1-3. Bababelona ba ne ba sotla batho ba ga Jehofa jang, mme ka ntlha yang?

 A RE RE o Mojuda yo o ikanyegang yo o nnang kwa motseng wa Babelona. Lo na le dingwaga di ka nna 50 lo le kwa botshwarwa. Ke letsatsi la Sabata, mme jaaka o tlwaetse, o ya go kopana le Bajuda ba bangwe gore lo obamele Jehofa mmogo. Fa o ntse o tsamaya mo mebileng e e tlhanaselang, o feta ditempele tse di boitshegang le mafelo a kobamelo a le mantsintsi. Batho ba kokoane kwa mafelong ao, ba ntsha ditlhabelo e bile ba opelela medingwana e e jaaka Maraduke difela.

² O kopana le setlhopha se sennye sa badumedimmogo le wena a mme lo batla lefelo le lo ka yang kwa go lone. Lo bona lefelo le le didimetseng, gongwe gaufi molatswana lo bo lo dula foo, lo rapela, lo opela dipesalema e bile lo akanyetsa kwa teng ka dilo tse lo di ithutileng mo Lefokong la Modimo. Fa lo ntse lo rapela, o kgona go utlwa modumo o o kwa tlase wa dikepe tse di dirilweng ka logong tse di bofeletsweng mo losing lwa molatswana. O itumelela go bo lo kgonne go bona lefelo leno le le didimetseng. Mme gone, o tshwere pelo ka letsogo gore batho ba motse oo ba se ka ba lo bona ba bo ba tsosa tlhakatlhakano jaaka ba tlwaetse. Goreng ba dira jalo?

 ³ Bababelona ba itsege ka go fenya kwa ntweng mme ba tsaya gore medimo ya bone ke yone e ba thusang go fenya. E re ka ba ile ba kgona go fenya Jerusalema, ba tsaya gore seno se bontsha gore modingwana wa bone yo o bidiwang Maraduke, o maatla go feta Jehofa. Ka jalo, ba kgoba Jehofa le batho ba gagwe. Ka dinako tse dingwe ba lo raya ba re: “Re opeleleng nngwe ya dipina tsa Siona.” (Pes. 137:3) Bontsi jwa dipesalema di ne di opelwa fa batho ba Siona kgotsa Jerusalema ba fentse baba ba ga Jehofa. Gongwe dipesalema tseo ke tsone tse Bababelona ba ratang go dira metlae ka tsone. Mme gone dipesalema tse dingwe di bua ka Bababelona ka tlhamalalo. Ka sekai, nngwe ya tsone ya re: Ba “dirile Jerusalema mokoa wa marope. . . . Batho ba ba re dikologileng ba a re sotla e bile ba re ja ditshego.”​—Pes. 79:1, 3, 4.

4, 5. Boporofeti jwa ga Esekiele bo ne bo naya batho tsholofelo efe, mme re tla sekaseka eng mo kgaolong eno? (Bona setshwantsho se se kwa tshimologong.)

⁴ Gape go na le Bajuda ba ba tlhanogetseng Jehofa, mme ba nna ba lo sotla ka mafoko ka gonne lo dumela mo go Jehofa e bile lo tshepa baporofeting ba gagwe. Le fa lo nna lo sotlwa jalo, go obamela Jehofa ka tsela e e mo itumedisang go a go gomotsa wena le ba lelapa la gago. Lo a itumela fa lo rapela e bile lo opela mmogo. Mo godimo ga moo, go bala Lefoko la Modimo go lo sidila maikutlo. (Pes. 94:19; Bar. 15:4) A re re mo letsatsing leno mongwe wa lona o tlile ka sengwe se se kgethegileng tota. O tlile ka momeno o o nang le boporofeti jwa ga Esekiele. O rata go utlwa tsholofetso ya ga Jehofa ya gore letsatsi lengwe o tla busetsa batho ba gagwe kwa lefatsheng la bone. Fa boporofeti joo bo balwa o itumela fela thata e bile o nna le tsholofelo ya gore letsatsi lengwe wena le ba lelapa la gago lo tla boela kwa lefatsheng la lona mme lo tla boa lo obamela Jehofa ka tsela e e mo itumedisang.

⁵ Boporofeti jwa ga Esekiele bo na le ditsholofetso di le dintsi tsa gore Jehofa o tla boa a obamelwa ka tsela e e mo itumedisang. Mma re tlotle ka kgang eno mo go oketsegileng. Boporofeti joo bo ile jwa diragadiwa jang mo nakong e e fetileng? Bo diragadiwa jang mo motlheng wa rona? Bo tla diragadiwa jang mo nakong e e tlang?

6. Modimo o ile a tlhagisa batho ba gagwe jang gangwe le gape?

⁶ Jehofa o ile a dirisa Esekiele go tlhalosetsa batho ba gagwe gore ba ne ba tlile go diragalelwa ke eng e re ka ba ne ba mo tlhanogetse. Jehofa o ne a re: “Ba tla ntshiwa mo nageng ya bone, ba tla isiwa botshwarwa.” (Esek. 12:11) Jaaka re bone mo Kgaolo 6 ya buka eno, Esekiele o ile a dira dilo dingwe tse di neng di emela se se neng se tla ba diragalela. Mme gone, e ne e se lekgetlo la ntlha Jehofa a tlhagisa Baiseraele. Dingwaga di ka nna 1 000 pele ga moo ka nako ya ga Moshe, Jehofa o ne a bolelela batho ba gagwe gore fa ba ka tswelela ba dira dilo tse di bosula, ba tla isiwa botshwarwa. (Dute. 28:36, 37) Baporofeti ba ba jaaka Isaia le Jeremia le bone ba ile ba ba tlhagisa.​—Isa. 39:5-7; Jer. 20:3-6.

