Jehofa o ile a segofatsa tiro ya bonatla ya batlhanka ba gagwe kwa Dominican Republic. Ka 1994, go ne go na le palogare ya baboledi ba Bogosi ba le 16 354 mo diphuthegong di le 259. Ka ntlha ya koketsego eo, go ne ga nna le tlhokego ya bagolwane le batlhanka ba bodiredi ba ba tshwanelegang. Ka one ngwaga oo, Setlhopha se se Laolang se ne sa letlelela Dominican Republic go nna le Sekolo sa Thapiso sa Bodiredi, se gone jaanong se bidiwang Sekolo sa Baboledi ba Bogosi.

 Ka October 2011, go ne go setse go alogile baboledi ba ka nna 600 go tswa mo ditlelaseng tse 25 tse di tshwaretsweng mo Dominican Republic. Re bua jaana, baalogi ba feta 300 ba mo tirelong ya nako e e tletseng, ba le 71 ke babulatsela ba ba kgethegileng mme ba le ba tlhano ba mo potologong. Ditlelase tsa ntlha di le lesome di ne tsa tshwarelwa kwa lekaleng mme go tloga ka ya bo11 di ne tsa tshwarelwa kwa dikagong tse disha tsa kwa Villa González.

Ka September 22, 1998, Kgwanyape ya Georges e ne ya ripitla Dominican Republic ka lobelo lwa dikilometara di le 190 ka ura mme seno se ne sa baka tshenyo e kgolo. Diketekete tsa batho di ne tsa sala di se na magae mme go ne ga swa batho ba feta 300. Komiti ya Namolo ya Dikotsi Tsa Masetlapelo e ne ya tlhoma lefelo la go thusa batho mo  jarateng ya Holo ya Bogosi e e kwa La Romana, e thusiwa ke Komiti ya Kago ya Kgaolo. Baithaopi ba ka nna 300 ba ne ba tla go thusa ka tiro ya namolo mme mo palong eno go ne go na le Basupi ba ba tswang kwa dinageng tse dingwe tse 16.

Go ne go na le Diholo Tsa Bogosi di le 23 tse di neng di tlhoka go agiwa sesha kgotsa go baakanngwa go akaretsa le matlo a bakaulengwe a feta 800. Ka sekai, Carmen, mmulatsela wa ka metlha yo o godileng, o ne a kotlomane pelo fa kgwanyape e ne e senya ntlo e a nnileng mo go yone ka dingwaga di le 38. Le fa go ntse jalo, o ne a tlhapelwa ke boitumelo fa bakaulengwe ba le 15 ba ne ba thaya motheo wa ntlo ya gagwe e ntšha. Carmen a re: “Jehofa ga a ke a re lebala, o a re tlhokomela. A ko o bone fela gore bakaulengwe bano ba nkagela ntlo e ntle jang. Baagelani ba me ba ile ba re: ‘Aitsane Basupi ba ga Jehofa ba a tlhokomelana e bile ba a ratana.’” Badiredi ba namolo ba ne ba utlwa mafoko a a tshwanang le ano fa ba ntse ba tsamaya mo nageng yotlhe ba thusa bakaulengwe le bokgaitsadi ba ba mo tlalelong.

Le fa Kgwanyape e ile ya lere masetlapelo, bakaulengwe ba ba amegileng ba ne ba gomodiwa ka Dikwalo ke batho ba ga Jehofa ba ba lorato. Sa botlhokwa le go feta ke gore baithaopi ba ba neng ba intsha setlhabelo ba dirile gore motswedi wa kgomotso yotlhe, e bong Jehofa a bakwe.

Go ne go tlhokega Diholo Tsa Bogosi tse di oketsegileng ka ntlha ya thologelo e kgolo ya barutwa. Kgabagare ka November 2000, tiro ya go aga Diholo Tsa Bogosi e ne ya simologa mo Dominican Republic ka thuso ya thulaganyo e e diretsweng dinaga tse di humanegileng. Ka ntlha ya seo, go tsaya dibeke di ka nna robedi gore phuthego e  nne le Holo ya Bogosi e ntle e e ngokang kgatlhego. Ka September 2011, ditlhopha tse pedi tsa go aga di ne di agile e bile di tlhabolotse Diholo Tsa Bogosi di ka nna 145.

Go ile ga neelwa bosupi jo bogolo ka ntlha ya dikago tseno le tiro ya baithaopi. Ka sekai, mo torotswaneng e e kwa karolong ya bokonebophirima jwa Dominican Republic, bakaulengwe ba ile ba bona setsha se go ka agelwang Holo ya Bogosi mo go sone. Mmulatsela yo o kgethegileng o ile a botsa mong wa setsha gore a ba ka se reka. Monna yoo o ile a re: “Lo itshenyetsa nako, ga nkitla ke lo rekisetsa setsha seno e re ka e bile lo batla go aga kereke mo go sone.”

Fa ba sena go buisana, mong wa setsha o ne a etela mogolowe yo e leng Mosupi wa ga Jehofa kwa Puerto Plata. Fa a goroga, o ne a fitlhela lelapa lengwe la Basupi le tsere mogolowe yo o lwalang gore le mo tlhokomelele kwa legaeng la bone. Ba ne ba mo isa ngakeng, dipokanong le bodireding. Monna yono o ne a botsa mogolowe gore o duela bokae gore a tlhokomelwe jaana. O ne a re: “Ga ke duele sepe, ke bakaulengwe ba me.”

Mong wa setsha o ne a amiwa thata ke bopelonomi jwa Basupi mo a neng a founela mmulatsela yo o kgethegileng mme a mmolelela gore o fetotse mogopolo ka kgang ya go rekisa setsha. Bakaulengwe ba ile ba reka setsha mme ba simolola go aga holo. Mosadi wa mong wa setsha o ne a na le kgopolo e e sa siamang ka Basupi ba ga Jehofa. E rile a bona tsela e bakaulengwe ba neng ba dirisana ka yone fa ba aga, o ile a re: “Ga ke ise ke bone batho ba ba utlwanang e bile ba le pelonomi jaana.”