Bajuda ba ba nnang fa lotshitshing lo lo ka fa bokonebophirima jwa Lewatle la Galalea ba utlwa gore Jesu o boile go tswa kwa Dekapolise. Gongwe bontsi jwa bone ba utlwile gore fa go ne go na le setsuatsue bosheng, Jesu o ne a sisibatsa phefo le lewatle, mme bangwe ba ka tswa ba itse gore o fodisitse banna ba ba neng ba laolwa ke madimona. Ka jalo, “batho ba bantsintsi” ba phuthegela fa lewatleng, gongwe fa karolong ya Kaperenama, gore ba tle go amogela Jesu. (Mareko 5:21) Mme fa a fologa mokoro, ba lebile pele go bona dilo tse a tla di dirang.

Mongwe wa batho ba ba lebileng pele go bona Jesu ke Jairo, modiredi yo o okametseng sinagoge, gongwe e e mo Kaperenama. O khubama fa dinaong tsa ga Jesu a bo a mo kopa makgetlo a le mantsi a re: “Morwadiake yo mmotlana o lwala thata. Tsweetswee tla o mmeye diatla gore a fole mme a tshele.” (Mareko 5:23) Jesu o tla araba Jairo jang ka gonne a mo kopa ka tlhoafalo gore a thuse morwadie, yo o nang le dingwaga di le 12 fela e bile e le ngwana wa gagwe yo a mo ratang thata?—Luke 8:42.

Fa Jesu a le mo tseleng a ya kwa ntlong ya ga Jairo, o kopana le boemo jo bongwe jo bo tlhomolang pelo. Bontsi jwa batho ba ba tsamayang le Jesu ba itumetse, ba ipotsa gore a ba tla kgona go mmona a dira kgakgamatso e nngwe. Le fa go ntse jalo, mosadi mongwe mo bathong bano ene, o akantse fela ka botsogo jwa gagwe.

Mosadi yono wa Mojuda, o feditse dingwaga di le 12 a na le bolwetse jwa go elela madi. O ile a batla thuso mo dingakeng di le dintsi, e bile o dirisitse madi a gagwe otlhe go reka melemo e dingaka di neng di mo laela gore a e reke. Le fa go ntse jalo, o ne a sa nne botoka. Tota e bile, o ne a lwala “le go feta.”—Mareko 5:26.

Gongwe o ka tswa o lemoga gore bolwetse jwa gagwe bo mo koafaditse e bile bo mo tlhabisa ditlhong. Ga se gantsi motho a ka bua ka bolwetse jono mo gare ga batho. Mo godimo ga moo, go ya ka Molao wa ga Moshe, fa mosadi a na le bothata jwa go elela madi, o ne a tsewa a itshekologile. Ope fela yo o kgomang mosadi yoo kgotsa diaparo tsa gagwe tse di tshasegetsweng ke madi, o tshwanetse go tlhapa, mme o tla itshekologa go fitlha maitseboa.—Lefitiko 15:25-27.

Mosadi yono o ‘utlwile dilo tse batho ba di buang ka Jesu,’ mme jaanong o batlana le ene. E re ka mosadi yono a itshekologile, o tsena mo gare ga batho ba bantsintsi a nanabela a ya kwa go Jesu, a ipolelela a re: “Fa fela nka kgoma seaparo sa gagwe sa ka fa ntle, ke tla fola.” Mme fa a kgoma seaparo sa ga Jesu sa ka fa ntle, ka bonako fela o kgona go ikutlwa gore ga a tlhole a elela madi! “Bolwetse jwa gagwe jo bo hutsafatsang bo fodile.”—Mareko 5:27-29.

Ka jalo, Jesu o botsa jaana: “Ke mang yo o nkgomileng?” O akanya gore mosadi yono o ikutlwa jang fa a utlwa mafoko ano? Petere o raya Jesu a re: “O a bona gore o kgobokanetswe ke batho ba bantsintsi e bile ba go pitlagantse thata.” Mme gone, goreng Jesu a botsa a re, “Ke mang yo o nkgomileng?” O tlhalosa jaana: “Mongwe o nkgomile, ka gonne ke a utlwa gore maatla a dule mo go nna.” (Luke 8:45, 46) Fa mosadi yono a fodisiwa, maatla a ne a tswa mo go Jesu.

E re ka mosadi yono a bona gore o lemogilwe, o khubama fa pele ga ga Jesu a tshogile e bile a roroma. O mmolelela boammaaruri ka bolwetse jwa gagwe fa pele ga batho, a bo a tlhalosa gore o sa tswa go fola. Jesu o bua le ene ka bonolo a mo gomotsa a re: “Morwadiaka, tumelo ya gago e go fodisitse. Tsamaya ka kagiso, mme bolwetse jwa gago jo bo hutsafatsang bo fole.”—Mareko 5:34.

Go a bonala gore Motho yo Modimo a mo tlhophileng gore a nne kgosi o lorato, o pelotlhomogi, o amega ka batho e bile o na le maatla a go ba thusa.