7. Jehofa o ile a otlhaya batho ba gagwe ka ditsela dife?

 ⁷ Se se utlwisang botlhoko ke gore batho ba le bantsi ga ba a ka ba reetsa tlhagiso ya ga Jehofa mme seno se ile sa mo utlwisa botlhoko. E re ka Baiseraele ba ne ba eteletswe pele ke batho ba ba sa ikobeleng Jehofa, ba ile ba mo tlhanogela ba bo ba feleletsa ba obamela medingwana e bile ba dira dilo di le dintsi tse di sa siamang. Ka jalo, Jehofa o ile a letla gore ba welwe ke leuba le legolo mme seno e ne e le matlhabisa ditlhong ka gonne lefatshe la bone le ne le itsege e le lefatshe le le “elelang mashi le tswina ya dinotshe.” (Esek. 20:6, 7) Gape o ile a letla gore ba isiwe botshwarwa fela jaaka a ne a buile. Ka 607 B.C.E., kgosi ya Babelona e bong Nebukadenesare o ne a senya motse wa Jerusalema le tempele ya one. Bajuda ba le diketekete ba ba ileng ba falola ba ile ba isiwa botshwarwa kwa Babelona. Fa ba le kwa Babelona, ba ne ba sotlwa ka mafoko e bile ba jewa ditshego jaaka go tlhalositswe kwa tshimologong ya kgaolo eno.

8, 9. Modimo o ile a tlhagisa Bakeresete ka eng?

⁸ A Bakeresete ba ile ba diragalelwa ke sengwe se se tshwanang le se se ileng sa diragalela Bajuda ba ba neng ba isitswe botshwarwa? Go ntse jalo. Balatedi ba ga Keresete le bone ba ile ba tlhagisiwa ka se se neng se tla direga. Kwa tshimologong ya bodiredi jwa gagwe, Jesu o ne a re: “Ikeleng tlhoko mo baporofeting ba maaka ba ba tlang mo go lona ba itirile dinku, mme mo teng e le diphiri tse di garolakang.” (Math. 7:15) Dingwaga moragonyana moaposetoloi Paulo le ene o ile a ba tlhagisa. O ne a re: “Ke a itse gore fa ke sena go tsamaya, diphiri tse di gatelelang di tla tsena mo gare ga lona mme ga di kitla di tshwara letsomane ka bonolo, e bile go tla tswa banna mo gare ga lona mme ba tla bua dilo tse di sokameng gore ba gogele barutwa kwa go bone.”​—Dit. 20:29, 30.

⁹ Bakeresete ba ile ba tlhalosediwa gore ba ka lemoga jang batho ba mofuta oo le gore ba ka dira eng gore ba se ka ba ikopanya le bone. Bagolwane ba ile ba laelwa gore ba ntshe batlhanogi mo phuthegong. (1 Tim. 1:19; 2 Tim. 2:16-19; 2 Pet. 2:1-3; 2 Joh. 10) Le fa go ntse jalo, Bakeresete ba le bantsi ba ile ba feleletsa ba dira se Baiseraele ba ileng ba se dira. Ga ba a ka ba reetsa tlhagiso eo. Mo e ka nnang ka bo100 C.E., Bakeresete bangwe ba ne ba simolola go dumela dilo tse batlhanogi ba neng ba di bua. Moaposetoloi Johane o ne a sa ntse a tshela ka nako eo, mme o ile a lemoga gore batho bangwe mo phuthegong ba simolola go tlhanogela Jehofa. Ke ene a neng a thibela gore dithuto tsa maaka di se ka tsa tlalatlala mo phuthegong. (2 Bathes. 2:6-8; 1 Joh. 2:18) Mme go ile ga direga eng fa a sena go swa?

10, 11. Setshwantsho sa ga Jesu sa korong le mefero, se ile sa diragadiwa jang mo masimologong a bo100 C.E.?

¹⁰ Fa Johane a sena go swa, setshwantsho sa ga Jesu sa korong le mefero se ile sa simolola go diragadiwa. (Bala Mathaio 13:24-30.) Fela jaaka Jesu a ne a buile, Satane o ne a jala “mefero” kgotsa Bakeresete ba maaka mo phuthegong mme go ile ga nna le botlhanogi jo bontsi. Jehofa o tshwanetse a bo a ile a utlwa botlhoko fa a bona batho ba ba mo phuthegong e e simolotsweng ke Morwawe ba dira  dilo tse di maswe. Ba ne ba obamela medingwana, ba keteka malatsi a boikhutso a a simolotseng mo bodumeding jwa maaka e bile ba dumela dithuto tsa maaka tsa batho ba ba sa dumeleng mo Modimong. Jehofa o ile a dira eng? O ile a letla gore batho ba gagwe ba isiwe botshwarwa fela jaaka a ile a dira ka Baiseraele ba ba neng ba sa ikanyege. Mo masimologong a bo100 C.E., go ne go le thata go bona Bakeresete ba boammaaruri ba ba emelang korong ka gonne Bakeresete ba maaka ba ne ba le bantsi. Tota re ka re phuthego ya Bakeresete e ne e le mo botshwarwa mo Babelona yo Mogolo. Ba ne ba sa kgone go obamela Jehofa ka tsela e e mo itumedisang ka gonne go ne go tletse dithuto tsa bodumedi jwa maaka. Mme Bakeresete ba maaka ba ba neng ba le mo phuthegong, ba ne ba nna karolo ya bodumedi joo jwa maaka.

