KA BO1980, motshwari wa Tora ya Tebelo ke ene fela a neng a na le makasine o gantsi o neng o kwalolotswe ka seatla. Ka jalo, ke ne ka kopa mogolwane mongwe e bong Genadi Gudadze gore re leke go printa dimakasine tse dingwe tse re ka di dirisang.

Ka nako eo, bakaulengwe ba ne ba itirela motšhine wa mimeograph ba bo ba o dirisa go gatisa dikgatiso di le mmalwa. Mme ba ne ba tlhoka motšhine o o berekang sentle wa mimeograph, motho yo o itseng go thaepa, motšhine wa go thaepa le dipampiri gore ba kgone go gatisa dimakasine ka metlha. Le fa go ntse jalo, didirisiwa tsotlhe tsa go printa, tota le pampiri, di ne di laolwa ke puso e bile di sireleditswe.

Motho yo nkileng ka bereka le ene o ne a nnaya motšhine wa go thaepa o o neng o latlhilwe. Nnake o ne a itse go thaepa e bile a re o tla re thusa. Bakaulengwe ba ne ba dira motšhine  o mosha wa mimeograph ba bo ba batla lefelo le ba ka rekang pampiri kwa go lone. Sengwe le sengwe se ne se tsamaya sentle, mme mo nakong e e sa fediseng pelo re ne ra gatisa makasine wa ntlha wa Tora ya Tebelo ka Se-Georgia.

Mme gone, go ne ga nna le bothata bongwe. Letsatsi lengwe, Genadi o ne a nthaya a re: “Re tshwanetse go batla lefelo le lengwe le re ka rekang dipampiri kwa go lone.” O ne a bone dipampiri mo ofising nngwe ya puso mme o ne a sa kgone go di reka ka gonne balaodi ba puso ba ne ba mo setse morago. Re ne re ka di reka jang? Ke ne ke nna ke mo raya ke re: “Go ka se kgonege!” Mme Genadi o ne a bua jaana a tiisitse: “Tlogela go re, ‘Go ka se kgonege.’ ‘Mo Modimong dilo tsotlhe di a kgonega’!”—Math. 19:26.

Ke ne ka nna ke akanya ka kgang eno fa ke ya kwa ofising ya puso mo letsatsing le le latelang, ke tshogile. Jehofa o ile a nthusa gore ke kopane le mongwe yo tiro ya gagwe e neng e le go thaepa a bo a re o tla romela kopo ya me kwa mookameding wa ofisi. Mookamedi yoo e ne e le monna wa gagwe. Re ne ra simolola go reka dipampiri mo ofising eo mme mathata a rona a ne a fela.