1, 2. (a) Mongwe le mongwe o tshwanetse go araba potso efe? (b) Moengele mongwe yo o ikanyegang o ile a reng fa Johane a ne a leka go mo obamela?

 MONGWE le mongwe wa rona o tshwanetse go araba potso eno ya botlhokwa: Ke tla obamela mang? Bangwe ba re karabo ya potso eno e motlhofo fela ka gonne Modimo ke ene a tshwanetseng go obamelwa. Mme gone, ga re a tshwanela go bua fela ka molomo re re re obamela Modimo. Se re se dirang ke sone se bontshang gore a re obamela Jehofa Modimo kgotsa Satane.

² Satane o batla go obamelwa. Seno se ile sa bonala sentle fa a ne a raela Jesu. Jaaka re ithutile mo Kgaolo 1 ya buka eno, Satane o ne a raela Jesu ka go mo raya a re o tla mo naya magosi a lefatshe lotlhe le taolo ya one. Satane o ne a batla gore Jesu a dire eng gore a mo neye dilo tseno? O ne a raya Jesu a re: ‘Nkobamele.’ (Math. 4:9) Go farologana le Satane, moengele yo o neng a isa molaetsa kwa go Johane o ile a gana go obamelwa. (Bala Tshenolo 22:8, 9.) Fa Johane a ne leka go obamela moengele, moengele yoo yo o boikokobetso o ile a re: “O se ka wa dira jalo!” Go na le gore a re ‘Nkobamele,’ o ile a re “Obamela Modimo.”

3. (a) Boikaelelo jwa kgatiso eno ke eng? (b) Re tlile go tlotla ka eng?

³ Boikaelelo jwa kgatiso eno ke go re thusa gore re obamele Jehofa  Modimo fela, jaaka moengele a ile a bua. (Dute. 10:20; Math. 4:10) Mma re tlotle ka se re ithutileng sone mo boporofeting jwa ga Esekiele le mo diponatshegelong tse a ileng a di bona. Gape Baebele e tla re thusa go bona se se tla diregang mo nakong e e tlang fa mongwe le mongwe a tla bo a lebane le teko ya bofelo. Ba ba falolang teko eo ke bone ba tla nnang teng ka nako ya fa batho botlhe ba tla bo ba obamela Jehofa ka tsela e e mo itumedisang ka bosakhutleng.

4. Buka ya Esekiele e gatelela dintlha dife tse tharo tsa botlhokwa?

⁴ Buka ya Esekiele e re ruta gore go obamela Jehofa ka tsela e e mo itumedisang go akaretsa (1) go obamela Jehofa fela, (2) go obamela Jehofa re le seoposengwe le (3) go bontsha ba bangwe gore re a ba rata. Ela tlhoko kafa boporofeti le diponatshegelo tse Esekiele a ileng a di bona tse re tlotlileng ka tsone mo bukeng eno, di gatelelang dintlha tseno tse tharo ka gone.

5-9. Re ithutile eng ka go obamela Jehofa fela?

⁵ Kgaolo 3: a Ponatshegelo e Esekiele a ileng a e bona ya fa Jehofa a dikologilwe ke motshe wa godimo a kaela baengele, e re ruta gore Jehofa o tshwanelwa ke kobamelo e e feletseng.​—Esek. 1:4, 15-28.

⁶ Kgaolo 5: Esekiele o ile a bona ponatshegelo e e tsitsibanyang mmele ya batho ba ba neng ba dira dilo tse di makgapha mo tempeleng ya ga Jehofa. Ponatshegelo eno e re thusa go lemoga gore Jehofa o kgona go bona sengwe le sengwe. O a bona fa batho ba sa ikanyege mo go ene. O a bona fa ba obamela medingwana tota le fa ba dira jalo mo sephiring ba sa bonwe ke ope. Dilo tse di ntseng jalo di mo utlwisa botlhoko e bile o otlhaya botlhe ba ba di dirang.​—Esek. 8:1-18.

