Efangele ya ga Mathaio 3:1-17
3 Moragonyana, Johane+ Mokolobetsi o ne a tla go rera+ mo nageng ya Judea,
2 o ne a re: “Ikwatlhayeng, ka gonne Bogosi jwa magodimo bo atametse.”+
3 Tota e bile, ke ene yo moporofeti Isaia+ a neng a bua ka ene fa a ne a re: “Mongwe o* goa a le kwa nageng a re: ‘Baakanyang tsela ya ga Jehofa!* Tlhamalatsang ditsela tsa gagwe.’”+
4 Jaanong Johane o ne a apara diaparo tsa boboa jwa kamela e bile a ipanta ka lebanta la letlalo mo lothekeng.+ Dijo tsa gagwe e ne e le tsie le tswina ya dinotshe ya naga.+
5 Foo batho ba Jerusalema le ba Judea yotlhe le ba kgaolo yotlhe e e dikologileng Joredane ba ne ba ya kwa go ene,+
6 mme o ne a ba kolobetsa* mo Nokeng ya Joredane,+ ba ipolela maleo a bone phatlalatsa.
7 E rile a bona Bafarasai le Basadukae+ ba le bantsi ba tla kwa lefelong le a kolobetsang mo go lone, o ne a ba raya a re: “Lona bana ba dinoga tse di botlhole,+ ke mang yo o lo tlhagisitseng gore lo tshabe bogale jwa Modimo jo bo tlang?+
8 Ka jalo, ungwang maungo a a bontshang gore lo a ikwatlhaya.
9 Lo se ka lwa ithaya lwa re, ‘Rraarona ke Aborahame.’+ Gonne ke a lo bolelela, Modimo a ka kgona go direla Aborahame bana ka maje ano.
10 Selepe se setse se le mo meding ya ditlhare. Foo setlhare sengwe le sengwe se se sa ungweng maungo a a molemo se tshwanetse go remiwa se bo se latlhelwa mo molelong.+
11 Mme nna, ke lo kolobetsa ka metsi ka gonne lo a ikwatlhaya,+ le fa go ntse jalo, yo o tlang kwa morago ga me o nonofile go mpheta, yo ke sa tshwanelegeng go mo rola ditlhako.*+ Ene yoo o tla lo kolobetsa ka moya o o boitshepo+ le ka molelo.+
12 O tshotse garawe ya gagwe e e olosang, mme o tla phepafatsa seboana sa gagwe ka botlalo, e bile o tla phuthela korong ya gagwe mo mabolokelong, mme mmoko one o tla o ja ka molelo+ o o ka se kang wa timiwa.”
13 Foo Jesu o ne a tswa mo Galalea a ya kwa go Johane kwa Joredane gore Johane a mo kolobetse.+
14 Le fa go ntse jalo, Johane o ne a leka go mo thibela a re: “Ke wena yo o tshwanetseng go nkolobetsa, jaanong goreng o tla mo go nna?”
15 Jesu o ne a mo araba a re: “O se ka wa nthibela gonne ka tsela eno re tla bo re dira se Modimo a se batlang.” Mme Johane o ne a dumela.
16 Fa Jesu a sena go kolobediwa, o ne a tswa mo metsing; mme magodimo a ne a bulega,+ mme o ne a bona moya wa Modimo o fologa jaaka lephoi o bo o tla mo go ene.+
17 Gape lentswe le ne la tswa kwa magodimong+ le re: “Yono ke Morwaake+ yo o rategang, yo ke mo amogetseng.”+
Dintlha Tse di Kwa Tlase
^ Seger., “Lentswe la mongwe le.”
^ Bona Dintlha A5.
^ Kgotsa “ina; thabuetsa.”
^ Seger., “bompaatšhane.”