¹¹ E re ka Bakeresete ba maaka ba ne ba le bantsi, go ne ga simolola go nna le Madumedi a a Ipitsang a Bokeresete. Go ne ga feta dingwaga di le dintsi madumedi ano e le one a laolang. Mme gone, go ne go sa ntse go na le Bakeresete ba boammaaruri ba Jesu a neng a re ke “korong.” Ga ba a ka ba lebala Modimo wa boammaaruri, fela jaaka Bajuda ba ba neng ba isitswe botshwarwa ba go buiwang ka bone mo go Esekiele 6:9. Bangwe ba bone ba ile ba bontsha gore ba pelokgale ka go ganetsa dithuto tsa maaka tse di neng di rutiwa  mo Madumeding a a Ipitsang a Bokeresete. Ba ile ba sotliwa le go bogisiwa. A Jehofa o ne a tla tlogela batho ba gagwe mo bodumeding jwa maaka? Nnyaa. Fela jaaka mo metlheng ya Baiseraele, Jehofa o ile a galefa ka “selekanyo se se tshwanetseng,” e bile ga a ka a galefela ruri. (Jer. 46:28) Mo godimo ga moo, ga a ka a phuaganya batho ba gagwe, go na le moo, o ile a ba naya tsholofelo. Mma re tlotle gape ka Bajuda ba ba neng ba le kwa Babelona mme re bone kafa Jehofa a ileng a ba solofetsa ka gone gore o tla ba ntsha kwa botshwarwa.

12, 13. Goreng bogale jwa ga Jehofa bo ne bo tla fokotsega?

¹² Jehofa o ne a galefetse batho ba gagwe, mme o ile a ba solofetsa gore ga a kitla a ba galefela go ya go ile. Ka sekai, o ne a re: “Bogale jwa me bo tla fela, e bile tšhakgalo ya me e tla kokobela, mme ke tla bo ke kgotsofetse. Mme fa ke sena go diragatsa tšhakgalo ya me mo go bone, ba tla tshwanelwa ke go itse gore nna, Jehofa, ke buile gore ke batla gore batho ba nkobamele ke le esi.” (Esek. 5:13) Ke eng fa bogale jwa ga Jehofa bo ne bo tla fokotsega?

¹³ Bontsi jwa batho ba ba neng ba isitswe botshwarwa ba ne ba sa ikanyege, mme gone bangwe mo go bone ba ne ba ikanyega. Mo godimo ga moo, Modimo o ile a dirisa Esekiele go bolelela pele gore batho bangwe ba gagwe ba ne ba tla tlogela go dira dilo tse di bosula  fa ba le kwa botshwarwa. Ba ne ba tla ikwatlhaela dilo tse di maswe tse ba neng ba di dira le kafa ba ileng ba tlhanogela Modimo ka gone. Ba ne ba tla mo kopa gore a ba itshwarele le gore a boe a ba amogele. (Esek. 6:8-10; 12:16) Esekiele e ne e le mongwe wa batho ba ba ikanyegang, go akaretsa le moporofeti Daniele le ditsala tsa gagwe tse tharo. Tota e bile Daniele o ne a le gone fa batho ba ne ba isiwa botshwarwa, le fa ba ne ba gololwa. O ile a rapela a tlhalosa gore o ne a ikutlwa jang ka dilo tse di bosula tse Baiseraele ba neng ba di dirile. Thapelo eo e kwadilwe mo go Daniele kgaolo 9. Ga go pelaelo gore batho ba le diketekete ba ba neng ba le kwa botshwarwa ba ne ba ikutlwa fela jaaka ene. Ba ne ba eletsa gore Jehofa a ba itshwarele e bile a ba segofatse. Ba tshwanetse ba bo ba ile ba itumela tota fa ba utlwa Jehofa a ba solofetsa gore o tla ba golola le gore o tla dira gore ba boe ba mo obamele ka tsela e e mo itumedisang.

14. Goreng Jehofa a ne a tla busetsa batho ba gagwe kwa lefatsheng la bone?

¹⁴ Le fa go ntse jalo, go ne go na le lebaka le le botlhokwa le le neng le dira gore Jehofa a ba golole a bo a dira gore ba mo obamele ka tsela e e mo itumedisang. Ga se gore ba ile ba gololwa ka ntlha ya sengwe se ba neng ba se dirile. Go na le moo, e ne e le nako ya gore Jehofa a dire gore leina la gagwe le tlotlomadiwe mo ditšhabeng. (Esek. 36:22) Bababelona ba ne ba tla itse gore medingwana ya bone e e jaaka Maraduke ga se sepe fa e bapisiwa le Morena Molaodimogolo Jehofa. Mma re sekaseke ditsholofetso di le tlhano tse Jehofa a ileng a laela Esekiele gore a di bolelele batho ba ba neng ba le kwa botshwarwa. Sa ntlha, re tla bona gore ditsholofetso tseo di le tsa diragadiwa jang mo bathong ba ba ikanyegang ba ga Jehofa ba ba neng ba le kwa botshwarwa. Go tswa foo, re tla bona kafa ditsholofetso tseo di ileng tsa diragadiwa ka gone ka tsela e nngwe.