⁷ Kgaolo 7: Katlholo e e neng e tla tlela ditšhaba tse di neng di sotla Baiseraele e ne e bontsha gore Jehofa o otlhaya botlhe ba ba sa tshwareng batho ba gagwe sentle. (Esek. 25:6) Gape re ithuta sengwe sa botlhokwa mo tseleng e Baiseraele ba neng ba dirisana le ditšhaba tseo ka yone. Re ithuta gore go ikanyega mo go Jehofa go tshwanetse ga nna botlhokwa thata mo go rona. Ga re a tshwanela go dira dilo tse di tla kgopisang Jehofa fela ka gonne re batla go itumedisa ba masika a rona. Gape re ithuta gore ga re a tshwanela go ikanya dikhumo tsa lefatshe leno, go tsaya letlhakore mo dipolotiking kgotsa go naya baeteledipele ba puso tlotlo e re tshwanetseng go e naya Jehofa fela.

⁸ Kgaolo 13 le 14: Ponatshegelo ya tempele e e mo godimo ga thaba e e kwa godimo thata e re ruta gore re tshwanetse go tshela ka melao ya ga Jehofa ya maemo a a kwa godimo e bile e re ruta gore Jehofa o kwa godimo ga medimo yotlhe.​—Esek. 40:1–48:35.

 ⁹ Kgaolo 15: Boporofeti jo bo tshwantshang Iseraele le Juda le bagwebakammele, bo re gopotsa gore Jehofa o ikutlwa jang fa batho ba gagwe ba obamela medimo ya maaka.​—Esek., kgao. 16, 23.

10-14. Botlhokwa jwa go obamela Jehofa ka tsela e e mo itumedisang re le seoposengwe bo ile jwa gatelelwa jang?

¹⁰ Kgaolo 8: Boporofeti jo bo buang ka gore Jehofa o tla tlhoma “modisa a le mongwe fela” gore a tlhokomela batho ba gagwe bo re gopotsa botlhokwa jwa go dira mmogo re le seoposengwe ka kagiso re eteletswe pele ke Jesu Keresete.​—Esek. 34:23, 24; 37:24-28.

¹¹ Kgaolo 9: Boporofeti jwa ga Esekiele jo bo buang ka go gololwa ga batho ba Modimo kwa Babelona ba bo ba boela kwa nageng ya bone bo ruta batlhanka ba gagwe ba mo motlheng ono gore Jehofa o batla gore ba kgaogane le bodumedi jwa maaka e bile ba tsamaele kgakala le jone. Le fa gone re tswa mo madumeding a a farologaneng, mo maemong a itsholelo a a sa tshwaneng e bile re tswa mo ditsong tse di farologaneng, re tshwanetse go nna seoposengwe ka gonne seno se bontsha gore re batho ba Modimo.​—Esek. 11:17, 18; 12:24; Joh. 17:20-23.

¹² Kgaolo 10: Ponatshegelo e e buang ka go tsosiwa ga marapo a a omeletseng e bontsha botlhokwa jwa go nna seoposengwe. Eleruri ke tshiamelo go nna karolo ya batho ba ba obamelang Modimo ka tsela e e mo itumedisang ba le seoposengwe.​—Esek. 37:1-14.

¹³ Kgaolo 12: Boporofeti jo bo ka ga go kopanngwa ga dithobane tse pedi bo gatelela thata botlhokwa jwa go nna seoposengwe. Go nonotsha tumelo tota go bona batlodiwa le ba dinku tse dingwe ba diragatsa boporofeti jono. Le fa gone re tshela le batho ba ba sa utlwaneng ka ntlha ya dipolotiki le bodumedi, rona re a utlwana ka gonne re a ratana e bile re ikanyega mo go Jehofa.​—Esek. 37:15-23.

