Ruthe 3:1-18
3 Matsalaagwe e bong Naomi o ne a mo raya a re: “Morwadiaka, a ga ke a tshwanela go go batlela legae,*+ gore dilo di go tsamaele sentle?
2 Boase ke wa losika lwa rona.+ Ke ene yo o neng o na le basetsana ba gagwe. Mo bosigong jono, o tla bo a olosa barele* kwa seboaneng.
3 O tlhape o bo o itshase leokwane le le nkgang monate; o apare sentle* mme o ye kwa seboaneng. O se ka wa dira gore monna yono a go lemoge go fitlha a fetsa go ja le go nwa.
4 Fa a ya go robala, o ele tlhoko gore o robala fa kae; mme o ye go mo apola kwa dinaong o bo o robala gone. O tla go bolelela se o tshwanetseng go se dira.”
5 Ruthe o ne a mo araba a re: “Ke tla dira sotlhe se o se mpolelelang.”
6 Ka jalo, o ne a ya kwa seboaneng a bo a dira sotlhe se matsalaagwe a neng a se mo laetse.
7 Boase ene o ne a ja, a nwa e bile o ne a itumetse. Go tswa foo, o ne a ya go robala go bapa le mokoa wa mabele. Morago ga foo, Ruthe o ne a tla a nanabela mme a mo apola kwa dinaong a robala.
8 Mme bosigogare monna yono o ne a simolola go roroma, a inamela kwa pele, mme o ne a bona mosadi a rapame fa dinaong tsa gagwe.
9 O ne a re: “O mang?” Mme ene a re: “Ke nna Ruthe lelata la gago. Phuthololela seaparo* sa gago mo godimo ga lelata la gago ka gonne o morekolodi.”+
10 Boase o ne a mo raya a re: “E kete Jehofa a ka go segofatsa, morwadiaka. O bontshitse lorato lo lo sa kgaotseng mo lekgetlong leno la bofelo go feta mo go la ntlha,+ ka go sa latele makawana, a ka tswa a humile kgotsa a humanegile.
11 Mme jaanong morwadiaka, o se ka wa boifa. Ke tla go direla sengwe le sengwe se o se buang,+ ka gonne mongwe le mongwe mo motseng* o a itse gore o mosadi yo o molemo thata.
12 Le fa gone ke le morekolodi,+ go na le morekolodi yo mongwe yo o amanang thata le lona ka losika go na le nna.+
13 Robala fano bosigong jono, mme fa e le gore o tla go rekolola mo mosong, go siame! A a go rekolole.+ Mme ke ikana ka Jehofa Modimo yo o tshelang gore fa a sa batle go go rekolola, nna ka bonna ke tla go rekolola. Robala fano go fitlha mo mosong.”
14 Ka jalo, o ne a robala fa dinaong tsa gagwe go fitlha mo mosong mme a tsoga go sa ntse go le lefifi gore a se ka a bonwa ke ope. Boase o ne a re: “Go se ka ga itsiwe gore go na le mosadi yo o neng a tlile mo seboaneng.”
15 Gape o ne a re: “Tlisa letsela le o le apereng, mme o le phutholole.” Ka jalo, o ne a le phutholola mme Boase a tshela dilekanyo di le thataro* tsa barele mo go lone a bo a le mo naya, go tswa foo o ne a ya kwa motseng.
16 O ne a ya kwa go matsalaagwe, yo o neng a re: “O tsamaile jang* morwadiaka?” O ne a mmolelela sotlhe se monna yono a se mo diretseng.
17 Gape Ruthe o ne a re: “O nneile dilekanyo tseno tse thataro tsa barele a bo a nthaya a re, ‘O se ka wa ya kwa go matsalaago o iphotlhere.’”
18 Foo Naomi o ne a re: “Nna fano morwadiaka, go fitlha o itse gore kgang eno e tla felela jang, ka gonne monna yono o tla dira sotlhe se a ka se kgonang go rarabolola kgang eno gompieno.”
Dintlha Tse di Kwa Tlase
^ Seheb., “lefelo la boikhutso.”
^ Semela se se tshwanang le korong.
^ Kgotsa “o kgabe.”
^ Kgotsa “ntlha ya seaparo.”
^ Seheb., “mo kgorong yotlhe ya batho ba gaetsho.”
^ Gongwe dilekanyo tse thataro tsa sea kgotsa 44 L. Bona Dintlha B14.
^ Seheb., “O mang?”
