THUTO 22

O ka Dira Eng Gore o Bolelele ba Bangwe Dikgang Tse di Molemo?

TSHAMEKA

Fa o ntse o ithuta boammaaruri jwa Baebele, o ka nna wa ipolelela gore, ‘Ruri mongwe le mongwe o tshwanetse go utlwa dikgang tseno!’ Gone ke boammaaruri gore mongwe le mongwe o tlhoka go di itse. Le fa go ntse jalo, o ka nna wa tshoga fa o akanya go bolelela ba bangwe se o se ithutileng. A re ithute gore ke eng se o ka se dirang gore o fenye letshogo leo mme o simolole go bolelela ba bangwe dikgang tseno tse di molemo tse di tswang mo Baebeleng.

1. O ka bolelela batho ba o ba itseng jang se o se ithutileng?

Barutwa ba ga Jesu ba ne ba re: “Ga re ka ke ra tlogela go bua ka dilo tse re di boneng le tse re di utlwileng.” (Ditiro 4:20) Ba ne ba rata dilo tse ba di ithutileng mo go Jesu mo e leng gore ba ne ba batla go di bolelela mongwe le mongwe. A le wena o ikutlwa jalo? Fa e le gore o ikutlwa jalo, batla ditshono tsa go bolelela ba lelapa la gago le ditsala tsa gago se o se ithutileng, mme o dira jalo ka tlotlo.—Bala Bakolosa 4:6.

Kafa o ka simololang ka gone

Fa o bua le ba lelapa la gago, umaka kgang nngwe ya Baebele o re: “Ke ithutile sengwe se se kgatlhang mo bekeng eno.”
Balela tsala ya gago e e lwalang (bobolang) kgotsa e e tshwenyegileng temana nngwe.
Fa batho ba o berekang le bone ba go botsa gore beke ya gago e tsamaile jang, ba bolelele se o se ithutileng mo thutong ya gago ya Baebele kgotsa kwa dipokanong.
Bontsha ditsala tsa gago website ya jw.org.
Laletsa ba bangwe gore ba nne teng fa o rutiwa Baebele kgotsa ba bontshe gore ba ka kopa thuto ya Baebele jang ba dirisa jw.org.

2. Ke eng fa go rera le phuthego e le selo sa botlhokwa se o ka se dirang?

Barutwa ba ga Jesu ba ne ba sa itumelele go rerela batho ba ba ba itseng fela. Jesu o ne “a ba roma ka bobedi le bobedi kwa pele ga gagwe kwa motseng mongwe le mongwe” gore ba ye go rera. (Luke 10:1) Tiro eo ya go rera e e rulagantsweng sentle, e ne ya naya batho ba le bantsi tshono ya gore ba utlwe dikgang tse di molemo. Gape go rera ba le mmogo go ne go dira gore ba itumele. (Luke 10:17) A le wena o ka leka go rera le phuthego?

ITHUTE MO GO OKETSEGILENG

Ithute gore ke eng se o ka se dirang gore o se ka wa tshoga thata, mme o bone gore go rerela batho dikgang tse di molemo go itumedisa jang.

3. Jehofa o tla nna le wena

Batho bangwe ba ba batlang go rera, ba ka tswa ba tshosiwa ke gore batho ba bangwe ba tla reng fa ba ba bona ba rera.

A o a tshoga fa o akanya go bolelela ba bangwe se o se ithutileng? Goreng o tshoga kgotsa o sa tshoge?

Tshameka BIDIO eno, lo bo lo tlotla ka potso e e latelang.

BIDIO: Ke ne Ka Rapela Jehofa Gore a Nthuse ke Nne Pelokgale (4:05)

Ke eng se se neng sa thusa basha bano ba Basupi gore ba fenye letshogo?

Bala Isaia 41:10, lo bo lo tlotla ka potso eno:

Fa e le gore o a tshoga fa o batla go rera, goreng o tshwanetse go rapela?

A o ne o itse?

Basupi ba ga Jehofa ba le bantsi ba kile ba bo ba akanya gore ba ka se nne le bopelokgale jwa go rera dikgang tse di molemo. Ka sekai, Sergey o ne a inyatsa e bile go ne go le thata mo go ene gore a bue le batho ba bangwe. Mme o ne a ithuta Baebele. A re: “Le fa gone ke ne ke tshoga, ke ne ka simolola go bolelela ba bangwe se ke se ithutang. Go bua boammaaruri, go bolelela ba bangwe se ke se ithutang go ne ga dira gore ke se ka ka tlhola ke inyatsa. Gape go ne ga dira gore dithuto tseno tse ke di ithutang di nwelelele mo pelong ya me.”

4. Bua ka tlotlo

Fa o bolelela ba bangwe dikgang tse di molemo, o se ka wa ela tlhoko fela se o se buang, mme gape o ele tlhoko le gore o se bua jang. Bala 2 Timotheo 2:24 le 1 Petere 3:15, lo bo lo tlotla ka dipotso tseno:

O ka dirisa jang se ditemana tseno di se buang fa o bua le ba bangwe ka Baebele?
Bangwe mo lelapeng kgotsa ditsala tsa gago ba ka nna ba se ka ba dumalana le wena. O tla dira eng? Ke eng se o sa tshwanelang go se dira?
Goreng go le botoka go botsa batho dipotso ka tlotlo go na le go ba bolelela se ba tshwanetseng go se dumela?

5. Go rera dikgang tse di molemo go a itumedisa

Jehofa o ne a naya Jesu tiro ya go rera dikgang tse di molemo. Jesu o ne a leba tiro eo jang? Bala Johane 4:34, lo bo lo tlotla ka dipotso tseno:

Go ja dijo tse di siameng go re thusa gore re tswelele re tshela e bile go a re itumedisa. Goreng Jesu a ne a tshwantsha go dira thato ya Modimo (go akaretsa le go rera dikgang tse di molemo) le go ja dijo?
O akanya gore go rera dikgang tse di molemo go ka go tlisetsa boitumelo ka ditsela dife?

Dikakantsho

Fa o le kwa pokanong ya mo gare ga beke, ela tlhoko ditsela tsa go simolola motlotlo.
Akanyetsa go ikwadisetsa go baya dipuo mo pokanong ya mo gare ga beke. Dikabelo tse baithuti ba di newang di ka go thusa gore o ipaakanyetse go bua le ba bangwe ka se o se ithutang.
Dirisa karolo e e reng, “Batho Bangwe ba Re” kgotsa e e reng, “Mongwe a ka Botsa a Re” e e tlhagang mo bukeng eno, gore o ikatisetse gore o ka araba jang dipotso tse batho ba di botsang kgotsa o ka araba jang batho ba ba lekang go go thibela go rera.

MONGWE A KA BOTSA A RE: “O fetogile, go diragetse eng ka wena?”

O ka dirisa tshono eno jang go bolelela motho yoo se o se ithutileng mo Baebeleng?

O ITHUTILE ENG?

Go bolelela ba bangwe dikgang tse di molemo go a itumedisa, mme go simolola go bua le ba bangwe ga go thata jaaka o akanya.

Poeletso

Goreng o tshwanetse go bolelela ba bangwe dikgang tse di molemo?
O ka dira seo jang ka tlotlo?
Ke eng se se ka go thusang go fenya letshogo le o nnang le lone fa o batla go rera?

Ke feditse thuto eno ka letlha le:

Leka go Dira Seno

Akanya ka motho a le mongwe yo o ka mmolelelang dikgang tse di molemo. Akanyetsa se o tla se buang, gore o tla se bua jang le gore o tla se bua leng.

Gape o ka dira seno:

Your other goal