Wena yo o Ratang Jehofa:

Jesu o ne a re: “Lo tla itse boammaaruri, mme boammaaruri bo tla lo golola.” (Johane 8:32) A bo mafoko ao a kgothatsa jang ne! Ee, motho a ka kgona go itse boammaaruri, tota le ‘mo metlheng eno ya bofelo’ e go tletseng maaka mo go yone. (2 Timotheo 3:1) A o gopola lekgetlho la ntlha fa o ne o lemoga boammaaruri jo bo tlhalosiwang mo Lefokong la Modimo? A bo seo se ne sa go itumedisa jang ne!

Le fa go ntse jalo, fela jaaka go le botlhokwa go nna le kitso e e tlhomameng ya boammaaruri le go e bolelela ba bangwe ka metlha, gape go botlhokwa gore re itshware ka tsela e e tsamaisanang le boammaaruri. E le gore re kgone go dira jalo, re tshwanetse go ipoloka re le mo loratong lwa Modimo. Seno se tlhoka gore re dire eng? Mafoko a Jesu a a buileng mo bosigong jwa pele a swa a araba potso eno. O ne a raya baaposetoloi ba gagwe ba ba ikanyegang a re: “Fa lo boloka ditaelo tsa me, lo tla nnela ruri mo loratong lwa me, fela jaaka ke bolokile ditaelo tsa ga Rara mme ka nnela ruri mo loratong lwa gagwe.”—Johane 15:10.

Ela tlhoko gore Jesu o ne a nnela ruri mo loratong lwa Modimo ka go ikobela ditaelo tsa ga Rraagwe. Le rona gompieno re tlhoka go dira fela jalo. Fa re batla go nnela ruri mo loratong lwa Modimo, re tshwanetse go dirisa boammaaruri mo botshelong jwa letsatsi le letsatsi. Mo maitseboeng one ao, Jesu o ne a re: “Fa lo itse dilo tseno, lo a itumela fa lo di dira.”—Johane 13:17.

Re solofela tota gore buka eno e tla go thusa gore o tswelele pele o dirisa boammaaruri mo botshelong jwa gago mme ka jalo o nnele ruri “mo loratong lwa Modimo, . . . [o] solofetse botshelo jo bo sa khutleng.”—Jude 21.