Adame le Efa ba ne ba nna le bana, mme batho ba nna bantsi mo lefatsheng. Fa nako e ntse e ya, baengele bangwe ba ne ba tsuologa fela jaaka Satane.

Ba ne ba tla mo lefatsheng, ba fetola mebele ya bone gore e nne ya banna gore ba kgone go nyala basadi. Basadi bao ba ne ba tshola barwa ba diganka ba ba neng ba le bogale e bile ba nonofile.

Lefatshe le ne la tlala ka batho ba ba dirang bosula. Baebele ya re: “Bosula jwa motho bo ne bo le bogolo mo lefatsheng le tshekamelo nngwe le nngwe ya dikakanyo tsa pelo ya gagwe e ne e le bosula fela ka dinako tsotlhe.”

Noa e ne e le monna yo o siameng. Jehofa o ne a itsise Noa gore o tlile go nyeletsa batho ba ba bosula ka morwalela o mogolo.

Gape Modimo o ne a laela Noa gore a age mokoro o mogolo, o o bidiwang araka, le gore a tsenye lelapa la gagwe le mofuta mongwe le mongwe wa phologolo mo go yone.

Noa o ne a tlhagisa batho ka Morwalela o o neng o tla, le fa go ntse jalo ga ba a ka ba mo reetsa. Bangwe ba bone ba ne ba tshega Noa; ba bangwe bone ba mo tlhoa.

Fa araka e sena go fela, Noa o ne a tsenya diphologolo mo teng ga yone.