¹⁴ Kgaolo 16: Ponatshegelo ya monna yo o tshotseng lonaka lwa enke ya mokwaledi le banna ba ba tshotseng dibetsa tsa go thubaganya e na le molaetsa wa tlhagiso wa gore batho ba ba obamelang Jehofa ka tsela e e mo itumedisang ka nako ya “pitlagano e kgolo,” ke bone fela ba ba tla tshwaiwang gore ba falole.​—Math. 24:21; Esek. 9:1-11.

15-18. Goreng re tshwanetse go tswelela re bontsha ba bangwe gore re a ba rata, mme re ka dira seo jang?

¹⁵ Kgaolo 4: Ponatshegelo ya ditshedi di le nnê e ile ya re ruta ka dinonofo tsa ga Jehofa. Nonofo e e tlhomologileng thata mo go tsone ke lorato. Fa re bua sentle le ba bangwe e bile re bontsha gore re a ba rata, re tla bo re bontsha gore Jehofa ke Modimo wa rona.​—Esek. 1:5-14; 1 Joh. 4:8.

¹⁶ Kgaolo 6 le 11: E re ka Jehofa a rata batho, o ile a tlhoma balebeledi  ba ba jaaka Esekiele. Modimo ke lorato, ka jalo ga a batle gore ope a nyelediwe fa puso ya ga Satane e fedisiwa. (2 Pet. 3:9) Re tshwanetse go bontsha gore re rata batho fela jaaka Jehofa a ba rata ka go ema nokeng tiro e e dirwang ke molebeledi wa mo motlheng wa rona.​—Esek. 33:1-9.

¹⁷ Kgaolo 17 le 18: Jehofa o a itse gore batho ba le bantsi ba tla bontsha gore ga ba na sepe le kutlwelobotlhoko ya gagwe, ba bo ba leka go nyeletsa batlhanka ba gagwe ba ba ikanyegang. E re ka Jehofa a rata batho ba gagwe ba ba ikanyegang, o tla ba sireletsa fa “Gogo wa lefatshe la Magogo” a ba tlhasela. Le rona re rata batho, ka jalo, re dira sotlhe se re ka se kgonang go ba tlhagisa gore Jehofa o tlile go fedisa botlhe ba ba bogisang batho ba gagwe.​—Esek. 38:1–39:20; 2 Bathes. 1:6, 7.

¹⁸ Kgaolo 19, 20, le 21: Tsela e Jehofa a ratang batho ka yone e bonala sentle mo ponatshegelong ya molatswana wa metsi a a nayang botshelo le mo ponatshegelong ya go kgaoganngwa ga lefatshe. Diponatshegelo tseno di tlhalosa se se tla diregang ka gonne Jehofa a ile a ntsha setlhabelo ka Morwawe gore re kgone go itshwarelwa maleo le gore re kgone go itumelela botshelo. Re ka bontsha gore re rata batho ka go ba bolelela ka dilo tse di itumedisang tse Jehofa a tla di direlang batho ba ba dumelang mo go Morwawe.​—Esek. 45:1-7; 47:1–48:35; Tshen. 21:1-4; 22:17.

19. Jesu o tlile go dira eng ka nako ya Puso ya Dingwaga Tse di Sekete? (Bona lebokose le le reng “Go Lebana le Teko ya Bofelo.”)

¹⁹ Ka nako ya Puso ya Dingwaga Tse di Sekete, Jesu o tla tsosa batho ba le bantsintsi mo baswing mme o tla fedisa kutlobotlhoko e e bakilweng ke mmaba wa rona e bong loso. (1 Bakor. 15:26; Mar. 5:38-42; Dit. 24:15) Go fetile dingwagangwaga batho ba diragalelwa ke dilo tse di botlhoko e bile ba swelwa ke batho ba ba ba ratang. Fa batho ba ntse ba tsosiwa mo nakong e e tlang, Jesu o tla fedisa kutlobotlhoko eo e bile o tla naya ba ba tsositsweng tshono ya gore ba tshele botshelo jo bo itumedisang. Ka ntlha ya setlhabelo sa thekololo, o tla phimola kutlobotlhoko e e bakilweng ke dintwa, malwetse le tlala. Mo godimo ga moo, o tla re thusa gore re se ka ra tlhola re nna le boleo jo re bo tsayang mo go Adame, e leng sone selo se se re bakelang kutlobotlhoko. (Bar. 5:18, 19) Jesu o tla “senya ditiro tsa ga Diabolo.”​—1 Joh. 3:8.

