Moreri 9:1-18

TSHAMEKA

Botlhe ba na le phelelo e e tshwanang (1-3)
Itumelele botshelo le fa gone o tlile go swa (4-12)
- Baswi ga ba itse sepe (5)
- Ga go na tiro kwa Lebitleng (10)
- Motlha le ditiragalo tse di sa lebelelwang (11)
Gantsi botlhale bo a nyadiwa (13-18)

9 Ka jalo, ke ne ka akanya thata ka seno mme ka swetsa ka gore basiami le ba ba botlhale, mmogo le ditiro tsa bone ba mo diatleng tsa Modimo wa boammaaruri.+ Batho ga ba itse sepe ka lorato le ka letlhoo tse di nnileng teng pele ga bone. ² Botlhe ba na le phelelo e e tshwanang,+ basiami le badirabosula,+ ba ba molemo le ba ba itshekileng le ba ba itshekologileng, ba ba ntshang ditlhabelo le ba ba sa ntsheng ditlhabelo. Yo o molemo o tshwana fela le moleofi; yo o dirang maikano o tshwana fela le yo o tshabang go dira maikano. ³ Seno ke selo se se ngomolang pelo se se diregang mo lefatsheng:* E re ka botlhe ba na le phelelo e e tshwanang,+ dipelo tsa batho di tletse bosula; e bile go na le botsenwa mo dipelong tsa bone fa ba sa ntse ba tshela, go tswa foo ba a swa!* ⁴ Go na le tsholofelo ka ope fela yo o sa ntseng a tshela, ka gonne ntša e e tshelang e botoka go na le tau e e suleng.+ ⁵ Gonne batshedi ba a itse gore ba tla swa,+ mme baswi bone ga ba itse sepe gotlhelele,+ e bile ga ba tlhole ba na le tuelo epe, ka gonne dilo tsotlhe tse di ka gopolwang ka bone di lebetswe.*+ ⁶ Gape, lorato lwa bone le letlhoo la bone le lefufa la bone di setse di nyeletse, e bile ga ba tlhole ba na le seabe sepe mo go se se dirwang mo lefatsheng.*+ ⁷ Tsamaya, o je dijo tsa gago ka boitumelo o bo o nwe beine ya gago ka pelo e e itumetseng,+ ka gonne Modimo wa boammaaruri o setse a itumeletse ditiro tsa gago.+ ⁸ E kete diaparo tsa gago di ka nna di le ditshweu* ka metlha, e bile o se ka wa tlogela go itshasa leokwane mo tlhogong.+ ⁹ Itumelele botshelo le mosadi wa gago yo o mo ratang+ malatsi otlhe a botshelo jwa gago jwa lefela, a Modimo a go a neileng mo lefatsheng, malatsi otlhe a gago a lefela, ka gonne seo ke tuelo* ya gago mo botshelong le mo tirong ya gago e o e dirang ka natla mo lefatsheng.*+ ¹⁰ Sepe fela se o kgonang go se dira,* se dire ka maatla a gago otlhe, ka gonne ga go na tiro kgotsa go dira dithulaganyo kgotsa kitso kgotsa botlhale kwa Lebitleng,*+ kwa o yang gone. ¹¹ Ke ne ka bona selo se sengwe gape mo lefatsheng,* gore ba ba bofefo ga se ka metlha ba fenyang mo lobelong, ba ba maatla ga ba fenye ntwa,+ ba ba botlhale ga se ka metlha ba nnang le dijo, ba ba botlhale ga se ka metlha ba nnang le dikhumo,+ e bile ba ba nang le kitso ga se ka metlha ba atlegang,+ ka gonne botlhe ba diragalelwa ke dilo tse ba sa di lebelelang ka nako e ba sa e lebelelang.* ¹² Gonne motho ga a itse gore o tla welwa ke mathata leng.+ Fela jaaka ditlhapi di tshwarwa ka letlowa le dinonyane di tshwarwa ka serai, ka tsela e e tshwanang batho ba tshwarwa ka nako ya masetlapelo, fa a ba wela ka tshoganyetso. ¹³ Gape ke ne ka ela tlhoko sekai seno se se kgatlhang sa botlhale jo bo mo lefatsheng:* ¹⁴ Go ne go na le motse o monnye o o nang le batho ba le mmalwa; mme kgosi nngwe e e maatla e ne ya tla go o tlhasela, mme ya o lalela e bo e aga lobota lo logolo go o dikologa. ¹⁵ Mo motseng oo, go ne go na le monna mongwe wa mohumanegi mme gone a le botlhale, mme o ne a boloka motse oo ka botlhale jwa gagwe. Le fa go ntse jalo, ga go na ope yo o neng a gakologelwa monna yoo wa mohumanegi.+ ¹⁶ Mme ke ne ka ipolelela go re: ‘Botlhale bo botoka go na le maatla;+ le fa go ntse jalo, botlhale jwa mohumanegi bo a nyadiwa, le mafoko a gagwe ga a tsewe tsia.’+ ¹⁷ Go botoka go reetsa mafoko a a buelwang kwa tlase a ba ba botlhale go na le go reetsa go goa ga motho yo o laolang dieleele. ¹⁸ Botlhale bo botoka go na le dibetsa tsa ntwa, mme moleofi a le mongwe fela a ka senya molemo o mogolo.+