15. Batho ba ba neng ba boa kwa botshwarwa ba ne ba tla obamela Modimo jang?

¹⁵ TSHOLOFETSO YA NTLHA. Batho ba ne ba se kitla ba tlhola ba obamela medingwana kgotsa ba dira dilo tse di ferosang sebete tse di amanang le bodumedi jwa maaka. (Bala Esekiele 11:18; 12:24.) Jaaka re bone mo Kgaolo 5, batho ba ne ba dira dilo tse di maswe tse di amanang le bodumedi jwa maaka kwa Jerusalema le kwa tempeleng. Ka  sekai, ba ne ba obamela medingwana. Batho bao ba ne ba tlhanogetse Jehofa. Jehofa o ne a dirisa Esekiele go bolelela pele gore batho ba ba neng ba le kwa botshwarwa, ba ne ba tla boa gape ba mo obamela ka tsela e e mo itumedisang. Masego a mangwe a ne a tla nna teng fela fa batho ba ne ba obamela Jehofa ka tsela e e mo itumedisang.

16. Jehofa o ne a solofetsa batho ba gagwe eng ka lefatshe la bone?

¹⁶ TSHOLOFETSO YA BOBEDI. Ba ne ba tla boela kwa lefatsheng la bone. Jehofa o ne a raya batho ba ba neng ba le kwa botshwarwa a re: “Ke tla lo naya lefatshe la Iseraele.” (Esek. 11:17) Eno e ne e le tsholofetso ya botlhokwa ka gonne Bababelona ba ne ba ba sotla ka mafoko e bile go se na sepe se se bontshang gore ba tla boela kwa lefatsheng la bone. (Isa. 14:4, 17) Mo godimo ga moo, lefatshe le ba neng ba tla boela kwa go lone le ne le tla tswelela le ungwa e bile ba ne ba tla itumelela tiro e ba neng ba tla e dira, fa fela ba ikanyega mo go Jehofa. Leuba e ne e tla nna dilo tsa maloba.​—Bala Esekiele 36:30.

17. Batho ba ba neng ba boa kwa botshwarwa, ba ne ba tla boa ba dira eng gape?

¹⁷ TSHOLOFETSO YA BORARO. Ba ne ba tla boa ba ntshetsa Jehofa ditlhabelo mo sebesong. Jaaka re bone mo Kgaolo 2, go ntsha ditlhabelo e ne e le karolo e e botlhokwa thata ya go obamela Jehofa ka tsela e e mo itumedisang. Jehofa o ne a tla amogela ditlhabelo tsa batho ba ba neng ba tswa kwa botshwarwa, fa fela ba ne ba mo ikobela e bile ba obamela ene fela. Maleo a bone a ne a tla itshwarelwa e bile ba ne ba tla tswelela ba atamalane le ene. Jehofa o ne a re: ‘Batho botlhe ba Iseraele, botlhe fela, ba tla ntirela mo lefatsheng. Ke tla ba itumelela gone koo, mme ke tla batla meneelo ya lona le mabutswapele a ditlhabelo tsa lona, dilo tsotlhe tsa lona tse di boitshepo.’ (Esek. 20:40) Batho ba ne ba tla boa ba obamela Modimo ka tsela e e mo itumedisang, mme o ne a tla ba segofatsa.

18. Jehofa o ne a tla tlhokomela batho ba gagwe jang?

¹⁸ TSHOLOFETSO YA BONÊ. Jehofa o ne a tla leleka badisa ba ba sa siamang. Lebaka la konokono la go bo batho ba ile ba tlhanogela Modimo, ke gore ba ne ba tlhotlhelediwa ke banna ba ba neng ba eteletse pele ba ba sa ikobeleng Modimo. Jehofa o ne a solofetsa batho  ba gagwe gore seo se tlile go fetoga. O ne a re: “Ke tla ba leleka gore ba se ka ba tlhola ba fepa dinku tsa me . . . Ke tla namola dinku tsa me mo melomong ya bone.” Gape o ne a solofetsa batho ba gagwe ba ba ikanyegang a re: “Ke tla tlhokomela dinku tsa me.” (Esek. 34:10, 12) O ne a tla dira seo jang? O ne a tla tlhoma banna ba ba ikanyegang gore e nne badisa.

19. Jehofa o ne a solofetsa batho ba gagwe eng?

¹⁹ TSHOLOFETSO YA BOTLHANO. Batho ba ga Jehofa ba ne ba tla utlwana. Ga go pelaelo gore batho ba ba ikanyegang ba ile ba utlwa botlhoko fa ba bona tsela e batho ba Modimo ba neng ba sa utlwane ka yone pele ga ba ya botshwarwa. Batho ba ile ba tlhanogela baporofeti ba ba neng ba romilwe ke Jehofa ka gonne ba ne ba tlhotlhelediwa ke baporofeti ba maaka le banna ba ba neng ba eteletse pele ba ba sa ikobeleng Jehofa. Tota e bile, go ne ga nna le makoko a a ganetsanang. Ka jalo, sengwe se se kgatlhang thata se Jehofa a ileng a se solofetsa Bajuda ba ba neng ba le kwa botshwarwa ke se a ileng a tlhotlheletsa moporofeti Esekiele gore a se bue. O ne a re: “Ke tla dira gore botlhe ba nne seoposengwe, e bile ke tla fetola tsela e ba akanyang ka yone.” (Esek. 11:19) Bajuda ba ba neng ba tswa botshwarwa ba ne ba se kitla ba fenngwa ke ope, fa fela ba ne ba utlwana e bile ba ikobela Jehofa. Ba ne ba ka se tlhole ba dira gore  leina la ga Jehofa le gogwe mo seretseng. Go na le moo, ba ne ba tla dira gore a tlotlomadiwe.