20. Jesu le babusimmogo le ene ba le 144 000 ba tla bontsha jang gore ba boikokobetso? Tlhalosa. (Bona setshwantsho se se kwa tshimologong.)

²⁰ Bala 1 Bakorintha 15:24-28. Go tla direga eng fa batho ba se na boleo e bile lefatshe lotlhe e le Paradaise fela jaaka Jehofa a ne a ikaeletse? Jesu le babusimmogo le ene ba le 144 000 ba tla bontsha gore ba boikokobetso tota. Ba tla busetsa Bogosi kwa go Jehofa mme ba tla dira jalo ba sa patelediwe e bile ba sa ngongorege. Dilo tsotlhe tse di dirilweng ke Bogosi joo di tla nnela ruri.

21, 22. (a) Lefatshe le tlile go nna jang morago ga dingwaga tse di sekete? (b) Ke eng fa Jehofa a tlile go golola Satane le madimona?

²¹ Morago ga Puso ya Dingwaga Tse di Sekete, Jehofa o tla dira sengwe se se gakgamatsang, se se bontshang gore o tshepa batlhanka ba gagwe ba ba mo lefatsheng. O tla laela gore Satane le madimona ba ntshiwe mo khuting e e kwa tengteng e go fetileng dingwaga di le sekete ba tswaletswe mo go yone. (Bala Tshenolo 20:1-3.) Fa ba gololwa mo khuting eo, sengwe le sengwe se tla bo se fetogile. Pele ga ntwa ya Aramagedona, batho ba le bantsi ba ne ba laolwa ke Satane e bile ba sa utlwane ka ntlha ya letlhoo le tlhaolele. (Tshen. 12:9) Mme morago ga dingwaga tse di sekete, batho botlhe ba tla bo ba obamela Jehofa ba le seoposengwe. Ka nako eo, lefatshe lotlhe e tla bo e le Paradaise go rena kagiso.

²² Ke eng fa Jehofa a tlile go golola Satane le madimona? Ke ka gonne batho ba le bantsi ba ba tla bong ba tshela morago ga dingwaga tse di sekete, ba tla bo ba ise ba nne le tshono ya go bontsha  gore ba ikanyega mo go Jehofa fa ba lebane le diteko. Bontsi jwa bone ba ile ba swa ba sa itse Jehofa ba bo ba tsosediwa mo lefatsheng la Paradaise. Jehofa ga a ka a ba tsosa fela mo baswing, mme gape o ile a ba tlamela ka dilo tsotlhe tse ba di tlhokang e bile o ile a ba thusa gore ba nne le tumelo e e nonofileng. Mo dingwageng tseo tse di sekete, ba tla bo ba sa lebana le tlhotlheletso epe e e sa siamang ka gonne ba ne ba nna le batho ba ba siameng, ba ba ratang Jehofa e bile ba mo direla. Satane a ka nna a latofatsa batho bao ba ba tsositsweng mo baswing ka tsela e a ileng a latofatsa Jobe ka yone. A ka nna a re ba direla Jehofa fela ka gonne Jehofa o a ba sireletsa e bile o a ba segofatsa. (Jobe 1:9, 10) Ka jalo, pele ga Jehofa a kwalela maina a rona ruri mo bukeng ya botshelo, o tla re naya tshono ya gore re bontshe gore re a ikanyega mo go ene le gore re mo tsaya jaaka Rre le Molaodimogolo wa rona.​—Tshen. 20:12, 15.

