Bakaulengwe le Bokgaitsadi ba ba Rategang:

Ka boikokobetso moporofeti Isaia o ne a dumela gore katlego le masego otlhe a Bogosi jwa Juda bo neng bo a itumelela, di ne di tswa kwa go Jehofa. O ne a bua jaana mo go Isaia 26:12: “Wena Jehofa, . . . o re diretse ditiro tsa rona tsotlhe.” Go akanya ka dilo tsotlhe tse di fitlheletsweng mo ngwageng wa tirelo o o fetileng go dira gore le rona re bue jalo. Ruri Jehofa o dira “dilo tse di gakgamatsang . . . tse di iseng di ke di dirwe”! (Ekes. 34:10) A ko o akanye ka masego mangwe a a tswang kwa go ene.

Website ya rona ya semolao, jw.org, e ntse e dirisiwa ka tsela e e molemo. Website eno e gone ka dipuo di feta 600 e bile dikgatiso di ka balwa le go itseelwa ka dipuo di feta 750 mo go yone. Website e thusa jang batho ba ba peloephepa go itse boammaaruri? Akanya ka seno: Banyalani bangwe ba ne ba swabisiwa ke bodumedi ka gonne ba ne ba bone bo na le boitimokanyi. Fa ba ntse ba batla go atamalana le Modimo, ba ne ba bona website ya rona. Ba ne ba simolola go tsena mo go yone ka metlha ba bala ditlhogo dingwe tse di mo dikgatisong tsa rona le go leba dibidio. Ba ne ba bo ba itseela bukana ya Go Tlhatlhoba Dikwalo ka Malatsi Otlhe mme ba simolola go bala temana ya letsatsi le bana ba bone ba babedi. Tota e bile, ke sone se ba neng ba se dira mo mosong wa fa Basupi ba ga Jehofa ba ne ba ba etetse. Basupi ba ne ba  lemoga gore lelapa leno le dirile diphetogo tse dintsi ka ntlha ya go tsena mo website ya rona. Ba ne ba sutlhile mekwalo kgotsa ditshwantsho tse ba neng ba di toroile mo mebeleng ya bone (di-tattoo), ba ntshitse manyena mo mebeleng ya bone, ba latlhile ditshwantsho tsa bodumedi, ba tlogetse go keteka malatsi a lefatshe a boikhutso le go leba dibidio tse di sa siamang—banyalani bano ba ne ba dirile dilo tseno tsotlhe pele ba kopana le Basupi! Fa pego eno e ne e kwalwa, banyalani bano le ngwana yo mongwe wa bone e ne e le baboledi e bile batsadi ba ne ba rulaganya go kolobediwa mo bogautshwaneng.

Re amogetse melaetsa e le mentsi ya ditebogo ka ntlha ya mpho e nngwe e e molemo: JW Broadcasting. Thulaganyo eno ya kgwedi le kgwedi e gone ka dipuo di feta 70 e bile e tla nna gone ka dipuo tse di oketsegileng. Malapa a le mantsi a leba thulaganyo eno ka maitseboa a one a Kobamelo ya Lelapa. Mokaulengwe mongwe o ne a re: “Phuthego ya ga Jehofa e godile thata, e bile re ikutlwa re atamalane thata le ntlokgolo ya Basupi ba ga Jehofa!”

Dikopano ke dingwe tsa dilo tse di tlhomologileng tsa batho ba ga Jehofa, e bile go ne go ntse jalo le ka tse di neng di tshwerwe ka ngwaga wa tirelo wa 2015. Thulaganyo ya kopano e ne e na le dibidio le ditshwantsho di le 42 le mmino o o monate o o neng o simolola thulaganyo nngwe le nngwe. Mokaulengwe mongwe yo o nang le maitemogelo o ne a bua jaana ka thulaganyo eo: “Go lebega go se ope yo o neng a batla go suta mo a dutseng teng fa thulaganyo e ntse e tsweletse ka gonne ba ne ba sa batle go fetiwa ke sepe.” Morongwa mongwe o ne a bua jaana ka kopano ya ngwaga o o fetileng: “Dibidio di  dirile gore boammaaruri le Bogosi e nne dilo tsa mmatota mo go nna.”

Gape mo ngwageng o o fetileng Jehofa o re segofaditse ka dipina tsa Bogosi di le mmalwa. Banyalani bangwe ba ne ba kwala jaana: “Dipina tseno tse disha di ntse jaaka e kete Jehofa o a re tlamparela. Di dirile gore re itshokele maemo a a thata.” Dikopano tseo tsotlhe di re gopoditse matsapa a a tserweng ke maloko a orchestra le khwaere ya Watchtower, ka boikaelelo jwa go galaletsa Jehofa!

A phuthego ya lona e dirisa dikolotsana tsa dikgatiso go rera phatlalatsa? Ruri mofuta ono wa go rera o nnile le masego a magolo! Batho bangwe ba ba nnang mo mafelong kgotsa mo dikagong tse go sa tseneng mongwe le mongwe mo go tsone, ba rerelwa lekgetlo la ntlha mo matshelong a bone e bile ba bangwe ba bantsi, go akaretsa le Basupi ba ba tsidifetseng, ba amogela thuso ya semoya ka mofuta ono wa go rera. Ka January 2015, monna mongwe kwa Korea Borwa o ne a atamela kolotsana ya dikgatiso. O ne a tlhalosa gore bosheng jaana o simolotse go akanya thata ka dilo tsa semoya. O ne a tshwarelwa thuto ya Baebele. Ka February o ne a ya dipokanong tsa phuthego lekgetlo la ntlha; ka March o ne a tlogela motsoko. Ka April o ne a etela ofisi ya lekala ya kwa Korea Borwa e bile o ntse a gatela pele sentle semoyeng. Ano ke mangwe a maitemogelo a mantsi a re a amogetseng mo ntlokgolo ya lefatshe lotlhe.

Re rapelela gore tshedimosetso e re e boneng kwa kopanong e tlhotlheletse ba le bantsi ba ba kileng ba direla ka matlhagatlhaga go boela kwa go Jehofa, pele ba thanya lo le tsebeng! Re lo kgothaletsa go etsa Jehofa ka go amogela ba ba boelang mo phuthegong ka lorato.—Esek. 34:16

 Ruri Jehofa o segofaditse batho ba gagwe mo ngwageng o o fetileng wa tirelo. Re ka solofela eng gape? Re tla tshwanelwa ke go nama re letile. Pele nako eo e goroga, tsweetswee itseng gore jaaka Setlhopha se se Laolang, re lo rata fela thata e bile re nna re lo rapelela.

Re lo eleletsa tsotlhe tse di molemo,

Bakaulengwe ba lona,

Setlhopha se se Laolang sa Basupi ba ga Jehofa