Re ka tsaya Baebele yotlhe e le molaetsa o o tswang kwa Modimong. Rraarona yo o kwa legodimong o re kwaletse yone gore e re rute. Mme gone, ela tlhoko melaetsa e mebedi e e kgethegileng e e neng ya tlisiwa dingwaga di feta 2 000 tse di fetileng. E ne ya tlisiwa ke moengele Gabariele, “yo o emang fa pele ga Modimo.” (Luke 1:19) Maemo a ne a ntse jang fa moengele yoo a ne a tlisa melaetsa eo ya botlhokwa?

Ke mo e ka nnang ka ngwaga wa 3 B.C.E. Gabariele o isa molaetsa wa ntlha kwa go mang? Moperesiti mongwe wa ga Jehofa yo o bidiwang Sekarea, o nna kwa nageng ya Judea e e dithaba, e go lebegang e se kgakala le Jerusalema. Ene le mosadi wa gagwe e bong Elisabetha, ba setse ba tsofetse, mme ga ba na bana. Jaanong ke nako ya gore Sekarea a dire tiro ya gagwe ya boperesiti kwa tempeleng ya Modimo kwa Jerusalema. Fa Sekarea a ntse a le mo tempeleng, ka tshoganyetso fela, Gabariele o tlhagelela gaufi le sebeso sa maswalo.

Go a utlwala go bo Sekarea a tshosiwa ke tiragalo eno. Le fa go ntse jalo, moengele yono o mo ritibatsa ka go mo raya a re: “Se boife, Sekarea, ka gonne Modimo o utlwile thapelo ya gago ya tlhoafalo, mme mosadi wa gago e bong Elisabetha o tla go tsholela ngwana wa mosimane, mme o mmitse Johane.” Gabariele o oketsa ka go re Johane “o tla nna mogolo mo matlhong a ga Jehofa” e bile o tla ‘baakanyetsa Jehofa batho.’—Luke 1:13-17.

Go bonala go le thata gore Sekarea a dumele seno. Goreng? Ka gonne ene le Elisabetha ba setse ba tsofetse. Ka jalo, Gabariele o mo raya a re: “Ga o kitla o kgona go bua go fitlha ka letsatsi le dilo tseno di tla diragalang ka lone, ka gonne o ne wa se ka wa dumela mafoko a me.”—Luke 1:20.

Mo nakong eno yotlhe, batho kwa ntle ba ipotsa gore ke eng fa Sekarea a tsere lobaka lo loleele jaana mo tempeleng. La bofelo o a tswa, mme ga a kgone go bua. O bua fela a dirisa diatla. Go bonala sentle gore o bone sengwe se se sa tlwaelegang fa a le mo tempeleng.

Fa Sekarea a sena go wetsa tiro ya gagwe kwa tempeleng, o boela kwa legaeng la gagwe. Moragonyana, Elisabetha o a ima. Fa a ntse a letetse go tshola ngwana, o nna kwa gae dikgwedi di le tlhano a sa kopane le batho.

Jaanong Gabariele o iponatsa lekgetlo la bobedi. O iponatsa kwa go mang? Kwa lekgarebaneng lengwe le le sa nyalwang le le bidiwang Marea, le le nnang kwa bokone jwa Jerusalema kwa kgaolong ya Galalea, kwa motseng wa Nasaretha. Moengele o mo raya a reng? O mo raya a re: “Modimo o go amogetse. Mme o tla ima o bo o tshola ngwana wa mosimane, mme o mmitse Jesu.” Gabariele o oketsa ka go re: “Ngwana yono o tla nna mogolo e bile o tla bidiwa Morwa Mogodimodimo, . . . mme o tla busa ditlogolwana tsa ga Jakobe ka bosakhutleng e le Kgosi, mme Bogosi jwa gagwe ga bo kitla bo khutla.”—Luke 1:30-33.

Ruri Gabariele o tshwanetse a bo a ne a tsaya go isa melaetsa eno e mebedi e le tshiamelo. Fa re ntse re ithuta mo go oketsegileng ka Johane le Jesu, re tla bona sentle gore ke eng fa melaetsa eno e e tswang kwa legodimong e le botlhokwa thata.