23. Mongwe le mongwe o tla lebana le teko efe?

 ²³ Satane o tla newa tshono ya gore a raele batho gore ba tlogele go direla Modimo. O tla ba raela jang? Ntle le pelaelo, mongwe le mongwe o tla lebana le teko e Adame le Efa ba ileng ba lebana le yone, ya gore a o tla tshela ka melao ya Modimo le go ema bolaodi jwa gagwe nokeng kgotsa o tla tlhanogela Modimo a bo a ema Satane nokeng.

24. Goreng ba ba tlileng go tlhanogela Jehofa ba bidiwa Gogo le Magogo?

²⁴ Bala Tshenolo 20:7-10. Ba ba tlileng go tlhanogela Jehofa morago ga dingwaga tse di sekete ba bidiwa Gogo le Magogo. Ba dira dilo tse di tshwanang le tse di dirwang ke batho ba Esekiele a ileng a porofeta gore ba tla tlhasela batho ba Modimo ka nako ya pitlagano e kgolo. Batho bao ba Esekiele a ileng a bua ka bone ba ba bidiwang “Gogo wa lefatshe la Magogo” e ne e le batho ba ditšhaba tse di farologaneng ba ba neng ba le kgatlhanong le bolaodi jwa ga Jehofa. (Esek. 38:2) Ka tsela e e tshwanang, ba ba tla tlhanogelang Modimo morago ga Puso ya ga Keresete ya Dingwaga Tse di Sekete ba bidiwa “ditšhaba.” Seno se a gakgamatsa ka gonne ka Puso ya Dingwaga Tse di Sekete, go tla bo go sa tlhole go na le ditšhaba tse di farologaneng. Batho botlhe ba tla bo ba busiwa ke puso e le nngwe fela e leng Bogosi Jwa Modimo. Re tla nna setšhaba se  le sengwe fela. E re ka ba ba tlileng go tlhanogela Modimo ba bidiwa Gogo le Magogo e bile go twe ke “ditšhaba,” seno se bontsha gore Satane o tla dira gore batho bangwe ba Modimo ba se ka ba tlhola ba nna seoposengwe. Mme gone, ga go na ope yo o tla patelediwang go tsaya letlhakore la ga Jehofa kgotsa la ga Satane. Mongwe le mongwe o tla itirela tshwetso.

25, 26. Ke batho ba le kae ba ba tlileng go tsaya letlhakore la ga Satane mme go tla direga eng ka bone?

²⁵ Ke batho ba le kae ba ba tlileng go tsaya letlhakore la ga Satane? Baebele e a re palo ya bone e tla “tshwana le motlhaba wa lewatle.” Seno ga se reye gore batho ba le bantsintsi ba tlile go tlhanogela Modimo. Re itse jang? Akanya ka se Modimo a ileng a se solofetsa Aborahame. O ne a re losika lwa ga Aborahame lo tla nna “jaaka motlhaba o o fa losing lwa lewatle.” (Gen. 22:17, 18) Le fa go ntse jalo, losika loo lo ne lwa feleletsa lo na le batho ba le 144 001 fela. (Bagal. 3:16, 29) Le fa palo eno e le kwa godimo, e nnye tota fa e bapisiwa le palo ya batho ka kakaretso. Ka tsela e e tshwanang, batho ba ba tla tsayang letlhakore la ga Satane morago ga dingwaga tse di sekete, ba tla nna bantsi mme gone ga ba kitla ba nna bantsintsi. Ga ba kitla ba nyeletsa batlhanka ba Modimo ba ba ikanyegang.

 ²⁶ Botlhe ba ba tla tlhanogelang Modimo ba tlile go senngwa ka ponyo ya leitlho. Batho bano mmogo le Satane le Madimona ba tlile go nyelelediwa ruri. Go tla gopolwa fela ditshwetso tsa bone tse di sa siamang le ditlamorago tsa ditshwetso tseo.​—Tshen. 20:10.

27-29. Go tla direga eng ka ba ba tla falolang teko ya bofelo?

