Nako nngwe morago ga Tlolaganyo, Jesu le barutwa ba gagwe ba ne ba tsaya loeto ba kgabaganya Samarea ba boela kwa Galalea. Jesu o ne a ema gaufi le motse wa Sikara fa lefelong le le neng le bidiwa sediba sa ga Jakobe. Fa a ntse a ikhuditse, barutwa ba gagwe ba ne ba ya go reka dijo mo motseng.

Mosadi mongwe o ne a tla kwa sedibeng go tla go ga metsi. Jesu o ne a mo raya a re: ‘Ke kopa metsi.’ Mosadi yoo o ne a re: ‘Goreng o bua le nna? Ke mosadi wa Mosamarea. Bajuda ga ba bue le Basamarea.’ Jesu o ne a mo raya a re: ‘Fa o ne o itse gore ke nna mang, o ne o tla nkopa metsi mme ke ne ke tla go naya metsi a botshelo.’ Mosadi o ne a re: ‘O raya jang? Ga o na le kgamelo ya go ga metsi?’ Jesu o ne a re: ‘Motho yo o nwang metsi a ke mo nayang one ga a kitla a tsamaya a tshwara ke lenyora gape.’ Mosadi o ne a re: ‘Rra, nnaya metsi ao.’

Go tswa foo, Jesu o ne a mo raya a re: ‘Ke kopa o ye go bitsa monna wa gago.’ O ne a re: ‘Ga ke na monna.’ Jesu o ne a re: ‘O bua nnete. O nyetswe makgetlo a le matlhano mme monna yo o dulang le ene gone jaanong ga se wa gago.’ Mosadi o ne a re: ‘Ke a lemoga gore o moporofeti. Basamarea ba dumela gore re kgona go obamela Modimo mo thabeng eno mme Bajuda bone ba re re tshwanetse go obamela Modimo kwa Jerusalema fela. Ke dumela gore fa Mesia a tla, o tla re ruta gore re obamela Modimo jang.’ Jesu o ne a mmolelela sengwe se a iseng a se bolelele ope, o ne a re: ‘Ke nna Mesia.’

Mosadi yoo o ne a itlhaganelela kwa motseng mme a raya Basamarea ba bangwe a re: ‘Ke  akanya gore ke bone Mesia. O itse sengwe le sengwe ka nna. Tla lo mmoneng!’ Ba ne ba tla kwa sedibeng mme ba reetsa fa Jesu a ba ruta.

Basamarea ba ne ba kopa Jesu gore a se ka a tswa ka bonako mo motseng wa bone. Jesu o ne a fetsa malatsi a le mabedi a ba ruta mme ba le bantsi ba ne ba dumela mo go ene. Ba ne ba raya mosadi yono wa Mosamarea ba re: ‘Se monna yono a se buang se bontsha sentle gore ke ene a tlileng go boloka lefatshe.’