Kgaolo 4

Ke Eng fa Mmè le Rre ba Ile ba Kgaogana?

“Letsatsi le Rre a re tlogetseng ka lone ke ne ke le kwa lapeng le Mmè. Ke ne ke le dingwaga di le thataro fela, ka jalo ke ne ke sa tlhaloganye gore go direga eng. Ke ne ke ntse fa fatshe ke lebile thelebishene, mme ke ne ka utlwa mmè a sisapelo a kopa rre gore a se ka a tsamaya. O ne a tla mo phaposing e ke neng ke le mo go yone a tshotse kgetsi ya diaparo, a khubama a bo a nkatla a re, ‘Papa o go rata fela thata.’ A bo a tswa a tsamaya. Go ne ga feta lobaka lo loleele ke sa bone rre. Fa e sa le ka nako eo, ke nna ke tshogile gore Mmè le ene a ka ntlogela.”—Elaine, 19.

 FA BATSADI ba gago ba tlhalana, go ka nna ga bonala e kete ke bokhutlo jwa lefatshe mme ga o na go tlhola o itumela gape. Gantsi seno se dira gore o ikutlwe o imetswe gonne o tlhabilwe ke ditlhong, o galefile, o tlaletswe, o boifa gore o ka nna wa latlhiwa, o ikutlwa molato, o tshwenyegile thata mo maikutlong e bile o latlhegetswe fela thata—o ka nna wa bo wa nna le keletso ya go ipusolosetsa.

Gongwe ke tsela e le wena o ikutlwang ka yone fa e le gore batsadi ba gago ba sa tswa go kgaogana, mme seo ga se gakgamatse ka gonne Mmopi wa rona o ne a rulagantse gore bana ba godisiwe ke batsadi ba bone boobabedi. (Baefeso 6:1-3) Jaanong o tseetswe tshiamelo ya go bona motsadi wa gago letsatsi le letsatsi, gongwe e le yo o neng o mo rata thata. Daniel yo batsadi ba gagwe ba ileng ba kgaogana a le dingwaga di le supa a re: “Ruri ke ne ke tlotla rre fela thata e bile ke batla go nna le ene. Mme Mmè ke ene a neng a newa tetla ya semolao ya go nna le rona.”

Lebaka La go Bo Batsadi ba Kgaogana

Gantsi fa batsadi ba kgaogana bana ba sala ba gakgametse gonne ba ntse ba sa itse gore batsadi ba na le mathata. Rachel yo o neng a le dingwaga di le 15 fa batsadi ba gagwe ba tlhalana a re, “Ke ne ke gamaregile. Ke ne ke tlhola ke akanya gore ba ratana fela thata.” Tota le fa batsadi ba a tle ba omane, bana ba ka nna ba utlwa botlhoko thata fa ba bona ba kgaogana gonne ba sa lebelela seo!

Gantsi batsadi ba kgaogana gonne mongwe wa bone a ile a dira boitsholo jo bo sa siamang jwa tlhakanelodikobo. Mo maemong ao, Modimo o letla molekane yo o seng molato gore a ka tlhala mme a gololesege go tsena mo lenyalong gape. (Mathaio 19:9) Mo maemong a mangwe, “tšhakgalo le go goa thata” di ile tsa felela ka tirisodikgoka e e neng ya dira gore motsadi yo mongwe a boife gore e ka tsenya botshelo jwa gagwe le jwa bana mo kotsing.—Baefeso 4:31.

Mme gone, ke boammaaruri gore banyalani ba bangwe ba kgaogana ka mabaka a a sa utlwaleng. Go na le gore ba rarabolole mathata a bone, ba bangwe bone ba a bo ba batla fela go ikgotsofatsa ba bo ba tlhala ba bolela gore ga ba a “itumela” kgotsa “ga ba tlhole ba rata molekane wa bone.” Seno ga se itumedise  Modimo yo o ‘tlhoileng tlhalo’ ya mofuta oo. (Malaki 2:16) Jesu o ile a re go tla nna le mathata mo malapeng mangwe fa molekane yo mongwe e nna Mokeresete.—Mathaio 10:34-36.

