SEBOPIWA sa semoya se se bidiwang Mikaele ga se umakiwe gantsi mo Baebeleng. Le fa go ntse jalo, fa se umakiwa golo gongwe, se a bo se tshwaregile ka tiro nngwe e e rileng. Mo bukeng ya Daniele, Mikaele o lwa le baengele ba ba boikepo; mo lekwalong la Jude, o ngangisana le Satane; mme mo go Tshenolo, o lwa le Diabolo le madimona a gagwe. Ka go sireletsa bobusi jwa ga Jehofa le go lwantsha baba ba Modimo, Mikaele o tshelela se se kaiwang ke leina la gagwe—“Ke Mang yo o Tshwanang le Modimo?” Mme gone Mikaele ke mang?

Ka dinako tse dingwe, batho ba nna le maina a le mmalwa. Ka sekai, leina le lengwe la ga Jakobe e bong tlhogo ya lotso ke Iseraele, mme le lengwe la ga moaposetoloi Petere ke Simone. (Genesise 49:1, 2; Mathaio 10:2) Ka tsela e e tshwanang, Baebele e supa gore Mikaele ke leina le lengwe la ga Jesu Keresete la pele a tla go tshela mo lefatsheng le morago ga moo. Mma re sekaseke mabaka mangwe a Dikwalo a a dirileng gore re fitlhelele tshwetso eno.

Moengele yo Mogolo. Lefoko la Modimo le bua ka Mikaele “moengele yo mogolo.” (Jude 9) Mafoko a a reng ‘moengele yo mogolo’ mo Baebeleng a tlhaga mo bongweng fela, ga a ke a tlhaga a le mo bontsing, jaaka ‘baengele ba bagolo.’ Seno se raya gore go na le moengele a le mongwe fela yo e leng ‘moengele yo mogolo.’ Mo godimo ga moo, Jesu ke ene fela a amanngwang le ditiro tse di dirwang ke moengele yo mogolo. Bathesalonika wa Ntlha 4:16 e tlhalosa jaana ka Morena Jesu Keresete yo o tsositsweng mo baswing: “Morena ka boene o tla fologa kwa legodimong ka  mokgosi wa taelo, ka lentswe la moengele yo mogolo.” Ka jalo, lentswe la ga Jesu le tlhalosiwa e le la moengele yo mogolo. Ka jalo, temana eno e raya gore Jesu ka boene ke Mikaele moengele yo mogolo.

Moeteledipele wa Mophato wa Masole. Baebele e tlhalosa gore “Mikaele le baengele ba gagwe ba tlhabana le kgogela . . . le baengele ba yone.” (Tshenolo 12:7) Ka jalo, Mikaele ke Moeteledipele wa mophato wa masole a baengele ba ba ikanyegang. Gape, Tshenolo e tlhalosa Jesu e re ke Moeteledipele wa mophato wa masole a baengele ba ba ikanyegang. (Tshenolo 19:14-16) Mme moaposetoloi Paulo o ne a umaka ka mo go kgethegileng “Morena Jesu” le “baengele ba gagwe ba ba maatla.” (2 Bathesalonika 1:7) Ka jalo, Baebele e bua ka Mikaele le “baengele ba gagwe” le Jesu le “baengele ba gagwe.” (Mathaio 13:41; 16:27; 24:31; 1 Petere 3:22) E re ka go se na gope mo Lefoko la Modimo le supang gone gore go na le mephato e mebedi ya baengele ba ba ikanyegang kwa legodimong—o mongwe e le o o eteletsweng pele ke Mikaele mme o mongwe one o eteletswe pele ke Jesu—go a utlwala go swetsa ka go re Mikaele ga se ope fa e se Jesu Keresete kwa legodimong. *