Nahume 1:1-15
1 Molaetsa wa go atlholwa ga Ninife:+ Buka ya ponatshegelo ya ga Nahume* wa Moelekoshe:
2 Jehofa ke Modimo yo o batlang gore batho ba mo obamele a le esi+ le yo o ipusolosetsang;Jehofa o a ipusolosetsa e bile o iketleeleditse go bontsha bogale jwa gagwe.+
Jehofa o ipusolosetsa mo baganetsing ba gagwe,E bile o bolokela baba ba gagwe bogale jwa gagwe.
3 Jehofa ga a galefe ka bonako+ e bile o na le maatla a magolo,+Le fa go ntse jalo, le ka motlha Jehofa ga a ke a tlhoka go otlhaya fa go tshwanela.+
Fa a tsamaya, go tswa phefo e e senyang le setsuatsue,E bile lorole lwa dinao tsa gagwe lo tlhatloga jaaka maru.+
4 O kgalema lewatle+ e bile o a le kgadisa;Gape o dira gore dinoka tsotlhe di kgale.+
Bashana le Karemele di a swaba,+Le malômô* a kwa Lebanona a a swaba.
5 Dithaba di a reketla ka ntlha ya gagwe,Le dithota di a nyerologa.+
Lefatshe le tla fuduega ka ntlha ya sefatlhego sa gagwe,Mmogo le naga le botlhe ba ba nnang mo go yone.+
6 Ke mang yo o ka emang fa pele ga gagwe fa a shakgetse?+
Le gone ke mang yo o ka itshokelang mogote wa bogale jwa gagwe?+
O tla tsholola tšhakgalo ya gagwe jaaka molelo,Mme mafika a tla phatloga ka ntlha ya gagwe.
7 Jehofa o molemo,+ ke kago e e thata mo motlheng wa matshwenyego.+
O itse* ba ba batlang botshabelo mo go ene.+
8 O tla fedisa Ninife* ka morwalela o o gogolang,Mme lefifi le tla latelela baba ba gagwe.
9 Lona lo tla logela Jehofa leano lefe le le bosula?
O baka tshenyo e kgolo.
Ga a kitla a tlhoka go senya sepe gape.+
10 Gonne ba logagane jaaka mmitlwa,E bile ba tshwana le batho ba ba tagilweng ke bojalwa;*Mme ba tla lailwa ke molelo fela jaaka lotlhaka lo lo omeletseng lo lailwa ke molelo.
11 Mo go wena go tla tswa mongwe yo o logelang Jehofa leano le le bosula,Yo o nayang kgakololo e e se nang mosola.
12 Seno ke se Jehofa a se buang:
“Le fa gone ba ne ba nonofile thata e bile ba le bantsintsi,Ba tla kgaolwa mme ba tla nyelela.*
Ke go bogisitse,* mme ga nkitla ke tlhola ke go bogisa gape.
13 Mme jaanong ke tla robaganya jokwe ya gagwe ke e tlosa mo go wena,+E bile dikgole tse di mo go wena ke tla di kgaola sebedi.
14 Jehofa o laetse jaana ka ga gago,*‘Leina la gago ga le kitla le tsweledisiwa.
Ke tla senya ditshwantsho tse di betlilweng le difikantswe tse di bopilweng tse di mo ntlong* ya medimo ya lona.
Ke tla go direla lebitla, ka gonne o a nyatsega.’
15 Bonang! Mo dithabeng go na le dinao tsa yo o tlisang dikgang tse di molemo,Yo o itsiseng kagiso.+
Keteka meletlo ya gago,+ wena Juda, duela maikano a gago,Ka gonne motho yo o se nang mosola ga a kitla a tlhola a go ralala gape.
O tla senngwa.”
Dintlha Tse di Kwa Tlase
^ Mo go kayang “Mogomotsi.”
^ Kgotsa “dithunya.”
^ Kgotsa “O tlhokomela.”
^ Seheb., “lefelo la gagwe.”
^ Kgotsa “bojalwa jwa korong.”
^ Kgotsa gongwe “mme o tla feta.”
^ Go tewa Juda.
^ Go tewa Asiria.
^ Kgotsa “mo tempeleng.”