Go sa kgathelesege gore boemo e ka tswa e le bofe, lebaka la go bo batsadi ba gago ba ile ba tlhopha go se go bolelele ka mathata a bone kgotsa go se go neye dikarabo tse di go kgotsofatsang fa o botsa ka go tlhalana ga bone, ga go reye gore ga ba go rate. E re ka le bone ba utlwile botlhoko, ba ka tswa ba thatafalelwa ke go bua kaga go tlhalana ga bone. (Diane 24:10) Gape ba ka tswa ba fitlhela go le thata e bile go ba tlhabisa ditlhong go dumela gore boobabedi ba paletswe.

Se o Ka se Dirang

Itse se o se boifang. E re ka tlhalo e ka fetola botshelo jwa gago fela thata, o ka nna wa iphitlhela o tshwenyega ka dilo tse pele o neng o sa re sepe ka tsone. Le fa go ntse jalo, fa o itse dilo tse o di boifang, o ka nna wa kgona go laola tsela e o ikutlwang ka yone ka dilo tseno. Fa tlase fano tshwaya ka ✔ go bapa le selo se o se boifang thata kgotsa tlhalosa se wena o se boifang ka go se kwala go bapa le “Tse dingwe.”

□ Motsadi wa me yo mongwe le ene o tla ntlogela.

□ Lelapa la gaetsho le ka se nne le madi a a lekaneng go itshedisa.

□ Gongwe ke nna ke dirileng gore ba tlhalane.

□ Le nna fa nka nyala, lenyalo la me le tla thubega.

□ Tse dingwe ․․․․․

Bua ka dilo tse di go tshwenyang. Kgosi Solomone o ile a re go na le “nako ya go bua.” (Moreri 3:7) Ka jalo leka go batla nako e e tshwanetseng ya go bua le batsadi ba gago ka dilo tse o di boifang tse o di tlhalositseng kwa godimo. Ba bolelele kafa o hutsafetseng kgotsa kafa o etsaetsegang ka gone. Gongwe ba tla kgona go go tlhalosetsa se se diregang mme seo sa fokotsa tlhobaelo ya gago. Fa batsadi ba gago ba sa batle kgotsa ba sa kgone go go thusa ka nako eo, gongwe o ka bulela tsala nngwe e o e ikanyang mafatlha.  Tsaya kgato pele go atamela motho yoo. Go nna le mongwe yo o ka go reetsang go ka nna ga go imolola fela thata.—Diane 17:17.

Mo godimo ga tsotlhe, e re ka Rrago yo o kwa legodimong e le “Moutlwi wa thapelo,”o iketleeleditse go go reetsa. (Pesalema 65:2) Mo tshololele pelo ya gago, “ka gonne o a [go] kgathalela.”—1 Petere 5:7.

Se o Sa Tshwanelang go se Dira

O se ka wa boloka sekgopi. Daniel yo o umakilweng kwa godimo a re: “Batsadi ba me ba ne ba le bogagapa. Ba ne ba sa akanye gotlhelele ka rona le kafa se ba neng ba se dira se tla re amang ka gone.” Tsela e Daniel a ikutlwang ka yone e a tlhaloganyesega e bile e ka tswa e le boammaaruri. Mme gone, o ne o ka araba jang dipotso tse di latelang? Kwala dikarabo tsa gago mo meleng e e fa tlase.

Ke kotsi efe e Daniel a neng a ka lebana le yone fa a nna a bolokile sekgopi e bile a tletse bogale? (Bala Diane 29:22.) ․․․․․

Le fa gone go ka tswa go le thata, ke eng fa go ka nna molemo gore Daniel a leke go itshwarela batsadi ba gagwe ka kutlobotlhoko e ba mmaketseng yone? (Bala Baefeso 4:31, 32.) ․․․․․

Boammaaruri jo bo ka se ganediweng jo bo mo go Baroma 3:23 bo ka thusa Daniel jang go leba batsadi ba gagwe ka tsela e e siameng? ․․․․․

 Tila boitshwaro jo bo ka go tsenyang mo mathateng. Denny o gakologelwa jaana: “Fa batsadi ba me ba sena go tlhalana, ke ne ke utlwile botlhoko e bile ke tshwenyegile thata mo maikutlong. Ke ne ka simolola go nna le mathata kwa sekolong mme ke ne ka se ka ka falola dithuto tsa me mo ngwageng oo. Morago ga moo . . . Ke ne ka simolola go itira rametlae mo tlelaseng le go rata dintwa.”

