega.”
15 Ka jalo, ba ne ba tsaya dishekele tsa selefera mme ba dira jaaka ba laetswe, mme kgang eno e ne ya itsege thata mo Bajudeng go fitlha mo letsatsing leno.
16 Le fa go ntse jalo, barutwa ba ba 11 ba ne ba ya kwa Galalea+ kwa thabeng e Jesu a neng a ba boleletse gore ba ye kwa go yone.+
17 Fa ba mmona ba ne ba khubama,* mme gone bangwe ba ne ba belaela gore a tota ke ene.
18 Jesu o ne a ba atamela a bo a bua le bone, a re: “Ke neilwe taolo yotlhe kwa legodimong le mo lefatsheng.+
19 Ka jalo, yang kwa bathong ba ditšhaba tsotlhe mme lo ba dire barutwa,+ lo ba kolobetse+ mo leineng la Rara le la Morwa le la moya o o boitshepo,
20 lo ba rute gore ba ikobele dilo tsotlhe tse ke di lo laetseng.+ Mme lo se ka lwa lebala gore ke na le lona malatsi otlhe go fitlha kwa bokhutlong jwa lefatshe leno.”*+
Dintlha Tse di Kwa Tlase
^ Bona Dintlha A5.
^ Kgotsa “ikoba.”
^ Seger., “mo tlhotlheletsa.”
^ Seger., “obama.”
^ Seger., “jwa tsamaiso eno ya dilo.” Bona Ditlhaloso Tsa Mafoko.
