Sefela sa Difela 1:1-17
-
Sefela sa difela (1)
-
Mosetsana wa Moshulame (2-7)
-
Bomorwadia Jerusalema (8)
-
Kgosi (9-11)
-
“Re tla go direla dibenyane tsa gauta” (11)
-
-
Mosetsana wa Moshulame (12-14)
-
“Moratiwa wa me o tshwana le kgetsi ya borekhu jo bo nkgang monate” (13)
-
-
Modisa (15)
-
“O montle moratiwa”
-
-
Mosetsana wa Moshulame (16, 17)
-
“O montle moratiwa” (16)
-
1 Sefela sa difela,* sa ga Solomone:+
2 “E kete o ka ntshuna,Ka gonne ditsela tse o bontshang lorato ka tsone di botoka go gaisa beine.+
3 Leokwane le o le itshasitseng le nkga monate.+
Leina la gago le tshwana le leokwane le le nkgang monate le le itshelwang.+
Ke gone ka moo makgarebe a go ratang.
4 Ntseye o tsamaye le nna;* a re siane.
Kgosi e ntlisitse mo diphaposing tsa yone tse di kwa teng!
A re itumele mmogo.
A re bake* ditsela tse o bontshang lorato ka tsone go gaisa beine.
Go a tshwanela go bo ba* go rata.
5 Ke motshwana,* mme gone ke montle, lona bomorwadia Jerusalema,Jaaka ditente tsa Kedare,+ jaaka matsela a tente+ ya ga Solomone.
6 Lo se ka lwa ntlhoma matlho ka gonne ke le motshwana,Ka gonne letsatsi le mpabotse.
Bokgaitsadiake ba ne ba nkgalefela;Ba ne ba ntlhoma gore ke nne motlhokomedi wa masimo a morara,*Le fa ke ne ke sa kgone go tlhokomela tshimo ya me ya morara.
7 Wena yo ke go ratang thata, mpoleleleKwa o disang letsomane la gago gone,+Kwa o le bothisang gone motshegare.
Goreng ke tshwanetse go nna jaaka mosadi yo o ikhurumeditseng ka letsela*Fa gare ga matsomane a balekane ba gago?”
8 “Fa e le gore ga o itse, wena yo montle thata go gaisa basadi ba bangwe botlhe,Sala motlhala wa letsomane moragoMme o fudise dipotsane tsa gago gaufi le ditente tsa badisa.”
9 “Moratiwa wa me, ke go tshwantshitse le pitse nngwe* e namagadi e e mo dikareng tsa ga Faro.+
10 Marama a gago a kgabisitswe ka dibenyane,*Molala wa gago one o kgabisitswe ka dibaga.
11 Re tla go direla dibenyane* tsa gautaTse di kgomareditsweng selefera.”
12 “Fa kgosi e nna fa tafoleng ya yone e e sediko,Senkgisamonate*+ sa me se ntsha lonko lwa sone lo lo monate.
13 Mo go nna, moratiwa wa me o tshwana le kgetsi ya borekhu jo bo nkgang monate*+E e nnang fa gare ga mabele a me bosigo.
14 Mo go nna, moratiwa wa me o tshwana le semela sa hena se se nkgang monate+Fa gare ga masimo a morara a Ene-gedi.”+
15 “O montle moratiwa.
O montle tota. Matlho a gago ke a maeba.”+
16 “O montle moratiwa, e bile o a itumedisa.+
Bolao jwa rona bo mo gare ga matlhare a ditlhare.
17 Dikota tsa ntlo* ya rona ke tsa masedara,Ditlhomeso tsa rona tsone ke tsa ditlhare tsa mofira.
Dintlha Tse di Kwa Tlase
^ Kgotsa “Sefela se se di gaisang tsotlhe.”
^ Seheb., “Nkgoge ka fa morago ga gago.”
^ Kgotsa “umake.”
^ Go tewa makgarebe.
^ Seheb., “montsho.”
^ Kgotsa “diterebe; moretlwa.”
^ Kgotsa “letsela la khutsafalo.”
^ Kgotsa “ya me.”
^ Kgotsa gongwe “a mantle mo gare ga metshopho ya moriri.”
^ Kgotsa “dirwalo tsa tlhogo.”
^ Seheb., “Naredo.”
^ Seheb., “mera.” Bona Ditlhaloso Tsa Mafoko.
^ Kgotsa “ntlo e kgolo.”
