Fa Jesu a sena go bofiwa jaaka senokwane, o isiwa kwa go Anase, yo e neng e le moperesiti yo mogolo fa Jesu a ne a gakgamatsa barutisi kwa tempeleng. (Luke 2:42, 47) Moragonyana bangwe ba barwa ba ga Anase ba ne ba nna baperesiti ba bagolo, mme jaanong mogwe wa gagwe e bong Kaiafase ke ene moperesiti yo mogolo.

Fa Jesu a sa ntse a le kwa legaeng la ga Anase, Kaifase o nna le nako ya go phutha maloko a Sanehederine. Kgotlakgolo eo ya maloko a le 71 e akaretsa moperesiti yo mogolo le batho ba bangwe ba ba kileng ba nna mo maemong ao.

Anase o botsa Jesu “ka ga barutwa ba gagwe le ka ga thuto ya gagwe.” Jesu o mo araba ka tsela e e motlhofo fela a re: “Ke buile fa pele ga batho botlhe. Ka metlha ke ne ke ruta mo sinagogeng le mo tempeleng, kwa Bajuda botlhe ba phuthegelang gone, mme ga ke a ka ka bua sepe mo sephiring. Ke ka ntlha yang fa o botsa nna? Botsa ba ba utlwileng se ke neng ke se bua.”—Johane 18:19-21.

Modiredi mongwe yo o emeng foo o faphola Jesu mo sefatlhegong a bo a mo kgalemela a re: “A ke tsela e o arabang moperesiti yo mogolo ka yone?” E re ka Jesu a itse gore ga a dira sepe se se phoso, o mo raya a re: “Fa e le gore ke buile sengwe se se phoso, ntsha bosupi jwa phoso eo; mme fa e le gore se ke se buileng se siame, ke ka ntlha yang fa o ntitaya?” (Johane 18:22, 23) Jaanong Anase o laela gore Jesu a isiwe kwa go Kaiafase.

Maloko otlhe a Sanehederine a a akaretsang moperesiti yo mogolo, baeteledipele ba batho le bakwadi, ba setse ba phuthegile. Ba phuthegetse kwa legaeng la ga Kaifase. Ga go ka fa molaong go tshwara tsheko mo bosigong jwa Tlolaganyo, mme gone seno ga se ba thibele go diragatsa leano la bone le le bosula.

Bontsi jwa maloko a lekgotla leno ba rata go tsaya letlhakore. Fa Jesu a sena go tsosa Lasaro mo baswing, ba ile ba dira tshwetso ya gore Jesu o tshwanetse go swa. (Johane 11:47-53) Mme malatsi a le mmalwa a a fetileng, baeteledipele ba bodumedi ba ne ba loga leano la gore ba tshware Jesu mme ba mmolaye. (Mathaio 26:3, 4) Go bonala sentle gore tota le pele ga tsheko eno e simologa, Jesu o ne a setse a atlholetswe loso!

Mo godimo ga gore baperesiti ba bagolo le maloko a mangwe a Sanehederine ba kopane e se ka fa molaong, ba leka go batla basupi ba ba tla ntshang bosupi jwa maaka gore ba latofatse Jesu. Ba bona batho ba le bantsi ba ba tla ntshang bosupi mme gone bosupi jwa bone ga bo dumalane. La bofelo go tla batho ba le babedi ba bo ba re: “Re mo utlwile a re, ‘Ke tla digela tempele eno fa fatshe e e neng ya agiwa ka diatla, mme mo malatsing a le mararo ke tla aga e nngwe e e sa agiwang ka diatla.’” (Mareko 14:58) Le fa go ntse jalo, banna bano ga ba dumalane ka botlalo mo kgannyeng eno.

Kaiafase o raya Jesu a re: “A ga o bue sepe? A ga o utlwe bosupi jo batho bano ba bo ntshang ka wena?” (Mareko 14:60) Jesu ga a bue sepe le fa gone basupi bano ba ba sa dumalaneng ba mo latofatsa ka maaka. Ka jalo Moperesiti yono yo mogolo e bong Kaiafase, o tla ka leano le lengwe.

Kaiafase o a itse gore Bajuda ba kgopisega motlhofo fa ba utlwa motho a re ke Morwa Modimo. Pelenyana, fa Jesu a ne a bitsa Modimo a re ke Rraagwe, Bajuda ba ne ba batla go mmolaya ka gonne ba ne ba re o “itsaya a lekana le Modimo.” (Johane 5:17, 18; 10:31-39) E re ka Kaiafase a itse gore Bajuda ba ikutlwa jang ka kgang eno, jaanong o bua le Jesu a dirisa tsela e e boferefere a re: “Ke go laela gore o ikane ka Modimo yo o tshelang gore o tla bua boammaaruri mme o re bolelele gore a o Keresete, Morwa Modimo!” (Mathaio 26:63) Gone Jesu o setse a kile a tlhalosa gore ke Morwa Modimo. (Johane 3:18; 5:25; 11:4) Mme fa gone jaanong a ka didimala fela, ba ka tsaya seo e le go itatola gore ke Morwa Modimo le gore ke Keresete. Ka jalo Jesu o mo raya a re: “Ke ene; mme lo tla bona Morwa motho a ntse ka fa seatleng sa moja sa Modimo yo o Maatla mme a tla a le mo marung a legodimo.”—Mareko 14:62.

Fa Kaiafase a utlwa mafoko ano, o gagola diaparo tsa gagwe tsa ka fa ntle a bo a goa a re: “Monna yono o tlhapaditse! Goreng re sa ntse re tlhoka basupi ba bangwe? Lo utlwile gore o tlhapaditse. Lo akanya eng?” Maloko a Sanehederine a ntsha katlholo eno e e bontshang gore a tsaya letlhakore: “O tshwanetse go swa.”—Mathaio 26:65, 66.

Jaanong ba simolola go sotla Jesu le go mo itaya ka mabole. Ba bangwe ba mo faphola mo sefatlhegong ba bo ba mo kgwela mathe mo go sone. Fa ba sena go mo khurumetsa sefatlhego le go mo faphola, ba bua jaana ba mo sotla: “Fa e le gore o moporofeti, re bolelele! Ke mang yo o go iteileng?” (Luke 22:64) Akanya fela Morwa Modimo a sotliwa mo tshekong e e tshwerweng bosigo le gone e se ka fa molaong!