Akanya ka boemo jono: Karen o na le metsotso e le lesome fela a le kwa phathing mme o utlwa lentswe la mongwe yo a mo itseng kwa morago ga gagwe.

Karen o a retologa a bo a bona tsala ya gagwe Jessica a tshwere dibotlolo tse pedi tse di sa tswang go bulwa. O lemoga gore ke bojalwa. Jessica o lebisa botlolo e nngwe kwa go Karen a bo a re: “O setse o lekane go ka ijesa monate, gakere?”

Karen o batla go gana mme gone Jessica ke tsala ya gagwe. E bile Karen ga a batle gore tsala ya gagwe e akanye gore o a bora. Kana e bile, Jessica ke mongwe wa basetsana ba ba siameng. Mme fa e le gore o a nwa, go raya gore ga go maswe go le kalo. Karen o ipolelela jaana: ‘Ke bojalwa fela jo bo sa reng sepe. Ga go tshwane le go dirisa diokobatsi.’

Fa o ne o le mo boemong jwa ga Karen, o ne o tla dira eng?

Gore o kgone go dira tshwetso e e botlhale mo boemong jono, o tlhoka go itse se o leng sone. Go itse se o leng sone ke boikutlo jo bo ka fa teng jo bo go bolelelang gore o mang le gore o dumela eng. Fa o itse seno, o nna le maatla a go laola botshelo jwa gago go na le go letla batho ba bangwe ba bo laola.—1 Bakorintha 9:26, 27.

O ka kgona jang go nna le maatla ano? Go araba dipotso tse di latelang go ka go thusa go simolola dilo sentle.

Go itse bokgoni jwa gago le dinonofo tsa gago tse di molemo go tla dira gore o itshepe le go feta.

SEKAO SA MO BAEBELENG: Moaposetoloi Paulo o ne a re: “Le fa ke se setswerere mo puong, eleruri ga ke a nna jalo mo kitsong.” (2 Bakorintha 11:6) E re ka Paulo a ne a tlhaloganya Dikwalo sentle, o ne a nna a nitame le fa ba bangwe ba ne ba mo gwetlha. Ga a ka a letla mafoko a bone a dira gore a se ka a tlhola a itshepa.—2 Bakorintha 10:10; 11:5.

ITLHATLHOBE: Kwala fa tlase talente kgotsa bokgoni bongwe jo o nang le jone.

Jaanong tlhalosa nonofo nngwe ya gago e e molemo. (Ka sekai, a o amega ka ba bangwe? a o pelotshweu? a o a ikanngwa? a o tshwara nako?)

Fela jaaka keetane e e nonofileng e ka koafadiwa ke dikarolo dingwe tsa yone tse di bokoa, le wena ka bonako fela o ka fetoga motho yo o sa siamang fa o letla makoa a gago gore a laole botshelo jwa gago.

SEKAO SA MO BAEBELENG: Paulo o ne a itse makoa a gagwe. O ne a re: “Tota ke itumedisiwa ke molao wa Modimo go ya ka motho yo ke leng ene mo teng, mme ke bona mo ditokololong tsa me molao o mongwe o o lwantshanang le molao wa mogopolo wa me e bile o ntira motshwarwa wa molao wa boleo.”—Baroma 7:22, 23.

ITLHATLHOBE: Ke bokoa bofe jo o tlhokang go ithuta go bo laola?

A o ne o ka palama thekisi o bo o raya mokgweetsi o re a dikologe golo go le gongwe go fitlha thekisi e felelwa ke lookwane? Seo e tla bo e le boeleele—e bile se ka baka ditshenyegelo!

O ithuta eng? Mekgele e a go kaela le go go thusa go tswelela pele mo botshelong. O nna le sengwe se o batlang go se dira le gore o tla se dira jang.

SEKAO SA MO BAEBELENG: Paulo o ne a re: “Tsela e ke sianang ka yone ga se ka go sa tlhomamisege.” (1 Bakorintha 9:26) Go na le gore Paulo a letele gore dilo di itiragalele fela, o ne a ipeela mekgele a bo a e latelela.—Bafilipi 3:12-14.

ITLHATLHOBE: Kwala fa tlase mekgele e meraro e o batlang go e fitlhelela ngwaga o o tlang.

Fa o se na se o se dumelang, o tla palelwa ke go dira ditshwetso. Fela jaaka lebodu, o tla nna o fetola mmala gore o tshwane le ditsala tsa gago—letshwao la gore ga o itlhaloganye.

Mme fa o dira dilo go ya ka se o se dumelang, o tla tshela go dumalana le se o leng sone—go sa kgathalesege se ba bangwe ba se dirang.

SEKAO SA MO BAEBELENG: Moporofeti Daniele o ne “a ikemisetsa mo pelong ya gagwe” gore o tla ikobela melao ya Modimo—gongwe e sa le lekawana—le fa a ne a le kgakala le ba gaabo. (Daniele 1:8) Ka go dira jalo, o ne a tswelela a tshela go dumalana le se a leng sone. Daniele o ne a tshela go ya ka se a se dumelang.

ITLHATLHOBE: O dumela eng? Ka sekai: A o dumela mo Modimong? Fa go le jalo, ka ntlha yang? Ke bosupi bofe jo bo go tlhatswang pelo gore o teng?

A o dumela gore melao ya Modimo ya boitsholo e go solegela molemo? Fa go le jalo, ka ntlha yang?

Wena o ne o ka batla go tshwana le eng—letlhare le le oleng le le phailakwang ke pheswana nngwe le nngwe kgotsa setlhare se se kgonang go emelana le diphefo tse di maatla? Nonotsha se o leng sone mme o tla tshwana le setlhare seo. Mme o tla kgona go araba potso e e reng, Ke nna mang?