LUIS, yo e neng e le losika lwa ga Trujillo, e ne e le motshwaramatlotlo wa lekoko le le busang la sepolotiki, Partido Dominicano (Lekoko la Dominican). Le fa go ntse jalo, Luis o ne a sa beye puso ya ga Trujillo sebete e bile o ne a leka go tlogela tiro ka makgetlo a le mantsi mme mmusaesi o ne a nna a gana.

Trujillo o ne a dira gore bomogolowe Luis ba babedi ba bolawe mme seno se ne sa dira gore Luis a batle go mmolaya. O ne a leka go mmolaya ka makgetlo a mabedi. Luis o ne a batla go bona monna yono a sule, ka jalo o ne a ya go batla thuso kwa go ba ba buang le meya, a ba raya a re: “Ke phologolo e bile o ithaya a re ke ene, ke ene!” O ne a bona buka ya “The Truth Shall Make You Free” mo tafoleng ya ntlo ya mongwe yo o buang le meya, mme a simolola go e bala. O ne a kgatlhilwe thata ke buka eno mo a neng a ya gae ka yone mme morago a swetsa ka go re ke boammaaruri jo a ntseng a bo batla.

 Fa Luis a le kwa Ciudad Trujillo, o ne a ya dipokanong tsa Basupi ba ga Jehofa mme a tla ka dibuka le dimakasine di le mmalwa. O badile dikgatiso tseno bosigo jotlhe a bo a ya go kopa thuto ya Baebele moragonyana. Luis o ne a gatela pele mme a dira tshwetso ya go tlogela go direla puso ya ga Trujillo. Fa mmusaesi a utlwa ka tshwetso eno, o ne a re o mo naya tiro ya maemo a a kwa godimo ya go nna moemedi wa puso ya Dominican Republic kwa Puerto Rico. Luis o ne a e gana le fa a ne a itse gore seo se tla dira gore a boge.

Luis a re: “Ke ne ke bogisiwa ka ditsela tse di farologaneng le puso e ne e nteka ka ditsela tsotlhe. Mme ke ne ke ikemiseditse go fetwa ke menate ya lefatshe leno.” Luis e ne ya nna mmoledi yo o bolelang dikgang tse di molemo ka bopelokgale e bile baruti ba Katoliki ba ne ba mmitsa “moruti.” Luis o ne a kolobediwa ka October 5, 1947, dikgwedi di le thataro morago ga pokano ya gagwe ya ntlha.

Fa Luis a sena go kolobediwa, ba ne ba mo tsoma jaaka phologolo mme ba mo tshwara ba bo ba mo tsenya mo seleng ya motho a le esi. Ba ne ba leka go mmolaya ka makgetlo a le mantsi. Nako le nako fa a tshwarwa a bo a isiwa kgotlatshekelong o ne a dirisa tshono eo go naya bosupi. Luis a re: “Ke ne ka lwa jaaka tau go femela tumelo ya me mme ke sa ntse ke gakologelwa nako eo ka boitumelo.”

Tsela e Luis a neng a ikanyega ka yone mo Modimong e ne ya bonwa ke batho mo setšhabeng. Ka 1994, El Siglo e leng lokwalodikgang la Dominican, lo ne lwa bega jaana ka Luis: “Rre Luis Eduardo Montás o itsege mo San Cristobal e le monna yo o tsayang dilo masisi. Monna yono ke mpho, o kutlwelobotlhoko e bile o bonolo. Sengwe le sengwe se se itsiweng ka monna yono mo hisitoring ya San Cristobal se amanngwa le tiro ya gagwe ya Bokeresete.”