20, 21. Ditsholofetso tsa Modimo di ile tsa diragadiwa jang ka nako ya Bajuda ba ba neng ba tswa botshwarwa?

²⁰ A Bajuda ba ba ileng ba boa kwa botshwarwa ba ile ba bona ditsholofetso tseno tse tlhano di diragadiwa? Re tshwanetse go nna re gopotse se se ileng sa buiwa ke Joshua. O ne a re: “Ga go na lefoko le le lengwe le le sa diragalang mo ditsholofetsong tsotlhe tse di molemo tse Jehofa, Modimo wa lona a di buileng le lona. Di lo diragaletse tsotlhe fela. Ga go na lefoko lepe la tsone le le sa diragalang.” (Josh. 23:14) Fela jaaka Jehofa a ile a diragatsa ditsholofetso tsa gagwe mo motlheng wa ga Joshua, ga go pelaelo gore o ile a diragatsa se a neng a se solofeditse Bajuda ba ba neng ba le kwa botshwarwa.

²¹ Bajuda ba ne ba tlogela go obamela medingwana le go dira dilo tse di ferosang sebete tse di amanang le bodumedi jwa maaka tse di neng di dirile gore ba tlhanogele Jehofa. Ba ne ba boela kwa lefatsheng la bone. Fa ba le koo, ba ne ba jala masimo e bile ba itumelela botshelo le fa seo se ne se lebega se ka se kgonege. Selo sa ntlha se ba ileng ba se dira ke go aga sebeso sa ga Jehofa kwa Jerusalema le go ntshetsa ditlhabelo mo go sone. (Esera 3:2-6) Jehofa o ile a ba segofatsa ka go tlhoma banna ba ba ikanyegang ba ba jaaka moperesiti  le mokwalolodi Esera, mmusi Nehemia le Serubabele, Moperesiti yo Mogolo Joshua le baporofeti ba ba pelokgale ba ba jaaka Hagai, Sekarea le Malaki. Fa fela batho ba ne ba ikobela kaelo ya ga Jehofa, ba ne ba utlwana go feta ka fa ba neng ba utlwana ka teng mo nakong e e fetileng.​—Isa. 61:1-4; bala Jeremia 3:15.

22. Re itse jang gore go diragadiwa ga ditsholofetso tsa ga Jehofa ka nako ya Bajuda, e ne e le lemmenyana fela la se se neng se tla direga?

²² Tsela e Jehofa a ileng a diragatsa tsholofetso ya gagwe ya gore o tla boa a obamelwa ka tsela e e mo itumedisang, e ile ya kgothatsa Bajuda fela thata. Mme gone, seo e ne e le lemmenyana fela la se a neng a tla se dira mo nakong e e tlang. Re itse jang? Re itse seo ka gonne Jehofa o ne a tla diragatsa se a neng a se solofeditse fa fela batho bao ba ne ba mo ikobela. Bajuda ba ne ba feleletsa ba sa ikobele Jehofa ba bo ba mo tlhanogela gape. Mme gone, fela jaaka Joshua a ile a tlhalosa, ka metlha Jehofa o diragatsa ditsholofetso tsa gagwe. Ka jalo, ditsholofetso tseo di ne di sa ntse di tla diragadiwa ka tsela e nngwe gape. Mma re bone gore di ile tsa diragadiwa jang.

23, 24. Nako ya fa “dilo tsotlhe di dirwa disha” e ile ya simologa leng, mme seno se ile sa direga jang?

²³ E re ka re ithuta Baebele, re a itse gore metlha ya bofelo ya lefatshe leno le le bosula e simolotse ka 1914. Mme gone, seno ga se dire gore batho ba ga Jehofa ba utlwe botlhoko. Tota e bile, Baebele e a re go simolola ka 1914, go ne ga direga sengwe se se itumedisang. E a re e ne ya nna nako ya gore ‘dilo tsotlhe di dirwe disha.’ (Dit. 3:21) Re itse seo jang? Ka 1914, Jesu Keresete o ile a tlhomiwa go nna Kgosi ya Bomesia kwa legodimong. Goreng re re tiragalo eo e ne e le nako ya gore dilo di simololwe go dirwa disha? Gopola gore Jehofa o ile a solofetsa Kgosi Dafide gore bogosi jwa gagwe bo ne bo tla nna ka bosakhutleng. (1 Ditir. 17:11-14) Mme gone, ka 607 B.C.E, fa Bababelona ba sena go senya Jerusalema, go ne go sa tlhole go na le ope mo lelapeng la ga Dafide yo o busang e le kgosi.

