Go ne go tloga go nna masa fa Petere a itatola Jesu lekgetlo la boraro. Maloko a Sanehederine a a ntseng a sotla Jesu fa a mo sekisa a phatlaletse. Ke masa a letsatsi la Labotlhano, mme ba kopana gape, gongwe e le go dira gore tsheko e e seng ka fa molaong e ba neng ba e tshwere bosigo e lebege e le ka fa molaong. Jesu o tlisiwa fa pele ga bone.

Ba laela Jesu gape ba re: “Fa e le gore o Keresete, re bolelele.” O ba raya a re: “Le fa ke ne ke lo boleletse, lo ne lo se kitla lo ntumela gotlhelele. Mo godimo ga moo, fa ke ne nka lo botsa potso, lo ne lo se kitla lo nkaraba.” Le fa go ntse jalo, Jesu o ba bolelela a le pelokgale gore ke ene yo go neng ga bolelelwa pele ka ene mo go Daniele 7:13. O ba raya a re: “Go tloga jaanong Morwa motho o tla bo a ntse ka fa seatleng sa moja sa Modimo.”—Luke 22:67-69; Mathaio 26:63.

Ba boeletsa potso ya bone gape ba re: “A mme o Morwa Modimo?” Jesu o ba araba a re: “Lona ka bolona lwa re ke ene.” Seno se dira gore leano la bone la go batla go bolaya Jesu ka gonne ba re o a tlhapatsa, le lebege le utlwala. Ba re: “Re sa ntse re batlela eng bosupi jo bongwe?” (Luke 22:70, 71; Mareko 14:64) Ka jalo ba bofa Jesu ba bo ba mo isa kwa Mmusing wa Moroma e bong Ponto Pilato.

Judase Isekariota a ka tswa a bona Jesu fa a isiwa kwa go Pilato. Fa a lemoga gore Jesu o atlhotswe, o a ikwatlhaya e bile o utlwa botlhoko. Le fa go ntse jalo, go na le gore a bontshe gore ruri o ikwatlhaile ka go kopa Modimo gore a mo itshwarele, o busa madi a selefera a le 30 a a neng a a neilwe. Judase o raya baperesiti ba bagolo a re: “Ke leofile ka gonne ke tshwarisitse monna yo o siameng.” Go na le gore ba mo utlwele botlhoko, ba mo raya ba re: “Re dire eng ka gone? Bona gore o tswa jang!”—Mathaio 27:4.

Judase o latlhela madi ao a selefera mo tempeleng mme go tswa foo a bo a oketsa maleo a gagwe ka go leka go ipolaya. Fa Judase a leka go ikaletsa, kala e a bofelelang mogala mo go yone e a robega. O wela mo matlapeng a a kwa tlase mme mmele wa gagwe o bo o phatloga ka bogare.—Ditiro 1:17, 18.

Go sa ntse go le phakela thata fa Jesu a isiwa kwa ntlong ya segosi ya ga Ponto Pilato. Mme Bajuda ba ba mo isang koo ba gana go tsena mo teng. Ba akanya gore ba tla kopana le batho ba e seng Bajuda ba bo ba itshekologa. Seo se ka dira gore ba se ka ba tshwanelega go ja ka Nisane 15, e leng letsatsi la ntlha la Moletlo wa Senkgwe Se se Se Nang Sebediso o o tsewang e le karolo ya paka ya Tlolaganyo.

Pilato o tswela kwa ntle a bo a ba botsa jaana: “Lo latofatsa monna yono ka eng?” Ba mo raya ba re: “Fa monna yono a ne a sa dira phoso epe, re ka bo re sa mo tlisa mo go wena.” Pilato a ka tswa a lemoga gore ba batla go mo tsenya mo kgatelelong, ka jalo o ba raya a re: “Lona mo tseyeng mme lo mo atlhole go ya ka molao wa lona.” Bajuda ba bontsha gore ba ikemiseditse go bolaya Jesu, ka jalo ba raya Pilato ba re: “Ga go ka fa molaong gore re bolaye ope.”—Johane 18:29-31.

Fa baperesiti ba bagolo ba ka bolaya Jesu ka nako ya moletlo wa Tlolaganyo, seo se ka dira gore go tsoge dikhuduego. Mme fa ba ka dira gore Baroma e nne bone ba bolayang Jesu ka ditatofatso tse di amanang le gore o kgatlhanong le puso, e leng selo se Baroma ba nang le tetla ya go se dira, seo se ka dira gore batho ba akanye gore Bajuda ga se bone ba bolaileng Jesu.

Baeteledipele bano ba bodumedi ga ba bolelele Pilato gore ba atlhotse Jesu ka gonne ba re o a tlhapatsa. Jaanong ba itlhamela ditatofatso tsa maaka ba re: “Re fitlhetse monna yono [1] a faposa setšhaba sa rona, [2] a thibela batho go duela Kaesara makgetho e bile [3] a re ene ka boene ke Keresete, ke kgosi.”—Luke 23:2.

E re ka Pilato e le moemedi wa puso ya Roma, go a utlwala go bo a tshwenngwa ke kgang ya gore Jesu o ipolela gore ke kgosi. Ka jalo Pilato o boela mo ntlong, o biletsa Jesu kwa go ene a bo a mmotsa a re: “A o Kgosi ya Bajuda?” Ka mafoko a mangwe o mo raya a re, ‘A o tlodile molao ka go bolelela batho gore o kgosi e e ganetsanang le Kaesara?’ Gongwe Jesu a ka tswa a batla go itse gore Pilato o itse go le kae ka ene, ka jalo o mo raya a re: “A o botsa seno ka bowena fela, kgotsa a ba bangwe ba go boleletse ka nna?”—Johane 18:33, 34.

Pilato o bontsha gore ga a itse go le kalo ka Jesu, mme ka fa letlhakoreng le lengwe o eletsa go itse. O mo raya a re: “O a itse gore ga ke Mojuda, gakere?” A bo a oketsa jaana: “Setšhaba sa gaeno le baperesiti ba bagolo ba go tlisitse mo go nna. O dirile eng?”—Johane 18:35.

Jesu ga a leke go tila kgang ya botlhokwa thata e e amanang le bogosi. O araba ka tsela e kwa ntle ga pelaelo e gakgamatsang Molaodi Pilato fela thata.