MO PUONG ya ntlhantlha e Baebele e neng e kwadilwe ka yone, go dirisiwa lefoko la Sehebera e leng sheʼohl′ le le lengwe le le tshwanang le lone la Segerika e leng hai′des ka makgetlo a a fetang 70. Mafoko a mabedi ano a amana le loso. Dithanolo dingwe tsa Baebele di a ranola ka go re “lebitla,” “dihele,” kgotsa “khuti.” Le fa go ntse jalo, mo dipuong di le dintsi, ga go na mafoko a a kgonang go ranola lefoko leno la Sehebera le la Segerika sentle. Ka jalo Thanolo ya Lefatshe le Lesha e dirisa mafoko “Sheole” le “Hadese.” Tota mafoko ano a kaya eng? Mma re sekaseke go bona gore a dirisitswe jang mo ditemaneng tse di farologaneng tsa Baebele.

Moreri 9:10 e tlhalosa jaana: “Ga go na tiro le fa e le go loga maano le fa e le kitso le fa e le botlhale kwa Sheole, lefelo le o yang kwa go lone.” A seno se raya gore Sheole e kaya lebitla le re fitlhileng motho kwa go lone? Nnyaa. Fa Baebele e bua ka lebitla le le rileng, e dirisa mafoko a mangwe a Sehebera le a Segerika, ga e dirise sheʼohl′ le hai′des. (Genesise 23:7-9; Mathaio 28:1) Gape, Baebele ga e dirise lefoko “Sheole” fa e bua ka lebitla le go fitlhilweng batho ba le mmalwa mo go lone, jaaka lebitla le go fitlhelwang maloko a lelapa mo go lone kgotsa lebitla le legolo le go fitlhilweng batho ba le bantsintsi mo go lone.—Genesise 49:30, 31.

Ka jalo go buiwa ka lefelo le le ntseng jang fa go buiwa ka “Sheole”? Lefoko la Modimo le bontsha gore “Sheole,” kgotsa “Hadese,” e kaya sengwe se se fetang lebitla le legolo le go fitlhiwang batho ba le bantsi mo go lone. Ka sekai, Isaia 5:14 e bontsha gore Sheole e ‘bulegile e bile e butse molomo wa yone thata go feta melelwane.’ Le mororo re ka re Sheole e setse e komeditse batho ba ba seng kana ka sepe ba ba suleng, go bonala e sa ntse e batla go kometsa ba bangwe ba bantsi. (Diane 30:15, 16) Sheole ga e tshwane le lefelo la mmatota le go fitlhelwang batho mo go lone, ka gonne lone le kgona go tshola palo e e rileng fela ya batho ba ba suleng, mme ‘Sheole yone ga e kgotsofale.’ (Diane 27:20) Sheole ga e ke e tlala. Bogolo jwa yone ga bo ka ke jwa lekanngwa. Ka jalo, Sheole, kgotsa Hadese, ga se lefelo la mmatota mo lefelong lengwe le le rileng. Go na le moo, ke lefelo la tshwantshetso le bontsi jwa batho ba ba suleng ba robalang mo go lone.

Thuto ya Baebele e e buang ka tsogo ya baswi e re thusa go tlhaloganya bokao jwa “Sheole” le “Hadese” botoka. Lefoko la Modimo  le amanya Sheole le Hadese le mofuta wa loso lo batho ba tla tsosiwang mo go lone. * (Jobe 14:13; Ditiro 2:31; Tshenolo 20:13) Gape, Lefoko la Modimo le bontsha gore ba ba leng mo Sheole, kgotsa mo Hadese, ga se fela ba ba neng ba direla Jehofa mme gape ba akaretsa le ba bangwe ba bantsi ba ba neng ba sa mo direle. (Genesise 37:35; Pesalema 55:15) Ka jalo, Baebele e ruta gore go tlile go nna le “tsogo ya ba ba siameng mmogo le ba ba sa siamang.”—Ditiro 24:15.