²⁴ E re ka Jesu e ne e le “Morwa motho,” e ne e le setlogolwana sa ga Dafide. Ka jalo, o ne a na le tshwanelo ya semolao ya go nna kgosi. (Math. 1:1; 16:13-16; Luke 1:32, 33) Ka 1914, fa Jehofa a ne a mo  tlhoma gore e nne kgosi kwa legodimong, nako ya go ‘dira dilo tsotlhe disha’ e ne ya simolola. Jehofa o ne a tla dirisa Kgosi eo e e sa tswang go tlhomiwa go tsweletsa tiro ya go dira gore batho ba boe ba mo obamele ka tsela e e mo itumedisang.

25, 26. (a) Bakeresete ba ne ba gololwa mo bodumeding jwa maaka leng, mme re itse jang? (Bona le lebokoso le le reng, “A Mme E ne E le Ka 1919?”) (b) Ke boporofeti bofe jo bo ileng jwa diragadiwa go simologa ka 1919?

²⁵ Fa Jesu a sena go tlhomiwa gore e nne Kgosi, o ile a thusa Rraagwe go tlhatlhoba tsela e batho ba neng ba obamela Modimo ka yone. (Mal. 3:1-5) Fela jaaka Jesu a ile a bolelela pele mo setshwantshong sa korong le mefero, go ne go fetile nako e telele go le thata go farologanya korong le mefero, kgotsa go farologanya Bakeresete ba boammaaruri ba ba tloditsweng le Bakeresete ba maaka. b Paka ya thobo e ne ya simolola ka 1914, ka jalo, go ne ga nna motlhofo go ba farologanya. Dingwaga di le dintsi pele ga 1914, Baithuti ba Baebele ba ba ikanyegang ba ile ba senola dilo tse di maswe tse di neng di dirwa mo Madumeding a a Ipitsang a Bokeresete, e bile ba ne ba simolola go ikgaoganya le madumedi ao. E ne e le nako ya gore Jehofa a ba thuse gore ba boe ba mo obamele ka tsela e e mo itumedisang. Ka jalo, kwa masimologong a 1919, dingwaga di le mmalwa fela “paka ya thobo” e sena go simolola, batho ba Modimo ba ne ba golotswe mo Babelona yo Mogolo. (Math. 13:30) Ba ne ba sa tlhole ba le mo botshwarwa.

²⁶ Boporofeti jwa ga Esekiele bo ne jwa simolola go diragadiwa ka tsela e nngwe, go feta kafa bo ileng jwa diragadiwa ka gone mo nakong e e fetileng. Mma re bone gore ditsholofetso tse tlhano tse re setseng re tlotlile ka tsone di ile tsa diragadiwa jang ka tsela e nngwe.

27. Modimo o ile a thusa batho ba gagwe jang gore ba kgaogane le kobamelo ya medingwana?

²⁷ TSHOLOFETSO YA NTLHA. Batho ba ne ba sa tlhole ba obamela medingwana kgotsa ba dira dilo tse di ferosang sebete tse di amanang le bodumedi jwa maaka. Mo e ka nnang ka 1900 C.E., Bakeresete ba ba ikanyegang ba ne ba kopana e le ditlhotswana mme ba simolola go tlogela go dira dilo tse di amanang le bodumedi jwa maaka. Ba ne ba lemoga gore thuto ya gore Modimo o gararo, ya gore moya ga o swe le ya gore go na le molelo wa dihele, ga di yo mo Baebeleng, mme di tswa mo bodumeding jwa maaka. Gape ba ne ba lemoga gore  go dirisa ditshwantsho fa ba obamela Modimo, go tshwana fela le go obamela medingwana. Fa nako e ntse e ya, ba ile ba lemoga gore go dirisa sefapaano le gone go tshwana fela le go obamela medingwana.​—Esek. 14:6.

28. Go ile ga direga eng fa batho ba Modimo ba sena go gololwa mo Babelona yo Mogolo?

²⁸ TSHOLOFETSO YA BOBEDI. Batho ba Modimo ba ne ba boa ba mo obamela ka tsela e e mo itumedisang. Fa ba ntse ba tlogela dithuto tsa maaka, ba ne ba boa ba obamela Modimo ka tsela e a neng a obamelwa ka yone pele. Jehofa o ile a ba segofatsa. Ba ne ba rutiwa dithuto tsa boammaaruri tse di neng di dira gore ba atamalane thata le Jehofa e bile ba ne ba sa tlhaele sepe. (Bala Esekiele 34:13, 14.) Jaaka re tla bona mo Kgaolo 19, Jehofa o segofaditse batho ba gagwe ka dithuto tsa boammaaruri tse di ba thusang gore ba atamalane thata le ene.​—Esek. 11:17.

29. Tiro ya go rera e ile ya oketsega jang ka 1919?

²⁹ TSHOLOFETSO YA BORARO. Ba ne ba boa ba ntshetsa Jehofa ditlhabelo mo sebesong. Ka bo100 C.E., Bakeresete ba ne ba rutiwa  gore ba ne ba se kitla ba tlhola ba ntsha ditlhabelo ka diphologolo mme ba ne ba tla ntsha dimpho tse di tlhwatlhwakgolo. Dimpho tseo e ne e le se ba neng ba se bua fa ba tlotlomatsa Jehofa le fa ba ruta batho ka ene. (Baheb. 13:15) Fa batho ba Modimo ba ne ba le kwa botshwarwa mo Babelona yo Mogolo, go ne go se na tsela e e rulaganeng e ba neng ba e dirisa go obamela Modimo le go rera. Mme gone, fa ba ne ba tloga ba gololwa, ba ne ba setse ba ntshetsa Jehofa dimpho tse di tlhwatlhwakgolo. Ba ne ba rerela batho e bile ba itumelela go galaletsa Jehofa kwa dipokanong. Go simologa ka 1919, setlhopha sa “motlhanka yo o boikanyego le yo o botlhale” se ne sa simolola go tlhoma mogopolo thata mo tirong ya go rera e bile se ne sa tsaya matsapa a magolo go e rulaganya. (Math. 24:45-47) Ka jalo, batho ba le bantsi ba ne ba simolola go obamela Jehofa le go ruta batho ba bangwe ka ene.