O akanya gore Denny o ne a leka go fitlhelela eng ka go itira rametlae mo tlelaseng? ․․․․․

Ke ka ntlha yang fa a ile a simolola go rata dintwa? ․․․․․

Fa o ikutlwa o batla go otlhaya batsadi ba gago ka go itshwara ka tsela e e sa siamang, molaomotheo o o mo go Bagalatia 6:7 o  ka go thusa jang gore o tswelele o leba dilo ka tsela e e tshwanetseng? ․․․․․

Se o Ka se Lebelelang mo Isagweng

Kgobalo ya mmatota e e jaaka go robega lerapo, e ka tsaya dibeke kgotsa dikgwedi gore e fole sentle. Ka tsela e e tshwanang, kgobalo ya maikutlo le yone e tsaya nako gore e fole. Baitse bangwe ba dumela gore kutlobotlhoko e e bakiwang ke tlhalo e ka tsaya dingwaga di ka nna tharo gore e fele. Seno se ka lebega e le lobaka lo loleele mme se lebale gore go na le dilo di le dintsi tse di tshwanetseng go direga pele ga botshelo jwa gago bo ka ritibala gape.

Sa ntlha, thulaganyo ya mo lelapeng—e e sentsweng ke tlhalo—e tshwanetse go baakanngwa gape. Gape go tla tsaya nako pele ga batsadi ba gago ba ka ritibala mo maikutlong. Ka nako eo, gongwe ke gone ba ka kgonang go go neela kemonokeng e o e tlhokang. Le fa go ntse jalo, fa botshelo jwa gago bo siama gape, o tla simolola go ikutlwa botoka.

BALA GO YA PELE KA KGANG ENO MO BOLUMONG YA 2, KGAOLO 25

MO KGAOLONG E E LATELANG

A o tlhobaediwa ke go bo motsadi wa gago a tsene mo lenyalong gape? O ka lebana jang le seemo seo?

KDITEMANA TSA BOTLHOKWA

“Go na le . . . nako ya go fodisa.”—Moreri 3:1, 3.

KAKANTSHO

Fa e le gore batsadi ba gago ba tlhalane, gongwe mongwe wa bone kgotsa boobabedi ba dirile diphoso. Leka go lemoga diphoso tseo gore o kgone go di tila fa e le gore mo isagweng o tlhopha go tsena mo lenyalong.—Diane 27:12.

A O NE O ITSE GORE . . . ?

O ka kgona go nna le lenyalo le le itumetseng le fa batsadi ba gago ba ne ba sa itumela mo lenyalong la bone.

SE KE SE IKAELETSENG!

Motho yo nka mo tlhalosetsang dilo tse ke di boifang ke (kwala leina la mongwe yo o mo tshepang yo o ka ratang go tlotla le ene) ․․․․․

Fa ke ikutlwa ke batla go otlhaya batsadi ba me ka go itshwara ka tsela e e sa siamang, nka laola boitshwaro joo ka go dira dilo tse di latelang: ․․․․․

Se nka ratang go se botsa batsadi ba me ka kgang eno ke gore ․․․․․

O AKANYANG?

● Ke ka ntlha yang fa batsadi ba gago ba ikgogona go bua le wena ka tlhalo ya bone?

● Ke eng fa go le botlhokwa go itse gore tlhalo ke kgotlhang e e leng fa gare ga batsadi ba gago—e seng le wena?

[Mafoko a a mo go tsebe 32]

“Fa mama a sena go re tlogela, ke ne ke tshwenyegile thata mo maikutlong e bile ke lela letsatsi le letsatsi. Le fa go ntse jalo, ke ne ke rapela ka metlha, ke tshwaregile ka go thusa ba bangwe e bile ke atamalane le ditsala tse di godileng semoyeng. Ke dumela gore ke tsela e Jehofa Modimo a neng a nthusa ka yone gore ke lebane le seemo seo.’’—Natalie

[Setshwantsho mo go tsebe 33]

Go amogela kgang ya go tlhalana ga batsadi ba gago go tshwana le go fola fa o robegile letsogo—go botlhoko tota mme kgabagare o tla fola