²⁷ Ba ba tla falolang teko ya bofelo bone maina a bone a tla kwalelwa ruri mo “bukeng ya botshelo.” (Tshen. 20:15) Go tswa foo, batlhanka ba ga Jehofa ba ba ikanyegang ba tla mo obamela ka tsela e e mo itumedisang ba le seoposengwe.

²⁸ Akanya fela gore go tlile go nna jang. Ka nako eo, o tla bo o tshela monate, o dira tiro e o e ratang e bile o na le ditsala tse di molemo. Go tla bo go sena ope yo o bogang. O tla bo o sa tlhole o tlhoka setlhabelo sa ga Jesu gore o atamalane le Jehofa ka gonne o tla bo o sa tlhole o na le boleo. Mongwe le mongwe o tla kgona go nna tsala ya Modimo go se na sepe se se mo kgoreletsang. Sa botlhokwa le go feta, Jehofa o tla bo a obamelwa ka tsela e e mo itumedisang kwa legodimong le mo lefatsheng.

²⁹ A o tla bo o le gone fa dilo tseno di direga? O ka kgona go nna teng. Ke eng se se ka go thusang? Tswelela o dirisa dithuto tse tharo tsa botlhokwa tse re ithutileng tsone mo bukeng ya Esekiele. Sa ntlha, obamela Jehofa fela. Sa bobedi, obamela Jehofa o le seoposengwe le Bakeresetemmogo le wena. Sa boraro, bontsha gore o rata  ba bangwe. Go sa ntse go na le sengwe gape sa botlhokwa se re ka ithutang sone mo bukeng ya Esekiele.

30, 31. Mafoko a a reng “ba tla tshwanelwa ke go itse gore ke nna Jehofa,” a tla kaya eng (a) mo babeng ba Modimo? (b) mo bathong ba Modimo?

³⁰ Mo bukeng ya Esekiele, gangwe le gape Jehofa o nna a re: “Ba tla tshwanelwa ke go itse gore ke nna Jehofa.” (Esek. 6:10; 39:28) Baba ba Modimo ba tla itse gore ke ene Jehofa fa a lwantshana le bone a bo a ba bolaya. Mme gone, ga se gore ba tla itse fela gore Jehofa o teng, ba tla ithuta botlhoko gore leina la Modimo le kaya gore “O dira Gore go Diragale.” Ka nako eo, “Jehofa wa masomosomo” o tla nna “motlhabani yo o maatla” mme o tla lwantsha baba ba gagwe. (1 Sam. 17:45; Ekes. 15:3) Ba tla ithuta sengwe se se botlhokwa ka Jehofa: Gore ga go na sepe se se ka dirang gore a se ka a diragatsa boikaelelo jwa gagwe.

³¹ Mo bathong ba Modimo, mafoko a a reng “ba tla tshwanelwa ke go itse gore ke nna Jehofa,” a kaya gore ba tla tshelela ruri ka kagiso. Jehofa o tla dira gore re nne se a neng a ikaeletse sone kwa tshimologong. O tla dira gore re nne bana ba gagwe ba ba bontshang dinonofo tsa gagwe tse dintle. (Gen. 1:26) Jehofa ke Rraarona yo o re ratang e bile ke Modisa wa rona yo o re sireletsang. Go ise go ye kae, o tla nna Kgosi e e tla fedisang baba ba rona. Fa seo se ise se direge, a re tsweleleng re dirisa se re ithutileng sone mo bukeng ya Esekiele. A re bontshe ka se re se buang le se re se dirang gore re itse Jehofa le gore re itse gore ke Modimo yo o ntseng jang. Fa re dira jalo, ga re kitla re tshoga fa pitlagano e kgolo e simolola. Go na le moo, re tla tsholetsa ditlhogo ka gonne re tla bo re itse gore kgololo ya rona e atametse. (Luke 21:28) Fa re ntse re letile, a re direng sotlhe se re ka se kgonang go ruta batho botlhe ka Jehofa, Modimo a le esi fela yo o tshwanetseng go obamelwa, yo leina la gagwe le sa tshwaneng le la ga ope!​—Esek. 28:26.