30. Jesu o ile a thusa jang batho ba gagwe gore ba nne le badisa ba ba siameng?

³⁰ TSHOLOFETSO YA BONÊ. Badisa ba ba sa siamang ba ne ba tlosiwa. Keresete o ile a ntsha batho ba Modimo mo dinaleng tsa badisa ba maaka ba Madumedi a a Ipitsang a Bokeresete ba ba ikakanyetsang ba le nosi. Botlhe ba ba neng ba itshwara jaaka badisa bao, ga ba a ka ba tlhola ba letlelelwa gore ba etelele pele mo phuthegong. (Esek. 20:38) E re ka Jesu e le Modisa yo o Molemo, o ile a netefatsa gore dinku tsa gagwe di a tlhokomelwa. Ka 1919, o ne a tlhoma motlhanka yo o boikanyego le yo o botlhale. Setlhopha seo se sennye sa Bakeresete ba ba ikanyegang ba ba tloditsweng, se ile sa tlhokomela batho ba Modimo ka go ba ruta dithuto tsa boammaaruri. Fa nako e ntse e ya, bagolwane ba ne ba katisiwa gore ba tlhokomele “letsomane la Modimo.” (1 Pet. 5:1, 2) Mafoko a a mo go Esekiele 34:15 le 16, gantsi a dirisiwa go thusa bagolwane go gopola gore Jehofa le Jesu ba tshwara letsomane jang.

31. Jehofa o ile a diragatsa jang boporofeti jo bo mo go Esekiele 11:19?

³¹ TSHOLOFETSO YA BOTLHANO. Batho ba ga Jehofa ba a utlwana. Mo dingwageng di le dintsi tse di fetileng, Madumedi a a Ipitsang a Bokeresete a ile a kgaogana go nna dikereke le makoko a le diketekete a a sa utlwaneng. Go farologana le seo, Jehofa o ile a dira sengwe se se gakgamatsang. O ile a thusa batho ba ba mo obamelang ka tsela e e mo itumedisang gore ba utlwane. Tsholofetso ya gagwe e Esekiele a ileng a e bua e e reng, “Ke tla dira gore botlhe ba nne seoposengwe,” e ile ya diragadiwa ka tsela e e gakgamatsang. (Esek. 11:19) Keresete o na le balatedi ba le dimilione mo lefatsheng. Batho bano ba tswa mo ditsong le mo maemong a ikonomi a a farologaneng e bile ba godisitswe ka ditsela tse di farologaneng. Le fa go ntse jalo, ba rutiwa dithuto tse di tshwanang e bile ba dira tiro e e tshwanang. Fa Jesu a ne a tloga a bolawa, o ne a kopa Rraagwe gore a thuse balatedi ba gagwe gore ba nne seoposengwe. (Bala Johane 17:11, 20-23.) Mo motlheng wa rona, Jehofa o ile a araba thapelo eo ka tsela e e gakgamatsang.

32. O ikutlwa jang ka go diragadiwa ga boporofeti jwa gore Jehofa o tla obamelwa ka tsela e e mo itumedisang? (Bona le lebokoso le le reng, “Boporofeti jo bo Buang ka go Isiwa le go Gololwa Kwa Botshwarwa.”)

 ³² Ruri re itumela tota go tshela mo nakong eno e Jehofa a thusang batho ba gagwe gore ba boe ba mo obamele ka tsela e e mo itumedisang. Tsela e re obamelang Jehofa ka yone e bontsha gore boporofeti jwa ga Esekiele bo a diragadiwa. Re tlhatswegile pelo gore gone jaanong Jehofa o amogela batho ba gagwe, fela jaaka a ile a bolelela pele a dirisa Esekiele. O ne a re: “Ke tla lo itumelela.” (Esek. 20:41) Eleruri ke tshiamelo go nna karolo ya batho ba ba ileng ba gololwa mo bodumeding jwa maaka. Re itumelela go bo re utlwana, re rutiwa dithuto tsa boammaaruri e bile re galaletsa Jehofa. Mme gone, boporofeti bongwe jwa ga Esekiele bo tla diragadiwa ka tsela e nngwe mo nakong e e tlang.

33-35. (a) Bajuda ba ba neng ba le kwa botshwarwa, ba ne ba tlhaloganya jang boporofeti jo bo mo go Esekiele 36:35? (b) Boporofeti joo bo kaya eng mo go rona gompieno? (Bona le lebokoso le le reng, “Nako ya fa ‘Dilo Tsotlhe di Dirwa Disha.’”)

