Tito 2:1-15
2 Le fa go ntse jalo, wena tswelela o bua dilo tse di tsamaisanang le thuto e e boammaaruri.*+
2 A banna ba ba godileng ba nne le mekgwa e mentle, ba dire dilo ba tlhoafetse, ba akanyetse dilo sentle, ba nonotshe tumelo ya bone, ba rate ba bangwe e bile ba itshokele mathata.
3 Ka tsela e e tshwanang, a basadi ba ba godileng ba itshware ka tsela e e bontshang gore ba boifa Modimo, e se ba ba senyang batho maina, ba sa tshwakgolwa ke beine, ba ruta se se molemo,
4 gore ba gakolole* basadi ba basha go rata banna ba bone, go rata bana ba bone,
5 gore ba akanyetse dilo sentle, ba nne phepa mo boitsholong, ba tlhokomele magae a bone, ba itshware sentle, ba ikobele banna ba bone,+ gore lefoko la Modimo le se ka la buiwa maswe.
6 Ka tsela e e tshwanang, tswelela o rotloetsa makawana gore a akanyetse dilo sentle,+
7 o nne sekao mo ditirong tse di molemo mo go sengwe le sengwe. O rute dilo tse di siameng* o tlhoafetse,+
8 o bue puo e e molemo* e e ka se kang ya bonwa molato;+ gore ba ba ganetsang ba tlhabiwe ke ditlhong, go se na sepe se se sa siamang* se ba ka se buang ka rona.+
9 A batlhanka ba ikobele beng ba bone mo dilong tsotlhe,+ ba leke go ba itumedisa, ba sa arabisane le bone,
10 ba sa ba utswetse,+ mme ba ikanyega mo dilong tsotlhe gore mo go sengwe le sengwe ba kgabise thuto ya Mmoloki wa rona, e bong Modimo.+
11 Gonne Modimo o ne a bontsha bopelonomi jwa gagwe jo bogolo,* jo bo dirang gore batho ba mefuta yotlhe ba bolokwe.+
12 Bo re ruta gore re gane bosula le dikeletso tsa lefatshe+ mme re akanyetse dilo sentle, re tshele ka tsela e e tshwanetseng le gore re obamele Modimo mo nakong eno.*+
13 Mme re letetse gore tsholofelo e e itumedisang+ e diragadiwe le gore kgalalelo ya Modimo yo mogolo le Mmoloki wa rona e bong Jesu Keresete e bonale.
14 O ne a re swela+ gore a re golole*+ mo dilong tse di bosula* a bo a re dira phepa gore re nne batho ba gagwe ba ba kgethegileng, ba ba tlhagafaletseng go dira ditiro tse di molemo.+
15 Nna o rute dilo tseno, o rotloetse* o bo o kgaleme ka gonne o na le taolo ya go dira jalo.+ O se ka wa letla motho ope a go nyatsa.
Dintlha Tse di Kwa Tlase
^ Kgotsa “e e mosola; e e solegelang molemo.”
^ Kgotsa “tsibose; katise.”
^ Kgotsa gongwe “O rute ka boitsheko.”
^ Kgotsa “e e boammaaruri; e e solegelang molemo.”
^ Kgotsa “se se bosula.”
^ Bona Ditlhaloso Tsa Mafoko.
^ Seger., “mo tsamaisong eno ya dilo.” Bona Ditlhaloso Tsa Mafoko.
^ Seger., “rekolole.”
^ Seger., “mo mofuteng mongwe le mongwe wa go tlhoka molao.”
^ Kgotsa “kgothatse.”