³³ Jaaka re bone, nako ya fa “dilo tsotlhe di dirwa disha” e ne ya simolola ka 1914 fa setlogolwana sa ga Dafide e bong Jesu a ne a dirwa kgosi. (Esek. 37:24) Go tswa foo Jehofa o ne a dirisa Keresete go thusa batho ba gagwe gore ba boe ba mo obamele ka tsela e e mo itumedisang fa ba sena go gololwa mo bodumeding jwa maaka. Mme gone, a seo ke sone fela se Keresete a ileng a se dira? Nnyaa. O sa ntse a tla tswelela a thusa batho gore ba obamele Jehofa ka tsela e e mo itumedisang. Boporofeti jwa ga Esekiele bo tlhalosa gore o tla dira seo jang.

³⁴ Ka sekai, ela tlhoko mafoko ano: “Batho ba tla re: ‘Naga e e kgakgabetseng jaanong e tshwana le tshingwana ya Edene.’” (Esek. 36:35) Esekiele le Bajuda ba ba neng ba le kwa botshwarwa ba ne ba tsaya gore tsholofetso eno e kaya eng? Ba ne ba sa lebelela gore lefatshe la bone le tla tshwana le Paradaise, kgotsa tshingwana ya Edene e e neng e jadilwe ke Jehofa. (Gen. 2:8) Go na le moo, ba ne ba itse gore Jehofa o ne a ba solofetsa gore lefatshe la bone le ne le tla nna lentle e bile le ne le tla ungwa thata.

³⁵ Tsholofetso eno e kaya eng mo go rona gompieno? Ga re a lebelela gore tsholofetso eno e diragadiwe ka tsela ya mmatota mo lefatsheng leno le le busiwang ke Satane Diabolo. Go na le moo, re a itse gore tsholofetso eno e diragadiwa ka tsela ya tshwantshetso. Re obamela Jehofa ka tsela e e mo itumedisang e bile go mo direla ke selo se se botlhokwa thata mo matshelong a rona. Tsela e re mo obamelang ka yone e nna e tokafala nako le nako. Mme gone, tsholofetso eno e tla diragadiwa jang mo nakong e e tlang?

36, 37. Go tla diragadiwa ditsholofetso dife kwa lefatsheng la Paradaise?

³⁶ Morago ga ntwa ya Aramagedona, Jesu o tla dira gore lefatshe lotlhe e nne paradaise. Ka Puso ya Dingwaga Tse di Sekete, o tla thusa batho go dira lefatshe gore le tshwane le tshingwana ya Edene jaaka Jehofa a ne a ikaeletse go tloga kwa tshimologong. (Luke 23:43) Ka nako eo, batho botlhe ba tla bo ba utlwana e bile ba tla tlhokomela lefatshe mme lefatshe le tla ntsha dijo tse dintsi. Go tla bo go sena sepe se se tla ba tlhagisetsang kotsi. Akanya fela gore botshelo  bo tla bo bo ntse jang fa tsholofetso eno e tla bo e diragaditswe: “Ke tla dira kgolagano ya kagiso le bone, e bile ke tla fedisa dibatana tse di kotsi mo nageng, gore ba tle ba nne mo nageng ba sireletsegile ba bo ba robale mo dikgweng.”​—Esek. 34:25.

³⁷ A o kgona go ipona o tshela mo lefatsheng leo? O tla bo o kgona go ya gongwe le gongwe fela kwa o batlang teng o sa boife sepe. Go tla bo go sena phologolo epe e e tla go tlhaselang. O tla bo o sireletsegile. O tla kgona go tsamaya o le esi mo sekgweng se se kitlaneng o itumelela go bona kafa se leng se ntle ka gone. Tota e bile, o tla bo o kgona go robala mo go sone o sireletsegile mme fa o tsoga o tla bo o lapologetswe go se na sepe se se go gobaditseng.

38. O ikutlwa jang ka go tshela ka nako ya fa boporofeti jo bo mo go Esekiele 28:26 bo diragadiwa?

³⁸ Re tla bona tsholofetso eno le yone e diragadiwa: “Ba tla nna mo [lefatsheng] ba babalesegile mme ba tla aga matlo ba bo ba jala masimo a morara, e bile ba tla nna ba babalesegile fa ke atlhola botlhe ba ba ba sotlang, ba ba ba dikologileng; mme ba tla tshwanelwa ke go itse gore ke nna Jehofa, Modimo wa bone.” (Esek. 28:26) Fa baba botlhe ba ga Jehofa ba sena go fedisiwa, batho botlhe mo lefatsheng ba tla nna ka kagiso ba sireletsegile. Re tla tlhokomela lefatshe mme gape re tla kgona go itlamela le ba malapa a rona. Re tla aga matlo a mantle e bile re tla jala masimo a morara.

39. Ke eng fa o ka tlhatswega pelo gore boporofeti jo bo mo go Esekiele jo bo buang ka Paradaise bo tla diragadiwa?

³⁹ A o akanya gore ditsholofetso tseno ke dijo tsa ditoro fela? O se ka wa lebala dilo tse o boneng di direga mo nakong eno ya fa “dilo tsotlhe di dirwa disha.” Jesu o ntse a thusa batho ba ga Jehofa gore ba mo obamele ka tsela e e mo itumedisang le fa gone Satane a ba ganetsa e bile ba tshela mo nakong e e tletseng mathata. Ruri seno ke bosupi jwa gore ditsholofetso tsotlhe tsa ga Jehofa tse Esekiele a di boleletseng pele di tla direga.